កូរ៉េខាងត្បូង ៖ រថយន្តនាំចូលចំនួន ៣,១៣៨ គ្រឿង ដែលមិនធ្លាប់មានពីមុនមក មានតម្លៃជាង ៣០០ លានវ៉ុន (២២០,៣៩៤ ដុល្លារអាមេរិក) ត្រូវបានលក់នៅប្រទេសកូរ៉េខាងត្បូង កាលពីឆ្នាំមុន ជាការកើនឡើងច្រើនជាង ១០ ដងធៀបនឹងឆ្នាំ ២០១៨ ។
នេះបើយោង តាមសមាគមអ្នកនាំចូល និងចែកចាយរថយន្តកូរ៉េ (Kaida) ដែលត្រូវបានដកស្រង់ដោយ Korea JoongAng Daily ថា នៅពេលពង្រីក វិសាលភាព ដើម្បីរួមបញ្ចូលរថយន្តនាំចូលដែលមានតម្លៃជាង ១០០ លានវ៉ុន រថយន្តសរុបចំនួន ៧៨,២០៨ ត្រូវបានលក់កាលពីឆ្នាំមុន។ នេះតំណាងឲ្យការកើនឡើង ៨.៨ភាគរយធៀបនឹងឆ្នាំមុន ។
គួរកត់សម្គាល់ថា រថយន្តមួយក្នុង ចំណោមរថយន្តទាំង ៣ លនាំចូលក្នុងប្រទេសកូរ៉េឥឡូវធ្លាក់ចូលក្នុងប្រភេទរថយន្តទំនើបនេះ។ ម៉ាកយីហោជាច្រើន មានការលក់បំបែកកំណត់ត្រា ដោយរថយន្ត Rolls-Royce Motor Cars លក់បាន ២៧៦ គ្រឿងក្នុងប្រទេសកូរ៉េខាងត្បូងកាលពីឆ្នាំមុន កើនឡើង ១៨ភាគរយធៀបនឹងឆ្នាំមុន ។
នេះបានធ្វើឲ្យកូរ៉េខាងត្បូង វ៉ាដាច់ប្រទេសជប៉ុន ក្លាយជាទីផ្សារលេខមួយ នៅតំបន់អាស៊ីប៉ាស៊ីហ្វិក សម្រាប់ក្រុមហ៊ុនផលិត រថយន្តជាលើកដំបូង ដែលជាការផ្លាស់ប្តូរដ៏សំខាន់មួយ ដោយសារតែចំនួនរថយន្ត Rolls-Royce លក់ក្នុងប្រទេសកូរ៉េខាងត្បូងកាលឆ្នាំ ២០១៨ មានតិចជាងពាក់កណ្តាលនៃ នោះនៅប្រទេសជប៉ុន ។
Bentley Motors ក៏មើលឃើញពីដំណើរការដ៏រឹងមាំ ដោយលក់បាន ៨១០ គ្រឿងក្នុងប្រទេសកូរ៉េខាងត្បូង កើនឡើង ៤.៣ភាគរយពីមួយឆ្នាំទៅមួយឆ្នាំ ដែលធ្វើឲ្យវាក្លាយជាទីផ្សារកំពូលសម្រាប់ Bentley នៅអាស៊ី។
ក្រុមហ៊ុនផលិតរថយន្ត របស់អង់គ្លេសក៏បានបើកដំណើរការបន្ទប់តាំងបង្ហាញរថយន្ត Bentley Cube លើកដំបូងរបស់ខ្លួនក្នុងប្រទេស ជាកន្លែងដាក់តាំងបង្ហាញ រថយន្តម៉ូដែលចុងក្រោយបង្អស់។ បន្ទប់តាំងបង្ហាញក៏ផ្តល់សេវាកម្មផ្តាច់មុខសម្រាប់ម្ចាស់រថយន្ត Bentley ក្នុងស្រុក រួមទាំងកន្លែងសម្រាប់ជប់លៀងឯកជន និងកម្មវិធីប្ដូរតាមបំណងរថយន្ត។
ដូចដែលបានរាយការណ៍ ដោយ Business Korea ថា ក្រុមហ៊ុន Automobili Lamborghini បានលក់រថយន្តចំនួន ៤៣១ គ្រឿង នៅប្រទេសកូរ៉េខាងត្បូង កាលពីឆ្នាំមុន កើនឡើង ៨ភាគរយធៀបនឹងឆ្នាំមុន ដែលលើសពីការលក់នៅប្រទេស កំណើតរបស់ខ្លួន គឺប្រទេសអ៊ីតាលីដែលលក់បានចំនួន ៤០៩ គ្រឿង ។
កូរ៉េខាងត្បូងបានក្លាយជាទីផ្សារធំទីប្រាំពីររបស់ Lamborghini ដោយវ៉ាដាច់ប្រទេសដូចជាកាណាដា អូស្ត្រាលី និងបារាំង។ Mercedes-Maybach សម្រេចបានការលក់កំណត់ត្រាជាមួយនឹងចំនួន ២,៥៩៦ គ្រឿងបានលក់នៅប្រទេសកូរ៉េខាងត្បូងកាលពីឆ្នាំមុន កើនឡើង ៣២ភាគរយ ធៀបនឹងឆ្នាំមុនធ្វើឲ្យប្រទេសនេះក្លាយជាទីផ្សារធំទី ២ សម្រាប់ Maybach បន្ទាប់ពីប្រទេសចិន៕
ដោយ៖លី ភីលីព
