អាហ្វហ្គានីស្ថាន៖នេះបើយោងតាមសេចក្តីរាយការណ៍ របស់ប្រព័ន្ធផ្សព្វផ្សាយបាននិយាយថា ក្រុមតាលីបង់បានហាមប្រាមកីឡាក្បាច់គុនចម្រុះ (MMA) ក្នុងប្រទេសអាហ្វហ្គានីស្ថាន ដោយអះអាងថា ប្រកួតកីឡាក្បាច់គុនចម្រុះ នេះមានអំពើហិង្សាខ្លាំងពេក និងបំពានច្បាប់អ៊ីស្លាមទៀត យោងតាមការចេញផ្សាយពីគេហទំព័រ RT ។
សេចក្តីប្រកាសដោយក្រសួងប្រទេសសម្រាប់ការផ្សព្វផ្សាយគុណធម៌ និងការបង្ការការពារបានអះអាងថា ការប្រកួតកីឡាក្បាច់គុនចម្រុះ (MMA) បានបង្កហានិភ័យខ្ពស់រហូតដល់ស្លាប់ទៀត។ ចំណែកអ្នកនាំពាក្យរបស់នាយកដ្ឋានកីឡារបស់តាលីបង់ លោក Atal Mashwani បានប្រាប់កាសែត The Telegraph កាលពីថ្ងៃព្រហស្បតិ៍ថា ការប្រកួតប្រយុទ្ធឥតមេត្តានេះត្រូវបានហាមឃាត់ចាប់ពីពេលនេះតទៅ ហើយគ្មាននរណាម្នាក់ត្រូវបានអនុញ្ញាតឲ្យអនុវត្តកីឡានេះឡើយ ។
លោកបានបន្តថា អត្តពលិកទាំងនោះដែលបានចូលរួមក្នុងកីឡានោះអាចផ្លាស់ទៅលេងកីឡាផ្សេងទៀតតាមជម្រើសរបស់ពួកគេ ហើយបន្តសកម្មភាពរបស់ពួកគេ។ លោក Mashwani បានបន្ថែមថា ការសម្រេចចិត្តនេះបានធ្វើឡើង បន្ទាប់ពីការស៊ើបអង្កេតលើការអនុលោមតាមច្បាប់របស់កីឡាអ៊ីស្លាម ក្រោយពីការស៊ើបអង្កេត វាត្រូវបានសម្រេចថា កីឡាគួរត្រូវបានហាមឃាត់។
អ្នកនាំពាក្យរូបនេះបានកត់សម្គាល់ថា អាជ្ញាធរកីឡាអាហ្វហ្គានីស្ថានមិនមានស្ថិតិអំពីចំនួនអត្តពលិកដែលចូលរួមក្នុងការប្រកួត MMA នោះទេ ដោយសារអត្តពលិកជាផ្នែកនៃអង្គការឯកជន និងមិនត្រូវបានចុះឈ្មោះជាមួយនាយកដ្ឋានកីឡា។
សហព័ន្ធក្បាច់គុនចម្រុះនៃប្រទេសអាហ្វហ្គានីស្ថានត្រូវបានបង្កើតឡើងក្នុងឆ្នាំ ២០០៨ បានក្លាយជាការពេញនិយមក្នុងចំណោមយុវវ័យ។ នៅឆ្នាំ ២០១៥ ការប្រកួត MMA ឯកជនលើកដំបូងត្រូវបានបង្កើតឡើងនៅប្រទេសអាហ្វហ្គានីស្ថាន។
Afghanistan Fighting Championship (AFC) និង Truly Grand Fighting Championship (TGFC) បានរៀបចំការប្រយុទ្ធរាប់សិបដង មុនពេលក្រុមតាលីបង់បានត្រឡប់មកកាន់អំណាចនៅឆ្នាំ ២០២១ ។ ទោះជាយ៉ាងណាក៏ដោយ មិនយូរប៉ុន្មាន ការប្រកួតនានាត្រូវបានហាមឃាត់យ៉ាងមានប្រសិទ្ធភាព បន្ទាប់ពីច្បាប់ហាមឃាត់ការដាល់ចំមុខត្រូវបានណែនាំជាផ្លូវការ៕
