អតីតគ្រូបង្វឹកឆ្នើមរបស់ក្លឹប RB Liepzig និង RB Salzburg កាលពីថ្ងៃសុក្រម្សិលមិញនេះ ត្រូវបានក្លឹបបិសាចក្រហម Man UTD ប្រកាសជាផ្លូវការហើយថា នឹងទទួលតំណែង ជាគ្រូបង្វឹកឈុតធំរបស់ក្លឹប តែក្នុងលក្ខខណ្ឌបណ្តោះអាសន្នប៉ុណ្ណោះ។
លោក Ralf Rangnick បានចុះកុងត្រា ដែលមានរយៈពេលត្រឹមតែ៦ខែប៉ុណ្ណោះ រហូតដល់ចុងរដូវកាល ដើម្បីក្លាយជាគ្រូបង្វឹកបណ្តោះអាសន្ន និងរងចាំរហូតដល់មានវត្តមាន របស់គ្រូបង្វឹកថ្មីមកដល់ទឹកដី Old Trafford ខណៈដែលគាត់នឹងទទួលយកការងារ ទីប្រឹក្សារបស់ក្លឹបជំនួសវិញក្នុងរយៈពេល២ឆ្នាំបន្ធែមទៀត។
មុនពេលមកដល់អង់គ្លេសនេះលោក Rangnich កំពុងតែមានវត្តមាន នៅក្នុងប្រទេសរុស្ស៊ី ទីក្រុងមូស្គូនៅឡើយ ក្នុងនាមជាប្រធានផ្នែកកីឡាកររបស់ក្លឹប Lokomotiv Moscow ដែលកុងត្រាថ្មីនៅ Old Trafford លោកនឹងទទួលបានប្រាក់កម្រៃ ប្រមាណជា៣,៨លានផោន ក្នុងមួយឆ្នាំនិងមិនមានប៉ះពាល់ដល់ការចំណាយប្រាក់សំណង ជាមួយនឹងក្លឹបនៅរុស្ស៊ីឡើយ ជាមួយនឹងការចាកចេញលើកនេះ។
គួរឲ្យដឹងដែរថា Man UTD ក្រោយការចាកចេញរបស់លោកតា Sir Alex Ferguson មកដែលបានធ្វើការនៅទីនេះ អស់រយៈពេល២៦ឆ្នាំនោះមកទំរង់លេងរបស់ក្លឹបហាក់គ្មានគំរូច្បាស់លាស់ឡើយ ទោះបីជាបានផ្លាស់ប្តូរគ្រូបង្វឹក អស់ប្រមាណជា៥នាក់មកហើយក្តី៕ ប្រែសម្រួល៖ស៊ុនលី
