ភ្នំពេញ ៖ កីឡាការិនីអុក ទេព សុខរដ្ឋា មកពីក្លិបកីឡា អុកចត្រង្គអង្គរភ្នំពេញ និងកីឡាករ សុខ លឹមហេង ក្លិបកីឡាអុកចត្រង្គសេះខៀវ គ្រងតំណែងជើងឯក នៃការប្រកួតកីឡាអុកចត្រង្គ ជ្រើសរើសជើងឯក ថ្នាក់ជាតិប្រចាំឆ្នាំ២០២២ ដែលការប្រកួតនេះ រៀបចំដោយសហព័ន្ធកីឡា អុកចត្រង្គកម្ពុជាក្រោម ការប្រើប្រាស់ថវិកា ឧបត្ថម្ភប្រចាំឆ្នាំ របស់ក្រសួងអប់រំ យុវជន និងកីឡា ។
ក្នុងឱកាសប្រគល់មេដាយ និងបិទការប្រកួតកីឡា អុកចត្រង្គជ្រើសរើសជើងឯក ថ្នាក់ជាតិប្រចាំឆ្នាំ២០២២ ដោយមានការអញ្ជើញ ចូលរួមពីសំណាក់លោក ប៉ែន វុទ្ធី អនុប្រធាននាយកអប់រំកាយ និងកីឡាទទួលបន្ទុករួមនៃក្រសួងអប់រំ យុវជន និង កីឡា ។
ការប្រកួតនា ឆ្នាំនេះ ទទួលបានលទ្ធផលយ៉ាងល្អប្រសើរ ដោយមានការសហការគ្នា បានយ៉ាងល្អ រវាងកីឡាករទាំងអស់ មកពីរាជធានី-ខេត្ត បានបង្ហាញ នូវទឹកចិត្ត ចូលរួមយ៉ាងសកម្ម ដែលញាំងឲ្យការប្រកួតនេះប្រព្រឹត្តទៅបានយ៉ាងរលូន ប្រកបដោយជោគជ័យ ហើយកាន់តែមានកម្រិត សម្រិតសម្រាងខ្ពស់ទៅលើគុណភាព ជាកត្តានាំឲ្យសហព័ន្ធកីឡាអុក ចត្រង្គកម្ពុជាទទួលបានក្លិបកីឡាអុក ចត្រង្គកម្ពុជាចំនួន ១៦ក្លិប មានកីឡាករ សរុប៤៤នាក់ ស្រី ៤នាក់ ។
ចំពោះចំណាត់ថ្នាក់៖កីឡាករ សុខ លឹមហេង ក្លិបកីឡាអុកចត្រង្គសេះខៀវ ទទួលបានមេដាយមាស កីឡាករ ជា ស៊ីដេត ក្លិបកីឡាអុកចត្រង្គអង្គរធំ ទទួលបានមេដាយប្រាក់ និងកីឡាករ ប៊ូ ប៉ុណ្ណម៉ាលីកា ក្លិបកីឡាអុកចត្រង្គអង្គរភ្នំពេញទទួលបានមេដាយសំរិទ្ធ ចំណែកកីឡាការិនីវិញ៖កីឡាការិនី ទេព សុខរដ្ឋា មកពីក្លិបកីឡា អុកចត្រង្គអង្គរភ្នំពេញ ទទួលបានមេដាយមាស កីឡាការិនី ប៉ែន ខេមរារស្មី ក្លិបកីឡាអុកចត្រង្គប៊ូឌីង ទទួលបានមេដាយប្រាក់ និងកីឡាការិនី ហ៊ន សុខងីម ក្លិបកីឡាអុកចត្រង្គប៊ូឌីង ទទួលបានមេដាយសំរិទ្ធ ៕
