កូរ៉ ៖ ក្រុមហ៊ុន Kia Corp ជាក្រុមហ៊ុន ផលិតរថយន្តធំទី២ របស់កូរ៉េខាងត្បូងបាននិយាយថា ខ្លួននឹងលក់តែរថយន្តអគ្គិសនីនៅទ្វីបអឺរ៉ុប ចាប់ពីឆ្នាំ២០៣៥ និងលើទីផ្សារសំខាន់ៗផ្សេងទៀត ចាប់ពីឆ្នាំ២០៤០ ខណៈខ្លួនកំពុងស្វែង រកការបញ្ឈប់ជាបណ្តើរៗ នូវរថយន្តម៉ាស៊ីនចំហេះខាងក្នុង លើទីផ្សារពិភពលោក យោងតាមការចេញ ផ្សាយពីគេហទំព័រ The Korea Herald កូរ៉េខាងត្បូង ។
ក្រុមហ៊ុន Kia បានប្រកាសពីយុទ្ធសាស្ត្រ អព្យាក្រឹត ភាព កាបូន ២០៤៥ ខណៈរដ្ឋាភិបាល ជុំវិញពិភពលោក កំពុងអនុវត្តគោល នយោបាយកាន់តែខ្លាំងក្លា ដើម្បីប្រយុទ្ធប្រឆាំង នឹងការប្រែប្រួលអាកាសធាតុ ហើយក្រុមហ៊ុនផលិតរថយន្តកំពុង បង្កើនកិច្ចខិតខំប្រឹងប្រែង ដើម្បីផ្លាស់ប្តូរឆ្ងាយពីឥន្ធនៈហ្វូស៊ីល ។
ក្រុមហ៊ុនបាននិយាយ នៅក្នុងសេចក្តីថ្លែងការណ៍មួយថា នៅក្រោមយុទ្ធសាស្រ្តនេះ ក្រុមហ៊ុន Kia មានគោលបំណង កាត់បន្ថយការបំភាយ កាបូនរបស់ខ្លួន ៩៧ ភាគរយ ពីកម្រិត ២០១៩ ត្រឹមឆ្នាំ ២០៤៥ និងសម្រេចបាននូវការបំភាយសូន្យ សុទ្ធនៅទូទាំងខ្សែ សង្វាក់តម្លៃរបស់ខ្លួន ចាប់ពីផលិតកម្ម រហូតដល់ការដឹកជញ្ជូន និងការចោលកាកសំណល់ ។
ក្រុមហ៊ុនមានបំណងជំនួស ថាមពលឥន្ធនៈហ្វូស៊ីល ជាមួយនឹងថាមពលកកើតឡើង វិញ ដើម្បីបំពេញតម្រូវការ ថាមពលក្នុងរោងចក្ររបស់ខ្លួន នៅបរទេសនៅឆ្នាំ ២០៣០ និងប្រទេសកូរ៉េខាងត្បូង នៅឆ្នាំ២០៤០ ។ ដូច្នេះហើយ ក្រុមហ៊ុននឹងបង្កើតប្រព័ន្ធ ផលិតថាមពលពន្លឺព្រះអាទិត្យ នៅក្នុងរោងចក្ររបស់ខ្លួននៅក្នុងប្រទេសកូរ៉េ សហរដ្ឋអាមេរិក ចិន និង ឥណ្ឌា ។
ដោយឡែកក្រុមហ៊ុនផលិត រថយន្ត K5 sedan និង Sorento SUV បានបង្ហាញរូបភាព នៃគំនិត EV9 ដែលប្រើថាមពលអគ្គីសនីទាំងអស់ ជាម៉ូដែលទី២ របស់វាបានបង្កប់ជាមួយនឹងវេទិកា ម៉ូឌុលអគ្គិសនីសកលតែមួយគត់ (E-GMP) របស់ក្រុមហ៊ុន Hyundai Motor Group បន្ទាប់ពីរថយន្ត EV6 sedan ។
ក្រុមហ៊ុន Kia គ្រោងនឹងបង្កើត ត្រកូល EV របស់ខ្លួនជាមួយនឹងម៉ូដែល១១ រួមទាំងម៉ូដែល E-GMP ចំនួន ៧ នៅឆ្នាំ២០២៥ ។ ជាមួយនឹងការពង្រឹងក្រុម EV របស់ខ្លួន វាមានគោលបំណង សម្រេចបានចំណែក ៦,៦ ភាគរយនៃទីផ្សារ EV ថាមពលថ្មសកលនៅឆ្នាំ ២០២៥ និងការលក់ប្រចាំ ឆ្នាំជាសកលចំនួន ៥០០,០០០គ្រឿងនៅឆ្នាំ២០២៦ ៕ដោយ៖លី ភីលីព
