ខ្សែប្រយុទ្ធ Kylian Mbappe បានផ្លាស់ទៅកាន់ក្លឹប Real Madrid ជាផ្លូវការនៅក្នុងថ្ងៃនេះ។ បើយោងតាមការចុះផ្សាយរបស់ក្លឹបនេះផ្ទាល់។
កីឡាករនេះ និង Real បានធ្វើការចរចាត្រូវរ៉ូវគ្នាដោយចុះកុងត្រាក្នុងរយៈពេល៥ឆ្នាំ ចាប់ពីរដូវកាលឆ្នាំ២០២៤/២៥ រហូតដល់ថ្ងៃទី៣០ ខែមិថុនា ឆ្នាំ២០២៩។
ខាង Real Madrid បានធ្វើការផ្ដល់ឲ្យ Mbappe នូវប្រាក់ពលកម្មក្នុងមួយឆ្នាំរហូតទៅដល់ ១៥លានអ៊ឺរ៉ូ ជាមួយនឹងប្រាក់ឧបត្ថម្ភមកក្លឹបនេះ (Sign On Bonus) រហូតទៅដល់ ១៥០លានអ៊ឺរ៉ូ ហើយគេអាចយកកម្រៃពីសិទ្ធិលក់រូបភាពរបស់គេពេញសិទ្ធិ។
ប្រាក់ពលកម្មទំហំនេះបានធ្វើឲ្យ Mbappe បានក្លាយជាកីឡាករទី៧ ដែលទទួលបានប្រាក់ពលកម្មខ្ពស់ជាងគេនៅ Real Madrid។
យ៉ាងណាបើប្រៀបធៀបនឹងប្រាក់ពលកម្ម និងប្រាក់នានានៅ PSG ខ្សែប្រយុទ្ធរូបនេះទទួលបានប្រាក់កម្រៃទាបជាងច្រើន។ បើយោងតាម Fabrizio Romano បន្ទាប់ពីបន្តកុងត្រាថ្មីជាមួយ PSG កាលពីឆ្នាំ២០២២ កីឡាករនេះបានទទួលបានប្រាក់ពី PSG ប្រមាណ ២០០លានអ៊ឺរ៉ូក្នុងឆ្នាំ។
ទោះជាបានប្រាក់ទាបជាងយ៉ាងណាក៏ដោយប៉ុន្តែ Mbappe នឹងតែសម្រេចចិត្តផ្លាស់មកកាន់ Real ដោយក្លឹប Real Madrid នេះជាក្លឹបមួយដែល Mbappe ចង់មកលេងឲ្យរហូតមកតាំងពីកុមារភាព។
Real បានយក Mbappe ពី PSG ដោយ Free Transfer ព្រោះតែកីឡាករនេះមិនព្រមតកុងត្រាជាមួយក្លឹបបារាំងនេះ។
Mbappe បានមកលេងឲ្យ PSG តាំងពីឆ្នាំ២០១៧មក ដោយចូលលេងបាន ៣០៨ប្រកួត និងស៊ុតចូល ២៥៦គ្រាប់៕
ប្រភព៖ sabay
