គ្រប់គ្នាបានដឹងហើយថា Cristiano Ronaldo ត្រលប់មកលេង នៅក្រុមបិសាចក្រហម Manchester United វិញនេះ ក៏មានចំណែកធំពី សំណាក់លោក Sir Alex Fugerson ជាអ្នកបញ្ចុះបញ្ចូលផងដែរ។
ប្រភពនៅអង់គ្លេស អះអាងថាគ្រាន់តែ Ronaldo ចេញពី Juventus ភ្លាម ហើយមានដំណឹងថាមកលេងឱ្យក្រុម Man City លោក Sir Alex មិនសប្បាយចិត្តនោះទេ ដោយបានទាក់ទងទៅថ្នាក់ដឹកនាំ Man Utd ភ្លែតដើម្បីចុះកុងត្រាយក CR7 វិញ។ ខណៈដែលលោកនឹងទាក់ទងទៅផ្ទាល់តែម្ដងដើម្បីបញ្ចុះបញ្ចូលគេឱ្យត្រលប់មកលេងនៅ Old Trafford ជាលើកទី២។ មិនប៉ុន្មានម៉ោងផង Man Utd ក៏ប្រកាសទិញបាន Ronaldo មកវិញភ្លាម ក្នុងតម្លៃ២០លានអឺរ៉ូ។
តើមូលហេតុអ្វីបានជា Ronaldo ស្ដាប់តាមលោក Sir Alex យ៉ាងនេះ? អតីតកីឡាករ Real Madrid ធ្លាប់និយាយថា៖ គាត់ដូចជាឪពុកម្នាក់របស់ខ្ញុំ ក្នុងវិស័យបាល់ទាត់។ ខ្ញុំនៅចាំបានថាអ្វីដែលនៅជាប់ក្នុងខួរក្បាលរបស់ខ្ញុំរហូតមកនោះ គឺនៅពេលឪពុករបស់ខ្ញុំកំពុងសម្រាកនៅពេទ្យ ហើយយើងកំពុងស្ថិតក្នុងពេលវេលាប្រកួតសំខាន់ៗជាច្រើន…ខ្ញុំបាននិយាយទៅគាត់សុំគាត់ដើម្បីទៅមើលឪពុករបស់ខ្ញុំដែលសម្រាកលើគ្រែនៅពេទ្យ។ គាត់មិនស្ទាក់ស្ទើរឡើយ គាត់បានប្រាប់មកខ្ញុំថា សូមស្ដាប់ឪពុករបស់អ្នកគឺសំខាន់បំផុតក្នុងជីវិតអ្នក វាសំខាន់ជាងអ្វីទាំងអស់ អ្នកអាចទៅប៉ុន្មានក៏បានតាមដែលត្រូវការ។
ពេលខាងលើនេះហើយ ជាពេលដែលខ្ញុំចង់ចាំអំពើ ល្អរបស់គាត់មកលើខ្ញុំជានិច្ច។ វាជាពេលពិសេសបំផុតសម្រាប់ខ្ញុំក្នុងមួយជីវិតនេះ ខ្ញុំមិនអាចបំភ្លេចបានទេ ។ គាត់ជាគ្រូបង្វឹកល្អបំផុតសម្រាប់ខ្ញុំនៅលើលោកនេះ៕
