ភ្នំពេញ ៖ នៅថ្ងៃទី១៥ ខែសីហា ឆ្នាំ២០២២ សហព័ន្ធកីឡាម៉ូតូទឹកកម្ពុជា បានរៀបចំធ្វើសន្និបាត វិសាមញ្ញ ដើម្បីធ្វើការពិនិត្យ កែសម្រួលសមាភាព គណៈកម្មាធិការប្រតិបត្តិ និងរចនាសម្ព័ន្ធដឹកនាំ របស់សហព័ន្ធឆ្នាំ២០២២ ដោយមានការអញ្ជើញ ចូលរួមពីសំណាក់ លោក ណុះ ស្លេះ រដ្ឋលេខាធិការ ក្រសួងអប់រំ យុវជន និងកីឡា ជាប្រធានសហព័ន្ធ កីឡាម៉ូតូទឹកកម្ពុជា នៅទីស្នាក់ការគណៈកម្មាធិការជាតិ អូឡាំពិកកម្ពុជា ។
លោក ណុះ ស្លេះ បានមានបានប្រសាសន៍ថា សហព័ន្ធនឹងធ្វើកែសម្រួល សមាភាពគណៈកម្មាធិការ ប្រតិបត្តិមួយចំនួន និងបន្ថែមសមាភាព គណៈកម្មាធិការប្រតិបត្តិទៀត ក្នុងនោះលោក ហ៊ុន សាមុត អគ្គលេខាធិការ និងលោក ម៉ិល កាដូ អនុប្រធាន ត្រូវបានតែងតាំង ជាទីប្រឹក្សាសហព័ន្ធ ដោយសារលោកទំាង២រូប មានភារកិច្ចច្រើន និងមានបញ្ហាសុខភាព ។ លោក ហួត សេងទ្រី ត្រូវបានតែងតាំងអនុប្រធាន ចំណែកលោក ប៊ូ វិរៈ ត្រូវបានតែងតាំង អគ្គលេខាធិការ របស់សហព័ន្ធកីឡាម៉ូតូទឹកកម្ពុជា ចាប់ពីពេលនេះតទៅ ។
លោកប្រធានបន្តថា បច្ចុប្បន្នសហព័ន្ធកីឡាម៉ូតូទឹកកម្ពុជា មានគណៈកម្មាធិការប្រតិបត្តិ ១១ នាក់ ដូច្នេះនឹងបន្ថែមគណៈកម្មាធិការ ប្រតិបត្តិចំនួន ១៦នាក់ទៀតសរុប ២៧ នាក់ ដើម្បីចូលរួមសកម្មភាព កីឡាម៉ូតូទឹកឲ្យមានការរីកចម្រើន កាន់តែខ្លាំង និងត្រៀមខ្លួន ប្រកួតព្រឹត្តិការណ៍ការ ប្រកួតកីឡា SEA GAMES 2023 លើកទី៣២ ឆ្នាំ២០២៣ នៅប្រទេសកម្ពុជា ៕ដោយ៖លី ភីលីព
