បរទេស ៖ យោងតាមការចេញផ្សាយរបស់ RT CNN បានរាយការណ៍ កាលពីថ្ងៃចន្ទថា រដ្ឋាភិបាលសហរដ្ឋអាមេរិក បានរឹបអូសយន្តហោះមួយគ្រឿង ដែលត្រូវបានគេរាយការណ៍ថា ប្រើប្រាស់ដោយប្រធានាធិបតី វេណេស៊ុយអេឡា Nicolas Maduro ដោយអះអាងថាវាបំពានលើការ ដាក់ទណ្ឌកម្មរបស់ទីក្រុងវ៉ាស៊ីនតោន ប្រឆាំងនឹងរដ្ឋាភិបាលទីក្រុងការ៉ាកាស។
កន្លងមកសហរដ្ឋអាមេរិក បានចោទ ប្រកាន់លោក Maduro ពីបទជួញដូរគ្រឿងញៀន ហើយបានបដិសេធ មិនទទួលស្គាល់ជ័យ ជម្នះរបស់គាត់ នៅក្នុងការបោះឆ្នោតប្រធានាធិបតី ប្រទេសវេណេស៊ុយអេឡា ពីរលើកចុងក្រោយ។
ការចាប់រឹបអូសយកយន្តហោះ របស់ប្រមុខរដ្ឋបរទេស គឺជារឿងមិនធ្លាប់មាននៅឡើយ សម្រាប់ករណីព្រហ្មទណ្ឌយើងកំពុង ផ្ញើសារយ៉ាងច្បាស់ លាស់នៅទីនេះថា គ្មាននរណា នៅពីលើច្បាប់ គ្មានអ្នកណាម្នាក់នៅពីលើការឈាន ដល់ការដាក់ ទណ្ឌកម្ម របស់សហរដ្ឋអាមេរិកនោះទេ នេះបើយោង តាមការបញ្ជាក់ ដោយមន្ត្រីក្រុងវ៉ាស៊ីនតោន ដែលមិនបញ្ចេញ ឈ្មោះបានប្រាប់ CNN ដែលបានរាយការណ៍រឿងនេះ ជាលើកដំបូងកាលពីថ្ងៃចន្ទ។
យោងតាមប្រភព CNN ដដែលបានឲ្យដឹងទៀតថា យន្តហោះនេះមានតម្លៃប្រហែល ១៣លានដុល្លារ ហើយត្រូវបានរឹបអូស ដោយសហការជាមួយអាជ្ញាធរ ប្រទេសដូម៉ានិក Dominican ។
គួរឲ្យដឹងដែរថា ភ្នាក់ងារ របស់សហរដ្ឋអាមេរិក មិនបានកំណត់អត្តសញ្ញាណ យន្តហោះនោះទេ ដោយគ្រាន់តែនិយាយថា វាត្រូវបានរឹបអូសនៅក្នុង សាធារណរដ្ឋដូមីនីក ហើយការហោះហើរ ទៅកាន់ទីក្រុងម៉ៃអាមី រដ្ឋហ្វ្លរីដាប៉ុណ្ណោះ៕
ប្រែសម្រួល៖ស៊ុនលី
