ឥណ្ឌា ៖ Economic Times បានរាយការណ៍កាលពីថ្ងៃចន្ទថា ផ្កាយរណបចារកម្មឥណ្ឌា ដែលផលិតក្នុងស្រុក កំពុងត្រូវបានបញ្ជូនទៅកាន់រដ្ឋផ្លរីដា ដើម្បីបាញ់បង្ហោះពីរោងចក្រ SpaceX ដែលគ្រប់គ្រង ដោយលោក Elon Musk នៅខែមេសានេះ ចំពោះយានអវកាសនេះ នឹងជួយយោធាទទួលបានទិន្នន័យ អំពីចលនានៅតាមព្រំដែន ជាមួយប្រទេសចិន និងប៉ាគីស្ថាន ។
ផ្កាយរណបត្រូវបានសាងសង់ ដោយកងការពាររបស់ក្រុមហ៊ុន Tata Group – Tata Advanced Systems Limited (TASL) នឹងដំណើរការពីទីក្រុង Bengaluru ក្នុងរដ្ឋ Karnataka ភាគខាងត្បូងប្រទេសឥណ្ឌា ដែលធ្វើឲ្យប្រទេស នេះ រក្សាការសម្ងាត់នៃប្រតិបត្តិការ មជ្ឈមណ្ឌលត្រួតពិនិត្យ នឹងដឹកនាំផ្លូវរបស់ផ្កាយរណប ដើម្បីត្រួតពិនិត្យហេដ្ឋា រចនាសម្ព័ន្ធ និងទទួលបានគោលដៅយោធា ។
របាយការណ៍បានកត់សម្គាល់ថា បើទោះបីជាមានផ្កាយរណបកម្រិត អនុម៉ែត្រក៏ដោយ ក៏ប្រជាជាតិអាស៊ីខាងត្បូង បានពឹងផ្អែកលើទិន្នន័យស៊ើបការណ៍ សម្ងាត់ពីប្រទេសបរទេសដូចជាអាមេរិក ។ ទីភ្នាក់ងារនេះបាននិយាយថា ការងារនៅលើផ្កាយរណប ត្រូវបានបញ្ចប់កាលពីសប្តាហ៍មុន ហើយវាត្រូវបានបញ្ជូន ទៅសហរដ្ឋអាមេរិក សម្រាប់ការរៀបចំមុនពេលបាញ់បង្ហោះ។
រោងចក្រ TATA នៅ Bengaluru ជាកន្លែងដែលឧបករណ៍នេះត្រូវបានសាងសង់ ត្រូវបានគេជឿថាមានសមត្ថភាពផលិតផ្កាយរណបចំនួន ២៥ គ្រឿងក្នុងមួយឆ្នាំ។ កាលពីថ្ងៃចន្ទ ក្រុមហ៊ុនបានចុះហត្ថលេខាលើកិច្ចព្រមព្រៀង មួយជាមួយរដ្ឋាភិបាលក្រុង Karnataka សម្រាប់ការវិនិយោគបន្ថែមទៀត ក្នុងវិស័យអវកាស និងវិស័យការពារជាតិ ។
ឥណ្ឌាបានបង្កើនការទិញរូបភាព ផ្កាយរណបពីបរទេស នាពេលថ្មីៗនេះ ជាពិសេស ដោយសារតែភាពតានតឹង ជាមួយប្រទេសចិននៅតាមព្រំដែន ភាគខាងកើតរបស់ខ្លួន ។ របាយការណ៍នេះបានកត់សម្គាល់ថា នៅពេលផ្កាយរណបផ្ទាល់ខ្លួនរបស់ឥណ្ឌា ស្ថិតនៅក្នុងគន្លងតារាវិថី ការបញ្ជាទិញសម្រាប់រូបភាព ទំនងជាត្រូវបានដាក់បញ្ចូលដោយប្រទេសជាមិត្ត ហើយTASL ត្រូវបានទាក់ទងសម្រាប់ការបញ្ជាទិញរួចហើយ។
កាលពីខែធ្នូកន្លងទៅ ប្រធានអង្គការស្រាវជ្រាវអវកាសឥណ្ឌា លោកស្រី Sreedhara Panicker Somanath បាននិយាយថា ប្រទេសនេះកំពុងរៀបចំ ផែនការបាញ់បង្ហោះផ្កាយរណបតាមគន្លងផ្សេងៗគ្នា ដើម្បីតាមដានចលនារបស់កងទ័ព និងថតរូបចម្ងាយ រាប់ពាន់គីឡូម៉ែត្រតាមព្រំដែនជាមួយប្រទេសចិន និងប៉ាគីស្ថាន ។
បើតាមលោកស្រី Somanath បានបន្ថែមថា ប្រទេសឥណ្ឌាត្រូវការផ្កាយរណប ១០ ដងច្រើនជាងផ្កាយរណបចំនួន៥៤ ដែលខ្លួនមាននៅពេលនេះ ដើម្បីក្លាយជាប្រទេសខ្លាំង ។ ប្រទេសនេះបានកំណត់ រចនាសម្ព័ន្ធផ្កាយរណបចំនួន ៥០ ទៀតសម្រាប់ការអភិវឌ្ឍ សមត្ថភាពស៊ើបការណ៍ ភូមិសាស្ត្រអាចនឹងត្រូវបាញ់បង្ហោះក្នុងរយៈពេល ៥ ឆ្នាំខាងមុខនេះ ៕
ដោយ៖លី ភីលីព
