ព្រះសីហនុៈ បន្ទាប់ពីមានការវិលត្រឡប់ ពីសំណាក់អ្នកវិនិយោគដែលជាជនជាតិចិនជាបណ្តើរៗ បច្ចុប្បន្នសំណង់អគារពាណិជ្ជកម្ម ក៏ដូចជាសំណង់ខុនដូសរុបប្រមាណ២៥ភាគរយ ត្រូវបានប្រើប្រាស់ឡើងវិញ ក្រោយការទុកចោលអស់រយៈពេលជិតមួយឆ្នាំកន្លងមកនេះ។
ប្រធានមជ្ឈមណ្ឌលសិក្សាចិន នៃរាជបណ្ឌិត្យសភាកម្ពុជាលោកបណ្ឌិតគី សិរីវឌ្ឍដែលបានចុះស្រាវជ្រាវលើស្ថានភាពសេដ្ឋកិច្ច និងអចលនទ្រព្យនៅខេត្តព្រះសីហនុបានមានប្រសាសន៍ប្រាប់តាមទូរស័ព្ទនៅល្ងាចថ្ងៃទី១៦ ខែមីនា ឆ្នាំ២០២១ថា ដោយសារតែការចាកចេញរបស់ជនជាតិចិន ក្រោយរាជរដ្ឋាភិបាលកម្ពុជាប្រកាស បិទល្បែងអនឡាញ ជាពិសេសក្រោយពេលផ្ទុះឡើងនូវវិបត្តិកូវីដ១៩ តាំងពីដើមឆ្នាំ២០២០បានធ្វើឱ្យសំណង់អគារពាណិជ្ជកម្ម ខុនដូ អាផាម៉ិន និងសណ្ឋាគារជាច្រើ នលែងមានតម្រូវការប្រើប្រាស់មួយរយៈធំ ប៉ុន្តែនៅដើមឆ្នាំ២០២១នេះ គេសង្កេតឃើញមានអគារខ្លះបានចាប់ផ្តើមប្រើប្រាស់ឡើងវិញជាបណ្តើរ។
លោកបន្តថា “សំណង់អគារដែលក្នុងក្រុងព្រះសីហនុ ភាគច្រើនត្រូវបានអភិវឌ្ឍន៍ឡើងពីសំណាក់ក្រុមហ៊ុនចិន ហើយសូម្បីតែអគារដែលវិនិយោគ និងអភិវឌ្ឍន៍ពីអ្នកជំនួញក្នុងស្រុក ក៏ត្រូវបានធ្វើឡើងក្នុងគោលបំណង ជួលទៅឱ្យជនជាតិចិនផងដែរ។លោកបន្តថា “រហូតមានអ្នកខ្លះខ្ចីលុយធនាគារឯកជនយកមកសាងសង់ ប៉ុន្តែបែរជាទទួលរងនូវការខាតបង់ជាប់បំណុល ដោយសារតែគ្មានតម្រូវការ ក្រោយការចាកចេញរបស់ជនជាតិចិនប្រមាណ៩០ភាគរយកាលពីដើមឆ្នាំ២០២០” ។
លោកបណ្ឌិតបានបញ្ជាក់ថា សំណង់អគាររាប់សិបគម្រោង ត្រូវបានទុកចោលមិនមានការប្រើប្រាស់ ដោយសារតែអ្នកជួល ដែលភាគច្រើនជាជនជាតិចិន បានចាកចេញវិលទៅកាន់ប្រទេសកំណើតរបស់ខ្លួន ទាំងដែលអគារត្រូវបានជួល និងជាប់កុងត្រារាប់ឆ្នាំ។ ប៉ុន្តែអ្វីដែលជាការគួរឱ្យកត់សម្គាល់នោះ គឺចាប់តាំងពីដើមឆ្នាំ២០២១ ខណៈពេលដែលអ្នកវិនិយោគ ក៏ដូចជាអ្នកបម្រើការងារជំនាញ ដែលជាជនជាតិចិនវិលមកកាន់ក្រុងព្រះសីហនុជាបណ្ដើរៗវិញ សំណង់អគារពាណិជ្ជកម្ម ខុនដូ អាផាត និងសណ្ឋាគារសរុបប្រមាណ២៥ភាគនៃចំនួនអាគារសរុបត្រូវបានប្រើប្រាស់ឡើងវិញ។
លោកថា “បើនិយាយពីគម្រោងអគារធំៗ និងជាគម្រោងសាងសង់ថ្មី នៅក្នុងក្រុងព្រះសីហនុមានប្រមាណត្រឹម១៥ – ២០ភាគរយតែប៉ុណ្ណោះ ដែលបានបញ្ចប់ការសាងសង់ទាំងស្រុង ក្នុងនោះមានប្រមាណ៥ភាគរយ នៃចំនួនគម្រោងបញ្ចប់ការសាងសង់នៅមិនទាន់បានប្រើប្រាស់នៅឡើយនោះទេ” ។
ទោះជាយ៉ាងណាក៏ដោយ លោកបណ្ឌិតគី សិរីវឌ្ឍបានបង្ហាញពីក្ដីរំពឹងថា ក្រោយពេលដែលបញ្ហានៃការរាតត្បាតពីជំងឺកូវីដ នៅក្នុងប្រទេសកម្ពុជាត្រូវបានកាត់បន្ថយបន្ទាប់ពីការប្រើប្រាស់វ៉ាក់សាំង និងការអនុវត្តតាមវិធានការរបស់រាជរដ្ឋាភិបាលកម្ពុជា ឱ្យបានត្រឹមត្រូវ នោះកំណើននៃចំនួនអ្នកវិនិយោគ ក៏ដូចជាពលរដ្ឋចិន ដែលមកបម្រើការងារជំនាញនៅក្នុងក្រុងព្រះសីហ នុនឹងមានកំណើនឡើងវិញជាក់ជាមិនខាន ខណៈដែលគម្រោងសាងសង់ និងអភិវឌ្ឍន៍របស់ពួកគេជាច្រើន នៅមិនទាន់បានបញ្ចប់ និងដាក់លក់នៅលើទីផ្សាររួមនៅឡើយ៕ប្រភព៖propertyarea.asia
