ភ្នំពេញ ៖ ការប្រកួតកីឡា ហែលទឹក ទីឆ្ងាយ (Open Water) ជ្រើសរើសជើងឯក ប្រចាំឆ្នាំ២០២១ កាលថ្ងៃទី០៧ ខែវិច្ឆិកា ឆ្នាំ២០២១ នៅមណ្ឌលកីឡាហែលទឹក នៃពហុកីឡដ្ឋានជាតិ មរតកតេជោ រាជធានីភំ្នពេញ បានបញ្ចប់ដោយជោគជ័យ ក្រោមការរៀបចំ ដោយសហព័ន្ធខ្មែរ កីឡាហែលទឹក ។
លោក ហែម គីរី អគ្គលេខាធិការ សហព័ន្ធខ្មែរកីឡាហែល ទឹក បានប្រាប់ឲ្យដឹងថា ការប្រកួតនេះ ជាការប្រកួត ដើម្បីបំផុសវិស័យ កីឡាហែលទឹកទីឆ្ងាយ នៅប្រទេសកម្ពុជា ហើយកាលពីលោក នៅជាកីឡាហែលទឹក ឳពុកលោក បានរៀបចំការ ប្រកួតដោយហែលឆ្លងកាត់ ទន្លេមេគង្គ នាឆ្នាំ១៩៩៣ រហូតដល់១៩៩៩ សហការជាមួយក្រុមហ៊ុនឯកជន។ នាពេលនោះយើងដាក់៣វិញ្ញាសា គឺមហាជន៨០០ម៉ែត្រ (ចាប់ពីស្ពានជ្រោយចង្វា ដល់មុខវាំង) វិញ្ញាសានារី១៦០០ម៉ែត្រ (១ជុំ) និងវិញ្ញាសាបុរស៣២០០ម៉ែត្រ (២ជុំ) ហើយលោកទទួលបានមេដាយមាស នៃការប្រកួតនាពេលនោះដែរ ។
លោកអគ្គបានបន្តថា ការប្រកួតហែលទឹកទីឆ្ងាយ ដែលធ្វើឡើង ក្នុងអាងហែលទឹកនេះ ដោយសារតែស្ថានភាព មេរោគCOVID-19 និងស្ថានភាពទឹកក្នុង ទន្លេ បឹង និងសមុទ្រ មិនអំណោយផល ជាក់ស្តែង នៅប្រទេសថៃ ចំណែកសត្ថភាព របស់កីឡាករ -កីឡាការិនី មានការប្រែប្រួល ល្អជាងមុន រីឯអត្តពលិកក្មេងៗបានធ្វើឲ្យលោកមានការស្រឡាំងកាំងដោយសារតែសិទ្ធិផល របស់គេកាន់តែល្អ ។
លទ្ធផល៖កីឡាករហែល ចម្ងាយ ៥.០០០ម៉ែត្រ មេដាយមាស បានទៅកីឡាករ ឌឿន វ៉ាត់ធីឌុន ជាកីឡាករជម្រើសជាតិ ឆ្នាំ២០២១មកពីក្លិប ក្រសួង សេដ្ឋកិច្ច និងហិញ្ញវត្ថុ ដោយហែល ប្រើថិរវេលា១ម៉ោង១០នាទី០៣វិនាទី៣០ មេដាយប្រាក់ កីឡាករ ហែម ប៉ុច ជាកីឡាករជម្រើសជាតិ ឆ្នាំ២០២១ មកពីក្រសួងមហាផ្ទៃ ហែលប្រើថិរវេលា ១ម៉ោង១០នាទី០៣វិនាទី៦៧ និងមេដាយសំរិទ្ធ បានទៅកីឡាករ ទួន ទិត្យសត្យា ជាកីឡាករជម្រើសជាតិ ឆ្នាំ២០២១ មកពីក្រសួងសេដ្ឋកិច្ច និងហិរញ្ញវត្ថុ ប្រើថិរវេលាហែល១ម៉ោង១០នាទី០៤វិនាទី៧៤ ។
ចំពោះកីឡាការិនីហែលចម្ងាយ ៣.០០០ម៉ែត្រ មេដាមាសបានទៅកីឡាការិនីវ័យក្មេង អាយុ១២ឆ្នាំឃឺន ច័ន្ទចរិយា ជាកីឡាការិនី ជម្រើសជាតិ ឆ្នាំ២០២១មកពីក្រសួង សេដ្ឋកិច្ចហិរញ្ញវត្ថុ ប្រើពេល៤៥នាទី០៨វិនាទី៩៦ មេដាយប្រាក់ កីឡាកា រិនី កាំង មុយនីន ជាកីឡាការិនីជម្រើសជាតិ ឆ្នាំ២០២១ មកពីក្រសួងសាធារណការ និងដឹកជញ្ជូន ហែលប្រើ ថិរវេលា៤៥នាទី១០វិនាទី១៤ មេដាយសំរិទ្ធ កីឡាការិនី សុខ វរល័ក្ខណ៍ ជាកីឡាការិនី ជម្រើស ជាតិឆ្នាំ២០២១មកពីក្រសួងមហាផ្ទៃ ដោយហែល ក្នុងថិរវេលា៤៥នាទី១១វិនាទី០៥ ។
លោក ហែម គីរី សង្កត់ធ្ងន់ថា ប្រភេទវិញ្ញាសា Open Water នេះមិនទាន់ផ្តោតសំខាន់ ឬកំណត់ថាមាន ឬអត់ សម្រាប់ការ ទទួលធ្វើម្ចាស់ផ្ទះ ការប្រកួតកីឡា ស៊ីហ្គេម លើកទី៣២ ឆ្នាំ២០២៣ នៅឡើយទេ ដោយយើងចង់បង្កើត ឲ្យមានធនធាន ឲ្យបានច្រើន លើវិញ្ញាសានេះ សម្រាប់ការ ប្រកួតស៊ីហ្គេម ក្រោយឆ្នាំ២០២៣ ឬការប្រកួតអន្តរជាតិ នាពេលខាងមុខ ៕
