ឥណ្ឌា៖ ប៉ុន្មានថ្ងៃបន្ទាប់ពីបេសកកម្មភពព្រះច័ន្ទយានអវកាស Chandrayaan-3 របស់ប្រទេសឥណ្ឌាបានបញ្ចប់បេសកកម្ម និងបានចុះចតនៅលើប៉ូលខាងត្បូងរបស់ព្រះច័ន្ទ ការសិក្សាថ្មីមួយនៅលើផែនដីបានរកឃើញថា ភពផែនដីរបស់យើងអាចជួយផ្កាយរណបរបស់វាទទួលបានទឹក យោងតាមការចេញផ្សាយពីគេហទំព័រ RT។
ការស្រាវជ្រាវទើបតែចេញផ្សាយដោយសាកលវិទ្យាល័យ Hawaii នៅ Manoa (UH Manoa) គឺផ្អែកលើទិន្នន័យពីបេសកកម្មព្រះច័ន្ទដំបូងរបស់ប្រទេសឥណ្ឌាកាលខែតុលាឆ្នាំ ២០០៨ ។ ក្រុមអ្នកវិទ្យាសាស្ត្រដែលវិភាគទិន្នន័យឧបករណ៍ចាប់សញ្ញាពីចម្ងាយពីបេសកកម្មព្រះច័ន្ទ Chandrayaan-1 បានរកឃើញថា អ៊ីដ្រូសែន និងអ៊ីយ៉ុងអុកស៊ីហ៊្សែនពីសន្លឹកប្លាស្មារបស់ផែនដីអាចរួមបញ្ចូលគ្នាដើម្បីបង្កើតជាម៉ូលេគុលទឹកនៅលើផ្ទៃព្រះច័ន្ទ។
លោក Shuai Li ជំនួយការអ្នកស្រាវជ្រាវនៅសាលា UH Manoa នៃមហាសមុទ្រ និងផែនដីវិទ្យា និងបច្ចេកវិទ្យា បានធ្វើការវិភាគទិន្នន័យដែលប្រមូលបានដោយឧបករណ៍ Moon Mineralogy Mapper របស់ប្រទេសឥណ្ឌានៅលើបេសកកម្ម Chandrayaan-1 របស់ប្រទេសឥណ្ឌាចន្លោះឆ្នាំ២០០៨ និង ២០០៩ ។
សេចក្តីថ្លែងការណ៍មួយ សាកលវិទ្យាល័យបានកត់សម្គាល់ថា លោក Li ចាប់អារម្មណ៍លើការស៊ើបអង្កេតលើការផ្លាស់ប្តូរអាកាសធាតុលើផ្ទៃ នៅពេលព្រះច័ន្ទឆ្លងកាត់ដែនម៉ាញេទិចរបស់ផែនដី ដែលជាតំបន់ការពារព្រះច័ន្ទពីខ្យល់ព្រះអាទិត្យ ប៉ុន្តែមិនមែន Photons របស់ព្រះអាទិត្យនោះទេ។
លោក Li ដូចដែលបានដកស្រង់ដោយ UH Manoa បានពន្យល់ថា នេះផ្តល់នូវមន្ទីរពិសោធន៍ធម្មជាតិសម្រាប់សិក្សាដំណើរការនៃការបង្កើតទឹកលើផ្ទៃព្រះច័ន្ទ។ នៅពេលព្រះច័ន្ទស្ថិតនៅខាងក្រៅនៃ ដែនម៉ាញេទិចផ្ទៃព្រះច័ន្ទត្រូវបានបំផ្ទុះដោយខ្យល់ព្រះអាទិត្យ។ នៅខាងក្នុងដែនម៉ាញេទិចស្ទើរតែគ្មានប្រូតុងនៃខ្យល់ព្រះអាទិត្យ ហើយការបង្កើតទឹកត្រូវបានគេរំពឹងថា នឹងធ្លាក់ចុះដល់ជិតសូន្យ៕ ដោយ៖លី ភីលីព
