បរទេស៖ ក្រុមហ៊ុន Neuralink ដែលជាក្រុមហ៊ុនផ្សាំខួរក្បាលរបស់មហាសេដ្ឋី Elon Musk ដែលសង្ឃឹមថា នឹងប្រើប្រាស់បច្ចេកវិទ្យា របស់ខ្លួនដើម្បីព្យាបាលស្ថានភាពដូចជា ខ្វិន និងពិការភ្នែក ត្រូវបានអនុញ្ញាតឱ្យធ្វើការសាកល្បងលើមនុស្ស បន្ទាប់ពីក្រុមហ៊ុនបានទទួលការយល់ព្រមពីរដ្ឋបាលចំណីអាហារ និងឱសថសហរដ្ឋអាមេរិក (FDA) ដែលជាក្រុមហ៊ុនបានប្រកាសកាលពីថ្ងៃព្រហស្បតិ៍។
យោងតាមសារព័ត៌មាន RT ចេញផ្សាយកាលពីថ្ងៃទី២៦ ខែឧសភា ឆ្នាំ២០២៣ បានឱ្យដឹងថា ក្រុមហ៊ុន Neuralink បាននិយាយនៅលើ Twitter ថា “យើងមានការរំភើបក្នុងការចែករំលែកថា យើងបានទទួលការយល់ព្រមពី FDA ដើម្បីចាប់ផ្តើមការសិក្សាលើមនុស្សជាលើកដំបូងរបស់យើង” ។
លោក Musk បានព្យាករណ៍ក្នុងឱកាសមុនជាច្រើនដែលបច្ចេកវិទ្យានេះនឹងត្រូវបានអនុញ្ញាត សម្រាប់ការធ្វើតេស្ត ប៉ុន្តែកម្មវិធីពីមុននៅដើមឆ្នាំ ២០២២ ត្រូវបានបដិសេធដោយ FDA អ្នកវិទ្យាសាស្ត្រ ដែលធ្វើការលើគម្រោងនេះបានប្រាប់រ៉យទ័រកាលពីខែមីនា។
ក្រុមហ៊ុនបាននិយាយថា ការអនុម័តនេះគឺជា “ជំហានដំបូងដ៏សំខាន់ដែលនឹងអនុញ្ញាតឱ្យបច្ចេកវិទ្យារបស់យើងជួយមនុស្សជាច្រើន” ហើយជា “លទ្ធផលនៃការងារមិនគួរឱ្យជឿដោយក្រុម Neuralink ក្នុងកិច្ចសហការយ៉ាងជិតស្និទ្ធជាមួយ FDA” ។
លោក Elon Musk បាននិយាយពីមុនថា មហិច្ឆតារបស់លោកគឺសម្រាប់ Neuralink ដើម្បី “ស្តារមុខងាររាងកាយពេញលេញឡើងវិញ ចំពោះអ្នកដែលមានខួរឆ្អឹងខ្នងធ្ងន់ធ្ងរ” ។
Neuralink និយាយថា ខ្លួនមិនទាន់មានផែនការដើម្បីចាប់ផ្តើម ជ្រើសរើសអ្នកចូលរួមសាកល្បងទេ ខណៈដែល FDA មិនទាន់បានធ្វើអត្ថាធិប្បាយជាផ្លូវការលើការសម្រេចចិត្ត របស់ខ្លួនក្នុងការអនុម័តបច្ចេកវិទ្យាសម្រាប់ការធ្វើតេស្តមនុស្ស។
កាលពីឆ្នាំមុន លោក Musk បាននិយាយថា លោកមានទំនុកចិត្តយ៉ាងខ្លាំងលើសុវត្ថិភាពរបស់ឧបករណ៍នេះ ដែលគាត់នឹងសុខចិត្តបញ្ចូលបន្ទះឈីប ទៅក្នុងខួរក្បាលរបស់កូនៗរបស់គាត់។
គំរូដើមនៃការផ្សាំរបស់ Neuralink ដែលមានទំហំប៉ុនកាក់ខ្នាតកណ្តាល រហូតមកដល់ពេលនេះ ត្រូវបានគេដាក់ចូលទៅក្នុងលលាដ៍ក្បាលរបស់សត្វស្វា ដែលក្រុមហ៊ុនបានបង្ហាញ។
ឧបករណ៍ផ្សាំចុះឈ្មោះសកម្មភាពសរសៃប្រសាទ និងបញ្ជូនព័ត៌មានទៅកាន់ឧបករណ៍ខាងក្រៅ ដូចជាស្មាតហ្វូន ដោយប្រើការភ្ជាប់ប៊្លូធូស៕ ប្រែសម្រួលៈ ណៃ តុលា
