ភ្នំពេញ ៖ ក្រសួងអប់រំ យុវជន និងកីឡា ប្រកាសរៀបចំការប្រកួតកីឡាឧត្តម សិក្សា និងមធ្យមសិក្សាបច្ចេកទេស ថ្នាក់ជាតិ ឆ្នាំ២០២៤ ដែលនឹងប្រព្រឹត្តទៅ ចាប់ពីថ្ងៃទី១៨ ដល់ថ្ងៃទី២៧ ខែឧសភា ឆ្នាំ២០២៤ នៅរាជធានីភ្នំពេញ លើ១៣ប្រភេទកីឡា ក្រោមការសហការ បច្ចេកទេសជាមួយ សហព័ន្ធកីឡាជាតិទំាង១៣ ។
ការប្រកួតនេះធ្វើឡើង ដើម្បីលើកកម្ពស់វិស័យកីឡា ស្របជាមួយនឹងគោលនយោបាយជាតិ ផែនការយុទ្ធសាស្ត្រ អភិវឌ្ឍវិស័យអប់រំកាយ និងកីឡា និងកំណែទម្រង់ស៊ីជម្រៅការងារ អប់រំកាយ និងកីឡា ក្រសួងអប់រំ យុវជន និងកីឡា ហើយការប្រកួតកីឡាឧត្តម សិក្សា និងមធ្យមសិក្សាបច្ចេកទេស ថ្នាក់ជាតិ ឆ្នាំ២០២៤ នឹងប្រព្រឹត្តទៅចាប់ពីថ្ងៃទី១៨ ដល់ថ្ងៃទី២៧ ខែឧសភា ឆ្នាំ២០២៤ នៅភ្នំពេញ លើ១៣ប្រភេទកីឡាមាន បាល់ទាត់ បាល់ទះ បាល់បោះ អត្តពលកម្ម វាយកូនឃ្លីលើតុ វាយសី ហែលទឹក តេក្វាន់ដូITF តេក្វាន់ដូWT ប៉េតង់ ការ៉ាតេ សីដក់ និងគុនដាវ ។
ក្រសួងទទួលបន្ទុក លើការហូបចុក ស្នាក់នៅ និងដឹកជញ្ជូនក្នុងអំឡុងពេលការប្រកួត សម្រាប់គ្រូបង្វឹក គ្រូជំនួយ កីឡាករ កីឡាការិនី និងមន្ត្រីដែលមាន ក្នុងនិយាមបច្ចេកទេស ដែលបានកំណត់ក្នុងបទបញ្ញត្តិទូទៅ ។ ចំណែកការហូបចុកស្នាក់នៅ របស់ប្រតិភូដឹកនាំ ការធ្វើដំណើរ ការហូបចុកពេលមកចូលរួម ការប្រកួត និងត្រឡប់ទៅ រាជធានី ខេត្តវិញ ជាបន្ទុកចំណាយរបស់អង្គភាពសាមី ៕
