អាមេរិក ៖ ក្រុមហ៊ុនវិនិយោគ Fidelity បាននិយាយលើរបាយការណ៍ថ្មីមួយក្នុងសប្តាហ៍នេះថា បណ្តាញសផ្សព្វផ្សាយសង្គមយក្សអាមេរិក Twitter បានបាត់បង់តម្លៃ ២៩ ពាន់លានដុល្លារចាប់តាំងពីវាត្រូវបានទិញ កាលពីចុងឆ្នាំមុនដោយមហាសេដ្ឋីបច្ចេកវិទ្យាលោក Elon Musk នេះយោងតាមការចេញផ្សាយពីគេហទំព័រ MSN ។
យោងតាមរបាយការណ៍ថ្មីមួយបានឲ្យដឹងថា ការវិនិយោគចំនួន ២៥ ពាន់លានដុល្លាររបស់មហាសេដ្ឋីបច្ចេកវិទ្យា លោក Elon Musk នៅលើ Twitter ស្ទើរតែបាត់បង់ទាំងស្រុង ខណៈគេហទំព័រប្រព័ន្ធផ្សព្វផ្សាយសង្គមបានជួបការលំបាក សម្រាប់ការទទួលបានហិរញ្ញវត្ថុ ក្នុងរយៈពេលជាច្រើនខែចាប់តាំងពីលោកបានទិញវា នៃការលក់ឯកជន។
ក្នុងសប្តាហ៍នេះ ក្រុមហ៊ុនវិនិយោគ Fidelity បាននិយាយថា Twitter មានតម្លៃប្រហែល ១៥ ពាន់លានដុល្លារ ប្រហែលមួយភាគបីនៃ ៤៤ ពាន់លានដុល្លាររបស់លោកMusk ហើយសហវិនិយោគិនរបស់លោកបានចំណាយ ដើម្បីទទួលបានវេទិកាប្រព័ន្ធ ផ្សព្វផ្សាយសង្គមនៅចុងខែតុលា។
ទីភ្នាក់ងារព័ត៌មានហិរញ្ញវត្ថុ Bloomberg បាននិយាយថា ក្នុងចំណោមទឹកប្រាក់ ៤៤ ពាន់លានដុល្លារនោះរបស់លោក Musk ខ្លួនលោកផ្ទាល់បានដាក់ប្រាក់ចំនួន ២៥ ពាន់លានដុល្លារក្នុងការផ្តល់ហិរញ្ញប្បទានបំណុល ដើម្បីទទួលបានវេទិកានេះ។
ការវិនិយោគឥឡូវនេះមានតម្លៃប្រហែល ៨,៨ ពាន់លានដុល្លារ។
លោក Musk កាន់កាប់ ៧៩ ភាគរយនៃ Twitter និងជានាយកប្រតិបត្តិ នៃវេទិកាជាតួនាទីដែលលោកមានបំណងដាក់រាជ្យភ្លាមៗ បន្ទាប់ពីជួលប្រធានផ្នែកផ្សាយពាណិជ្ជកម្ម NBC Linda Yaccarino ឲ្យធ្វើជានាយកប្រតិបត្តិថ្មីរបស់ក្រុមហ៊ុន៕
