ភ្នំពេញ ៖ នាព្រឹកថ្ងៃទី៥ ខែមេសា ឆ្នាំ២០២៥ នេះ អគ្គនាយកដ្ឋានកីឡា នៃក្រសួងអប់រំ យុវជន និងកីឡា បានរៀបចំពិធី សូត្រមន្ត ចម្រើនព្រះបរិត្ត សិរីសួស្តី ជ័យមង្គល ប្រោះព្រំដល់គ្រួសារកីឡាក្នុង ឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ និងទទួលទានអាហារសាមគ្គីជាមួយមន្រ្តី និងមន្រ្តីចូលនិវត្តន៍ក្នុងវិមាន នៃពហុកីឡដ្ឋានជាតិអូឡាំពិក។
ពិធីដ៏មហោឡារិកនេះ បានប្រារព្ធឡើងទៅ តាមគន្លងទំនៀមទម្លាប់ ប្រពៃណីព្រះពុទ្ធសាសនាដ៏ផូរផង់ ដោយមានការចូល រួមពីសំណាក់លោក វ៉ាត់ ចំរើន លោក កែ ប៊ុនខៀង លោក សាមឺឌី ស៊ីវឌ្ឍនា រដ្ឋលេខាធិការក្រសួងអប់រំ យុវជន និងកីឡា និងលោក ប៉ុន សុខ អគ្គនាយកនៃអគ្គនាយកដ្ឋានកីឡា ព្រមទាំងថ្នាក់ដឹកនាំនាយកកីឡា មន្ត្រីរាជការ ក្រោមឱវាទទំាងអស់ ។
ក្នុងឱកាសនេះលោករដ្ឋលេខាធិការ ក្រសួងអប់រំ និងថ្នាក់ដឹកនាំ មន្ត្រីរាជការ បានប្រគេននូវទេយ្យវត្ថុ និងបវារណាចតុបច្ច័យ ថ្វាយចំពោះព្រះភិក្ខុសង្ឃគ្រប់អង្គ ដើម្បីជាកិច្ចបំពេញកុសល និងបួងសួង សុំសេចក្តីសុខចម្រើន ជោគជ័យលើ គ្រប់កិច្ចការងារ សូមកើតមានចំពោះមហាគ្រួសារ អគ្គនាយកដ្ឋានកីឡា ក៏ដូចជាប្រជាពលរដ្ឋខ្មែរគ្រប់ៗរូប ជានិច្ចនិរន្តរ៍តរៀងទៅ ។
អគ្គនាយកដ្ឋានកីឡា បានរៀបចំពិធីអបអរសាទរ បុណ្យចូលឆ្នាំថ្មីប្រពៃណីជាតិខ្មែរ ដោយមានការបូជាទៀនធូប ផ្កាភ្ញី គ្រឿងសក្ការៈនានា ថ្វាយព្រះរតនត្រ័យ និងបាននិមន្តព្រះសង្ឃ ដើម្បីចម្រើនព្រះបរិត្ត ស្វាធ្យាយជយន្តោ ពុទ្ធជ័យមង្គល។
ពិធីតាមបែបសាសនានេះប្រារព្ធឡើង ជាការជូនដំណើរឆ្នាំចាស់ និងទទួលអំណរ ឆ្នាំថ្មី ឆ្នាំម្សាញ់ សប្តស័ក ពុទ្ធសករាជ ២៥៦៩ ជាពិសេសការត្រៀមទទួលស្វាគមន៍ទេវតាឆ្នាំថ្មីព្រះនាម គោរាគទេវី ជាបុត្រីទី២ របស់កបិលមហាព្រហ្ម ដែលនឹងយាងចុះមកនៅវេលាម៉ោង ៤:៤៨ នាទីទាបភ្លឺ ថ្ងៃទី១៤ ខែមេសា ឆ្នាំ២០២៥ ខាងមុខនេះ៕
ដោយ៖លី ភីលីព
