ម៉ិកស៊ីកូ៖ រដ្ឋាភិបាលម៉ិកស៊ិកបានឲ្យដឹងថា ចំនួនអ្នកស្លាប់ដោយសារខ្យល់ព្យុះ Otis បានកើនឡើងដល់ ៣៩នាក់នៅក្នុងរដ្ឋ Guerrero ភាគខាងត្បូងប្រទេសម៉ិកស៊ិក ហើយមនុស្ស ១០ នាក់ត្រូវបានរាយការណ៍ថា បាននឹងកំពុងបាត់ខ្លួន។
ហេដ្ឋារចនាសម្ព័ន្ធសណ្ឋាគារ ប្រហែល ៨០ ភាគរយត្រូវបានប៉ាន់ ប្រមាណថា ត្រូវបានខូចខាត ហើយសេវាកម្មសំខាន់ៗ ត្រូវបានកាត់ផ្តាច់ ។ គណៈកម្មការអគ្គិសនីសហព័ន្ធបានឲ្យដឹងថា អគ្គិសនីត្រូវបានស្ដារដល់អតិថិជនប្រហែល ៥៥ ភាគរយ។
ព្យុះកំបុតត្បូង Otis បានវាយប្រហារឆ្នេរសមុទ្រ Guerrero កាលពីថ្ងៃពុធជាព្យុះប្រភេទទី០៥ នៅលើមាត្រដ្ឋាន Saffir-Simpson ដែលបន្សល់ទុកនូវការខូចខាត យ៉ាង មហន្តរាយនៅពេលវាកើតឡើង ជាចម្បងនៅក្នុងរមណីយដ្ឋាន ទេសចរណ៍ដ៏ពេញនិយម Acapulco ។
ប្រធានាធិបតីម៉ិកស៊ិក លោក Andres Manuel Lopez Obrador បានលើកឡើងថា “យើងនឹងជួយប្រជាជនទាំងអស់នៃ Acapulco មនុស្សគ្រប់គ្នាដែលរងផលប៉ះពាល់ ហើយយើងនឹងស្ដារ Acapulco ឡើងវិញ។ នោះគឺជាការសន្យារបស់ខ្ញុំ” ៕
ប្រែសម្រួល ឈូក បូរ៉ា
