ស៊ីដនី៖ អូស្ត្រាលីបាននិយាយថា កោះប៉ាស៊ីហ្វិកនៃ Palau នឹងសាងសង់ខ្សែកាបទូរគមនាគមន៍ ក្រោមសមុទ្រមួយដែលផ្តល់ ហិរញ្ញប្បទានដោយប្រទេសអូស្រ្តាលី ជប៉ុន និងសហរដ្ឋអាមេរិកក្នុងគម្រោងទឹកប្រាក់ ៣០លានដុល្លារ យោងតាមការចេញផ្សាយ ពីគេហទំព័រជប៉ុនធូដេ។
រដ្ឋមន្រ្តីក្រសួងការបរទេសលោកស្រី Marise Payne បាននិយាយនៅក្នុង សេចក្តីថ្លែងការណ៍មួយថា នេះគឺជាគម្រោងទីមួយដែលផ្តល់ ហិរញ្ញប្បទានក្រោមភាពជាដៃគូ វិនិយោគហេដ្ឋារចនាសម្ព័ន្ធ នៅក្នុងតំបន់ក្នុងចំណោមប្រទេសទាំង៣។ លោកស្រីបានបន្ថែមថា យើងមានសេចក្តីរីករាយ ដែលបានធ្វើការជាមួយប្រទេសជប៉ុន និងសហរដ្ឋអាមេរិកដើម្បីគាំទ្រចក្ខុវិស័យរបស់ Palau ដើម្បីពង្រឹងការភ្ជាប់អ៊ីធើណេត ពិភពលោករបស់ខ្លួន ។
សេចក្តីថ្លែងការណ៍បាននិយាយថា ខ្សែកាបនេះនឹងភ្ជាប់ទីក្រុង Palau ទៅនឹងខ្សែថ្មីមួយដែល លាតសន្ធឹងក្នុងតំបន់ឥណ្ឌូ-ប៉ាស៊ីហ្វិក ពីសិង្ហបុរីទៅឆ្នេរសមុទ្រភាគខាងលិច នៃសហរដ្ឋអាមេរិក។
អូស្រ្តាលីបានបង្កើនការ ចូលរួមនៅក្នុងតំបន់កោះប៉ាស៊ីហ្វិក ចំពេលមានការព្រួយបារម្ភ អំពីឥទ្ធិពលរបស់ចិនកំពុង កើនឡើងហើយភាពជាដៃគូ វិនិយោគហេដ្ឋារចនាសម្ព័ន្ធ របស់ប្រទេសទាំង៣ ត្រូវបានគេមើលឃើញថា ជាការផ្តល់ជម្រើសមួយសម្រាប់ ការផ្តល់មូលនិធិរបស់ចិន។
លោកស្រី Payne បានអះអាងថា ថ្មីៗនេះប្រទេសអូស្ត្រាលីបាន បើកស្ថានទូតលើកដំបូងរបស់ខ្លួននៅ Palau ជាផ្នែកមួយនៃកម្មវិធី Pacific Step-Up របស់ខ្លួន។ អូស្រ្តាលីនឹងចូលរួមវិភាគទានចំនួន ១០ លានដុល្លារដល់គម្រោងខ្សែកាបផាឡៅ រួមទាំងប្រាក់កម្ចីសាងសង់ ៩ លានដុល្លារ។
ប្រទេសនេះបានផ្តល់ជំនួយ ១,៤៤ ពាន់លានដុល្លារអូស្រ្តាលី (១ ពាន់លានដុល្លារ) ដល់តំបន់ក្នុងឆ្នាំ ២០២០-២១ ក៏ដូចជា ២ ពាន់លានដុល្លារអូស្ត្រាលី តាមរយៈមូលនិធិវិនិយោគហេដ្ឋារចនាសម្ព័ន្ធ។ នៅឆ្នាំ ២០១៨ អូស្រ្តាលីបានយល់ព្រម ផ្តល់ថវិកាសម្រាប់ការកសាង ប្រព័ន្ធខ្សែកាបសមុទ្រផ្កាថ្មសម្រាប់កោះ Solomon និង Papua New Guinea៕
ដោយ៖ លី ភីលីព
