ប្រទេស
ឥន្ទ្រីដែកអាល្លឺម៉ង់ គឺជាក្រុមជោគជ័យបំផុតនៅពានរង្វាន់ World Cup ចំពោះការឡើងទៅដល់ចំណាត់ថ្នាក់ Top 4 ច្រើនជាងគេដល់ទៅ១៣ដង មិនទាន់មានប្រទេសណាធ្វើបានដូចនៅឡើយទេ។
សហព័ន្ធ
ពិតជាធ្វើបានល្អមែនទែនសម្រាប់អាល្លឺម៉ង់ ក្នុងវគ្គជម្រុះនៅតំបន់អឺរ៉ុប ដើម្បីបានឡើងមកលេងនៅប្រទេសកាតា។ ពួកគេបានបញ្ចប់នៅចំណាត់ថ្នាក់កំពូលតារាងពូល J ឆ្លងកាត់១០ប្រកួតឈ្នះ៩និងចាញ់តែមួយប្រកួតគត់។ ចំណាត់ថ្នាក់នេះគ្រប់គ្រាន់ ឲ្យពួកគេបានកៅអីមួយឡើងមកលេង ក្នុងព្រឹត្តិការណ៍ World Cup ជាលើកទី២០ ក្នុងប្រវត្តិសាស្ត្ររបស់ខ្លួន។
ប្រវត្តិក្នុង World Cup
មិនធម្មតាឡើយសម្រាប់ប្រវត្តិរបស់អាល្លឺម៉ង់ ក្នុងពានរង្វាន់ World Cup ដោយពួកគេធ្លាប់លើកពាន៤ដងក្នុងឆ្នាំ១៩៥៤, ១៩៧៤, ១៩៩០និង២០១៤។ មិនតែប៉ុណ្ណោះពួកគេ ក៏ធ្លាប់បានចំណាត់ថ្នាក់រងជើងឯក៤ដងដូចគ្នា ក្នុងឆ្នាំ១៩៦៦, ១៩៨២, ១៩៨៦និង២០០២។
លើសពីនេះទៅទៀត អាល្លឺម៉ង់ធ្លាប់ដណ្ដើមបានលេខបី ៤ដងផងដែរនៅឆ្នាំ១៩៣៤, ១៩៧០,២០០៦និង២០១០ ហើយបានលេខ៤ម្ដងនៅឆ្នាំ១៩៥៨។ លទ្ធផលនេះបានធ្វើឲ្យអាល្លឺម៉ង់ ជាក្រុមដណ្ដើមបានចំណាត់ថ្នាក់ Top 4 ច្រើនជាងគេគ្មានក្រុមណាធ្វើដូច។
កីឡាករសំខាន់
យោងលើបទពិសោធន៍ក្រាស់ក្រែល ក្នុងពានរង្វាន់ World Cup ខ្សែប្រយុទ្ធ Thomas Muller អាចចាត់ទុកថាជាកីឡាករសំខាន់ប្រចាំក្រុមទាំងការលេងនិងស្មារតី។ កីឡាករវ័យ៣៣ឆ្នាំរបស់ក្លឹប Bayern Munich ធ្លាប់ជួយអាល្លឺម៉ង់ឈ្នះពាន World Cup ឆ្នាំ២០១៤និងទទួលបានចំណាត់ថ្នាក់លេខ៣ក្នុងឆ្នាំ២០១០។
Muller លេចឈ្មោះខ្លាំងបំផុតកាលពីព្រឹត្តិការណ៍ World Cup ឆ្នាំ២០១០ ដោយកាលនោះ គេបានឈ្នះស្បែកជើងមាសរកបាន៥គ្រាប់ និងពានកីឡាករវ័យក្មេងប្រចាំកម្មវិធី ត្រឹមអាយុ២១ឆ្នាំ។
ឯកសណ្ឋាន
អាវរបស់ក្រុមជម្រើសជាតិអាល្លឺម៉ង់ ត្រូវបានផលិតដោយក្រុមហ៊ុនសំលៀកបំពាក់ Adidas មានទាំងក្នុងនិងក្រៅដី។ អាវក្នុងដីមានពណ៌ស លាយឆ្នូតពណ៌ខ្មៅដិតនិងឡូហ្គោ តំណាងក្រុមពណ៌មាសនៅចំកណ្ដាល។ ចំណែកផ្នែកកមានពណ៌តំណាងឲ្យទង់ជាតិប្រទេសអាល្លឺម៉ង់។
ចំណែកឯកអាវក្រៅដីមានពណ៌ក្រហមលាយខ្មៅ ដែលយកចេញពីពណ៌ក្នុងទង់ជាតិប្រទេសអាល្លឺម៉ង់ ឯឡូហ្គោតំណាងក្រុមត្រូវប្ដូរមកខាងឆ្វេងអាវវិញ៕ Source: Sabay
