យេរ៉ូសាឡឹម៖ ក្រសួងការពារជាតិអ៊ីស្រាអែល បានប្រកាសថា អ៊ីស្រាអែល និងសហរដ្ឋអាមេរិក បានបញ្ចប់ការសាកល្បង ហោះហើរដោយជោគជ័យ នូវឧបករណ៍ស្ទាក់ចាប់មីស៊ីលផ្លោង Arrow-3 នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ ។
ក្រសួងបានឲ្យដឹងនៅក្នុងសេចក្តីថ្លែងការណ៍មួយថា នៅឯកន្លែងសាកល្បងមួយ នៅកណ្តាលប្រទេសអ៊ីស្រាអែល ឧបករណ៍ស្ទាក់ចាប់មីស៊ីលផ្លោង បានរកឃើញ និងបំផ្លាញគោលដៅមួយ នៅក្នុងលំហអាកាសយ៉ាងមានប្រសិទ្ធភាព។
សេចក្តីថ្លែងការណ៍បានឲ្យដឹងថា ការបញ្ចប់ការធ្វើតេស្តនេះគឺជា “ព្រឹត្តិការណ៍ដ៏សំខាន់មួយ” សម្រាប់អ៊ីស្រាអែល ដើម្បីការពារខ្លួន ប្រឆាំងនឹងការគំរាមកំហែង ដែលមានស្រាប់ និងការវិវត្តនៅក្នុងតំបន់។
រដ្ឋមន្ត្រីការពារជាតិអ៊ីស្រាអែល លោក Benny Gantz បានសរសើរការសាកល្បង សម្រាប់ “បំពាក់រដ្ឋអ៊ីស្រាអែល ជាមួយនឹងសមត្ថភាព ការពារខ្លួនប្រឆាំងនឹងការគំរាមកំហែង ដែលកំពុងរីកចម្រើន” ដោយបន្ថែមប្រព័ន្ធ Arrow-3 “ផ្តល់ឱ្យអ៊ីស្រាអែល នូវសេរីភាព ក្នុងការធ្វើយុទ្ធសាស្ត្របន្ថែមទៀត” ។
នាយកទីភ្នាក់ងារការពារមីស៊ីលអាមេរិក (MDA) លោក Jon Hill បានឲ្យដឹងនៅក្នុងសេចក្តីថ្លែងការណ៍ថា ការសាកល្បងនេះ ត្រូវបានរចនាឡើងដើម្បី “ប្រកួតប្រជែងគ្រប់ធាតុនៃប្រព័ន្ធអាវុធ ហើយវាដំណើរការ បានយ៉ាងមានប្រសិទ្ធភាព” ។
លោក Hill បានបន្ថែមថា MDA នៅតែប្តេជ្ញាជួយអ៊ីស្រាអែល ក្នុងការធ្វើឱ្យប្រសើរឡើង នូវសមត្ថភាពការពារមីស៊ីលរបស់ខ្លួន។ ប្រព័ន្ធអាវុធ Arrow-3 គឺជាផ្នែកមួយនៃប្រព័ន្ធការពារ ពហុស្រទាប់របស់អ៊ីស្រាអែល ដែលរួមមាន Iron Dome ប្រព័ន្ធដែលមានគោលបំណងស្ទាក់ចាប់គ្រាប់រ៉ុក្កែត រយៈចម្ងាយខ្លីពីតំបន់ហ្គាហ្សា ប្រព័ន្ធការពារកាំជ្រួចរយៈចម្ងាយមធ្យម និងរយៈចម្ងាយឆ្ងាយ និងប្រព័ន្ធការពារមីស៊ីលរយៈចម្ងាយឆ្ងាយ ដោយប្រព័ន្ធ Arrow-3 ៕ ដោយ ឈូក បូរ៉ា
