វ៉ាស៊ីនតោន៖ អតីតប្រធានាធិបតីអាមេរិក លោក ដូណាល់ ត្រាំ ដែលជាបេក្ខភាពប្រធានាធិបតី មកពីគណបក្សសាធារណរដ្ឋ នៅព្រឹកថ្ងៃអាទិត្យ បានជំរុញប្រជាជនអាមេរិក ឱ្យឈររួបរួមគ្នា និងមិនអនុញ្ញាតឱ្យ “អំពើអាក្រក់ឈ្នះ” ត្រឹមតែប៉ុន្មានម៉ោងប៉ុណ្ណោះ បន្ទាប់ពីរួចផុតពីការប៉ុនប៉ងធ្វើឃាត នៅឯការជួបជុំមួយក្នុងទីក្រុងButler រដ្ឋ Pennsylvania។
លោក ត្រាំ បានឲ្យដឹងនៅក្នុងការបង្ហោះនៅលើវេទិកាប្រព័ន្ធផ្សព្វផ្សាយសង្គម Truth Social របស់លោកថា “យើងនឹងមិនភ័យខ្លាចនោះទេ ប៉ុន្តែផ្ទុយទៅវិញនៅតែមានភាពធន់នឹងសេចក្តីជំនឿរបស់យើង និងរឹងប៉ឹង ចំពោះមុខអំពើអាក្រក់” ។
លោក ត្រាំ បានលើកឡើងថា “នៅក្នុងពេលនេះ វាមានសារៈសំខាន់ជាងពេលណាៗទាំងអស់ដែលយើងឈររួមគ្នា និងបង្ហាញចរិតពិតរបស់យើងជាជនជាតិអាមេរិក នៅតែរឹងមាំ និងប្តេជ្ញាចិត្ត និងមិនអនុញ្ញាតឱ្យអំពើអាក្រក់ឈ្នះ” ។
នៅម៉ោងប្រហែល ៦ និង១២ល្ងាចនៅថ្ងៃសៅរ៍ លោក ត្រាំ ត្រូវបានប្រញាប់ប្រញាល់ ចុះពីលើឆាកនៅឯការ ប្រមូលផ្តុំគ្នាដោយភ្នាក់ងារអនុវត្តច្បាប់ជាច្រើន បន្ទាប់ពីមានសំឡេងកាំភ្លើង បានបន្លឺឡើងនៅក្នុងហ្វូងមនុស្សនាពេលនោះ។
ភ្នាក់ងារសម្ងាត់របស់សហរដ្ឋអាមេរិក បានឲ្យដឹងនៅក្នុងសេចក្តីថ្លែងការណ៍មួយ បន្ទាប់ពីឧបទ្ទវហេតុនេះថា “អ្នកបាញ់សង្ស័យម្នាក់បានបាញ់ជាច្រើន គ្រាប់ឆ្ពោះទៅកាន់ឆាកពីទីតាំងខ្ពស់ មួយនៅខាងក្រៅកន្លែងប្រមូលផ្តុំ”។
សេចក្តីថ្លែងការណ៍ក៏បានឲ្យដឹងដែរថា អ្នកទស្សនា ម្នាក់ត្រូវបានសម្លាប់ និងពីរនាក់ទៀតរងរបួសធ្ងន់ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោក ត្រាំ បានឲ្យដឹងនៅក្នុងការបង្ហោះថា លោកត្រូវបានគេបាញ់ ចំផ្នែកខាងលើ នៃត្រចៀកស្តាំរបស់ខ្ញុំ។ សេចក្តីថ្លែងការណ៍ពីយុទ្ធនាការ របស់លោកបានបញ្ជាក់ថា អតីតប្រធានាធិបតីគឺ “មិនអីកើតឡើងនោះទេ”៕
ប្រែសម្រួល ឈូក បូរ៉ា
