វៀតណាម៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា កីឡាការិនីវាយសីលេខមួយរបស់ប្រទេសវៀតណាម នាង Nguyen Thuy Linh បានកើនឡើងដល់ចំណាត់ថ្នាក់លេខ ២៣ ក្នុងចំណាត់ថ្នាក់ពិភពលោក បន្ទាប់ពីបានឈានដល់វគ្គ ១/៤ ផ្តាច់ព្រ័ត្រ US Open ។
កីឡាការិនី Linh បានផ្តួលកីឡាការិនី Esther Shi ក្នុងជុំទី ៣២ និងកីឡាការិនី Iris Wang ក្នុងជុំទី ១៦ ។
ការប្រកួតវគ្គ ១/៤ ផ្តាច់ព្រ័ត្រ ឃើញថា កីឡាការិនី Linh នឹងឡើងមកជួបកីឡាការិនី លេខ ៧ ពិភពលោក Ratchanok Intanon របស់ប្រទេសថៃ។ ថ្វីបើឈ្នះក្នុងសិតទី១ក៏ដោយ កីឡាការិនី Linh បានបណ្តោយឲ្យ កីឡាការិនី Intanon វាយបកយកឈ្នះ ២-១ ហើយត្រូវបានកាត់ចេញ។
បន្ទាប់ពីការប្រកួត កីឡាការិនី Linh បានបន្ថែម ៣,៨៥០ ពិន្ទុដល់ចំនួនសរុបរបស់កីឡាការិនី ហើយបានឡើងលេខ ៣ ដល់លេខ ២៣ នៅលើចំណាត់ថ្នាក់សហព័ន្ធកីឡាវាយសីពិភពលោក (BWF) ដែលជាតំណែងខ្ពស់បំផុតក្នុងអាជីពរបស់កីឡាការិនី ។
កាលពីសប្តាហ៍មុនកីឡាការិនី Linh ទទួលបាន ៥,០៤០ ពិន្ទុ បន្ទាប់ពីបានឈានទៅវគ្គ១/៤ នៃព្រឹត្តិការណ៍ Canada Open ។
ចាប់តាំងពីដើមឆ្នាំ ២០២៣ មកកីឡាការិនី Linh បានលោតឡើងចំនួន ២៨ កន្លែង។ តំណែងនេះបានពង្រឹងកីឡាការិនី Linh ជាកីឡាការិនី វាយសីលេខ១នៅវៀតណាម លេខ ៦នៅអាស៊ីអាគ្នេយ៍ និងលេខ១៨នៅអាស៊ី។
កីឡាការិនី ជាប់ចំណាត់ថ្នាក់តាមពីក្រោយកីឡាការិនី Itanon របស់ថៃ (ទី៧ក្នុងពិភពលោក) Pornpawee Chochuwong (ទី១០), Busanan Ongbamrungphan (ទី១៣) និង Supanida Katethong (ទី១៦) និង Mariska Tunjung របស់ឥណ្ឌូនេស៊ី (ទី៨)។ កីឡាការិនីវាយសីលេខមួយនៅតែជាកីឡាការិនីជប៉ុន Akane Yamaguchi។
នៅឆ្នាំ ២០២៣ កីឡាការិនី Linh ក៏បានឈ្នះការប្រកួតអន្តរជាតិវៀតណាម និងបានបញ្ចប់ក្នុងចំណាត់ថ្នាក់លេខ ២ ក្នុងការប្រកួត Thailand International Challenge ។ នៅចុងខែសីហា នាងនឹងទៅប្រកួតជើងឯកពិភពលោកនៅប្រទេសដាណឺម៉ាក បន្ទាប់មកទៅប្រទេសចិន សម្រាប់ Asian Games ១៩នៅខែកញ្ញា។
ជាមួយនឹងមុខតំណែង និងទម្រង់លេងបច្ចុប្បន្នរបស់កីឡាការិនី Linh ត្រូវបានគេរំពឹងថានឹងមានសិទ្ធិចូលរួមប្រកួតកីឡាអូឡាំពិកទីក្រុងប៉ារីស ឆ្នាំ ២០២៤៕ ដោយ៖លី ភីលីព
