ប្រទេសចិនៈ នៅថ្ងៃទី២៣ ខែមីនា ឆ្នាំ ២០១៦ កិច្ចប្រជុំថ្នាក់ដឹកនាំនៃកិច្ចសហប្រតិបត្តិការទន្លេឡាឆាង-មេគង្គលើកទី១ បានប្រារឰនៅក្រុងសានយ៉ា នៃខេត្តហៃណានដោយជោគជ័យ ។
ឈរលើស្មារតី “រួមគ្នាផឹកទឹកទន្លេតែមួយ ជោគវាសនាភ្ជាប់នឹងគ្នាយ៉ាងស្អិតល្មួត” អ្នកដឹកនាំនៃប្រទេសចិន កម្ពុជា ឡាវ មីយ៉ាន់ម៉ា ថៃ និងវៀតណាម បានរួមគ្នាប្រកាសចាប់ដំណើរការយន្តការ សហប្រតិបត្តិការកម្រិតអនុតំបន់បែបថ្មីនេះ ហើយបានសម្រេចជាឯកច្ឆ័ន្ទលើការកសាងសហគមន៍ វាសនារួមប្រទេសទន្លេឡានឆាង-មេគង្គ ដើម្បីដើរឆ្ពោះទៅកាន់សន្តិភាព និងវិបុលភាព ។
ក្នុងរយៈពេល ៥ ឆ្នាំកន្លងទៅនេះ កិច្ចសហប្រតិបត្តិការឡានឆាង-មេគង្គបានឆ្លងកាត់ដំណាក់កាលពូនជ្រុំ និងដំណាក់កាលលូតលាស់រហ័ស ហើយបានឈានចូលទៅក្នុងដំណាក់កាលរីកចម្រើនគ្រប់ជ្រុងជ្រោយ ដែលបានចាក់បញ្ចូលនូវ“ទឹករស់ជាកម្លាំងចលករ”ក្នុងការអភិវឌ្ឍន៍នៃប្រទេសនានា ព្រមទាំងបានបង្កើតជាគំរូសំខាន់ នៃការកសាងសហគមន៍វាសនារួមមនុស្សជាតិ ។
ទី១ នេះជារយៈកាល៥ឆ្នាំ ដែលខិតខំកសាងមូលដ្ឋានគ្រឹះ និងបង្កើនទំនុកចិត្តលើគ្នាឱ្យកាន់តែស៊ីជម្រៅ
ឯកឧត្តមស៊ី ជីនភីង ប្រធានាធិបតីចិនយកចិត្តទុកដាក់កម្រិតខ្ពស់ ដល់ទំនាក់ទំនងការទូតជាមួយប្រទេសជិតខាង ហើយធ្លាប់ជួបប្រាស្រ័យជាមួយអ្នកដឹកនាំ នៃប្រទេសទន្លេមេគង្គរាប់សិបលើក ដែលបានផ្តល់ការណែនាំ និងកំណត់ទិសដៅសម្រាប់ការពង្រឹងកិច្ចសហប្រតិបត្តិការមេត្រីភាពរវាងប្រទេសទាំង ៦ ។
ជាមួយគ្នានេះ ឯកឧត្តម លី ខឺឈាំង នាយករដ្ឋមន្ត្រីចិន បានអញ្ជើញចូលរួមកិច្ចប្រជុំថ្នាក់ដឹកនាំ នៃកិច្ចសហប្រតិបត្តិការឡានឆាង-មេគង្គជារៀងរាល់លើក ដើម្បីពិគ្រោះពិភាក្សា ជាមួយអ្នកដឹកនាំនៃប្រទេសទន្លេមេគង្គទាំង៥ អំពីការកសាងផែនទីបង្ហាញផ្លូវអភិវឌ្ឍន៍ ។ ប្រទេសទាំង ៦ ខិតខំកសាងសហគមន៍វាសនា រួមប្រទេសទន្លេឡានឆាង-មេគង្គ ដើម្បីដើរឆ្ពោះទៅកាន់សន្តិភាព និងវិបុលភាព។
សហគមន៍វាសនារួមចិន-ឡាវ ចិន-កម្ពុជា និងចិន-មីយ៉ាន់ម៉ាត្រូវបានបង្កើតឡើងជាបន្តបន្ទាប់។ យើងប្រកាន់ខ្ជាប់នូវស្មារតីខ្លួនទីពឹងខ្លួន រួមគ្នាពិគ្រោះពិភាក្សា ស្ថាបនា និងចែករំលែកគ្នា ខិតខំបង្កើតបរិយាកាស ដែលប្រកបដោយសន្តិភាព ស្ថិរភាព សាមគ្គីភាព និងការចុះសម្រុងគ្នាក្នុងតំបន់ទន្លេឡានឆាង-មេគង្គ ពួតដៃគ្នា ដើម្បីសម្រេចនូវការអភិវឌ្ឍន៍ជានិរន្តរភាព និងវិបុលភាពរួមសម្រាប់ប្រទេសទាំង៦ ។
យើងបានកំណត់ “ផែនការសកម្មភាពរយៈពេល៥ឆ្នាំ ឡានឆាង-មេគង្គ(២០១៨-២០២២)” អនុវត្តយ៉ាងសកម្មតាមផែនការសកម្មភាព លើវិស័យធនធានទឹក កសិកម្ម និងកិច្ចកាត់បន្ថយភាពក្រីក្រជារដើម ពន្លឿនការកំណត់ផែនការសហប្រតិបត្តិការ លើវិស័យអភិវឌ្ឍសេដ្ឋកិច្ចឆ្លងដែន ពង្រឹងសមត្ថភាពផលិត និងជំរុញការតភ្ជាប់គ្នា ។
លេខាធិការដ្ឋានសហប្រតិបត្តិការឡានឆាង-មេគង្គ ឬស្ថាប័នសម្របស្រួលនៃប្រទេសទាំង៦ បានធ្វើទំនាក់ទំនងជាមួយគ្នាយ៉ាងរលូន ក្រុមការងាររួមលើវិស័យអាទិភាព និងមជ្ឈមណ្ឌលផ្លាស់ប្តូរ និងសហប្រតិបត្តិការឡានឆាង-មេគង្គលើវិស័យធនធានទឹក បរិស្ថាន កសិកម្ម និងយុវជន បានអនុវត្តការងារដោយមានប្រសិទ្ធភាពខ្ពស់ ដែលបានផ្តល់យន្តការចាំបាច់ ដល់ការបង្កើនកិច្ចសហប្រតិបត្តិការលើគ្រប់វិស័យ ។
នេះជារយៈកាល៥ឆ្នាំ ដែលខិតខំប្រមូលកម្លាំង ដើម្បីបង្កើតជាឧត្តមភាព និងរួមគ្នាធ្វើការអភិវឌ្ឍន៍។ យើងបានបង្កើតរូបមន្តឡានឆាង- មេគង្គ ដែលផ្តល់អាទិភាពដល់ការអភិវឌ្ឍន៍ ធ្វើការងារជាក់ស្តែងដោយមានប្រសិទ្ធភាពខ្ពស់ និងចាត់ទុកគម្រោងជាក់ស្តែងជាគោល ខិតខំប្រឹងប្រែងដើម្បីជំរុញឱ្យការបំពេញបន្ថែមគ្នា លើវិស័យសេដ្ឋកិច្ចទៅជាកម្លាំងជំរុញគ្នាសម្រាប់ការអភិវឌ្ឍន៍។
ក្នុងរយៈពេល៥ឆ្នាំកន្លងទៅនោះ ទំហំសរុបនៃសេដ្ឋកិច្ចចិនបានកើនឡើង៤៧,៥ ភាគរយ។ ប្រទេសចិនបានទទួលសមិទ្ធផលដ៏អស្ចារ្យ ជាប្រវត្តិសាស្ត្រក្នុងការកសាងសង្គមធូរធារគ្រប់ជ្រុងជ្រោយ។
ទំហំសរុបនៃសេដ្ឋកិច្ចប្រទេសទន្លេមេគង្គទាំង៥ កើនឡើងជាង៣០% ។ ចំណែកកម្រិតអភិវឌ្ឍន៍នៃសេដ្ឋកិច្ច និងសង្គមក៏បានត្រូវលើកកម្ពស់ឥតឈប់ឈរ។
នៅឆ្នាំ២០២០ ទំហំពាណិជ្ជកម្មរវាងប្រទេសចិន និងប្រទេសទន្លេមេគង្គទាំង៥ បានឈានដល់ទៅ ៣២២១០០ លានដុល្លារអាមេរិក កើនឡើង ៦៦,៣% បើប្រៀបធៀបនឹងឆ្នាំ ២០១៥ ។ ប្រទេសចិនជាដៃគូពាណិជ្ជកម្មធំជាងគេ របស់ប្រទេសវៀតណាម កម្ពុជា មីយ៉ាន់ម៉ា និងថៃ ហើយជាដៃគូពាណិជ្ជកម្មធំទី ២ របស់ប្រទេសឡាវ។
ប្រទេសវៀតណាមបានក្លាយជាដៃគូពាណិជ្ជកម្មធំទី៤ របស់ប្រទេសចិន។ ប្រទេសចិនផ្តល់ប្រាក់ឥណទានអនុគ្រោះ និងប្រាក់ឥណទានពិសេសអំពីសមត្ថភាពផលិត និងផលិតកម្មគ្រឿងបរិក្ខារ ដើម្បីគាំទ្រឱ្យប្រទេសទន្លេមេគង្គ អនុវត្តន៍ គម្រោងសាងសង់ហេដ្ឋារចនាសម្ព័ន្ធសំខាន់ជាង៤០គម្រោង រួមមានព្រលានយន្តហោះអន្តរជាតិសៀមរាបថ្មីនៃប្រទេសកម្ពុជា គម្រោងកែសម្រួលខ្សែបណ្តាញបញ្ជូនអគ្គិសនី រដ្ឋធានីវៀងចន្ទន៍នៃប្រទេសឡាវ និងគម្រោងសាងសង់រោងចក្រ ផលិតអគ្គិសនីដើរដោយធ្យូងថ្ម យ៉ុងសៀន ប្រទេសវៀតណាមជាដើម ។
កសិផល និងជលផលល្អៗដូចជា ធូរេនថៃ អង្ករខ្មែរ ល្ហុងភូមា ចេកឡាវ និងត្រី basa វៀតណាម ត្រូវបានយកមកដាក់លើតុបាយរបស់ប្រជាជនចិន។ សហគ្រាសចិនបានទៅស្វែងរកដៃគូ សហប្រតិបត្តិការនៅប្រទេសកម្ពុជា និងឡាវ ដើម្បីបង្កើតតំបន់គំរូកសិកម្ម និងមូលដ្ឋានកែច្នៃនិងឡូជីស្ទីកអំពីផលស្រូវ កៅស៊ូ ផ្លែឈើ បន្លែបង្ការ និងសាច់សត្វចិញ្ចឹម ។
នេះជារយៈកាល៥ឆ្នាំ ដែលប្រមូលផ្តុំកម្លាំង និងពង្រឹងចំណងមិត្តភាព ។ យើងប្រកាន់ខ្ជាប់នូវទស្សនទាន ដែលចាត់ទុកប្រជាជនជាគោល ខិតខំប្រឹងប្រែង ដើម្បីជំរុញឱ្យសមិទ្ធផល នៃកិច្ចសហប្រតិបត្តិការផ្តល់ផលប្រយោជន៍ ដល់ប្រជាជននៃបណ្តាប្រទេសនានា។
នៅឆ្នាំ ២០១៩ អ្នកធ្វើដំណើរទៅមករវាងប្រទេសចិន និងប្រទេសទន្លេមេគង្គមានចំនួនជាង៥០លាននាក់ ហើយជើងហោះហើរជាប្រចាំមានចំនួនជិត៣០០០ ជើងរៀងរាល់សប្តាហ៍ ។ ក្នុងរយៈពេល៥ ឆ្នាំកន្លងទៅនោះ មាននិស្សិតជាង២ម៉ឺននាក់ ដែលមកពីប្រទេសទន្លេមេគង្គទាំង៥ បានទទួលអាហារូបករណ៍ពីរដ្ឋាភិបាលចិន ដើម្បីមកបន្តការសិក្សានៅប្រទេសចិន។ ចំណែកជនបរទេស ដែលមកធ្វើការនៅប្រទេសចិនជាង៤ម៉ឺននាក់ បានទទួលការបណ្តុះបណ្តាលក្នុងមូលដ្ឋានអប់រំ និងបណ្តុះបណ្តាលវិជ្ជាជីវៈទន្លេឡានឆាង-មេគអង្គនៅខេត្តយូណាន។
មូលនិធិពិសេស អំពីកិច្ចសហប្រតិបត្តិការឡានឆាង- មេគង្គបានគាំទ្រឱ្យអនុវត្តគម្រោងផ្តល់ផលប្រយោជន៍ ដល់ប្រជាជនជាង៥០០ គម្រោង ឧទាហរណ៍ គម្រោង“ភូមិពន្លឺព្រះអាទិត្យ” បានផ្តល់បច្ចេកទេស និងបរិក្ខារផលិតអគ្គិសនីដើរ ដោយពន្លឺព្រះអាទិត្យដល់ភូមិផ្សេងៗនៃប្រទេសកម្ពុជា និងមីយ៉ាន់ម៉ា។ គម្រោងបណ្តុះបណ្តាលបច្ចេកទេសថាមពលនុយក្លេអ៊ែរ បានផ្តល់ការបណ្តុះបណ្តាលអំពី បច្ចេកទេសស្ថានីយអគ្គិសនីនុយក្លេអ៊ែរ និងសុខាភិបាលនុយក្លេអ៊ែរ ដល់យុវជនប្រទេសវៀតណាម និងឡាវ ។
គម្រោងបណ្តុះពូជតែប្រេង បានជួយដាំដើមតែប្រេង នៅតំបន់ភ្នំនៃប្រទេសថៃ និងឡាវ ។ គម្រោងបង្កើនផលកាហ្វេ បានជួយបណ្តុះបណ្តាលកសិករដាំដើមកាហ្វេ នៃប្រទេសមីយ៉ាន់ម៉ាជាង១១,០០០នាក់ ហើយបានជំរុញឱ្យការប្រមូលផលគ្រាប់កាហ្វេ នៃប្រទេ សមីយ៉ាន់ម៉ាកើនឡើងទ្វេដង។
គម្រោង “ពឹងឆាវ” ផ្តល់ផលប្រយោជន៍ ដល់ប្រទេសឡានឆាង-មេគង្គ និងគម្រោង“ម្ជុលវិទ្យាសាស្ត្រដើរចូលប្រទេសឡានឆាង-មេគង្គ”បានជំរុញកិច្ចសហប្រតិបត្តិការពេទ្យ ចិនសែ ។ គម្រោងអភិវឌ្ឍសហគមន៍ក្រីក្រ និង“សកម្មភាពពាក់កណ្តាលមេឃឡានឆាង-មេគង្គ”ជាដើម បានជួយជំរុញការកាត់បន្ថយភាពក្រីក្រ និងការអភិវឌ្ឍបុព្វហេតុស្ត្រីនៅក្នុងតំបន់ទន្លេឡានឆាង-មេគង្គ។
នេះជារយៈកាល៥ឆ្នាំ ដែលរួមសុខទុក្ខជាមួយគ្នា និងជួយយកអាសាគ្នាទៅវិញទៅមក ។ កិច្ចសហប្រតិបត្តិការឡានឆាង- មេគង្គ បានបង្កើតឡើងនូវវេទិកាសហប្រតិបត្តិការធនធានទឹកទី១ ដែលមានការចូលរួមពីប្រទេសពាក់ព័ន្ធទាំង។ យើងបានរៀបចំដោយជោគជ័យ នូវកិច្ចប្រជុំថ្នាក់រដ្ឋមន្ត្រីស្តីពី កិច្ចសហប្រតិបត្តិការធនធានទឹកទន្លេឡានឆាង-មេគង្គ ហើយបានធ្វើកិច្ចសហប្រតិបត្តិការ ជាក់ស្តែងលើវិស័យទប់ទល់នឹងទឹកជំនន់ គ្រប់គ្រងគ្រោះមហន្តរាយ និងផ្សព្វផ្សាយពីបច្ចេកទេសជាដើម។
ក្នុងនាមជាប្រទេស ដែលស្ថិតនៅតាមផ្នែកខាងលើ នៃទន្លេឡានឆាង-មេគង្គ ប្រទេសចិន ខិតខំយ៉ាងពេញទំហឹង ដើម្បីធានាឱ្យមានបរិមាណទឹកហូរ សមរម្យទៅផ្នែកខាងក្រោម ហើយចាក់បង្ហូរទឹកបន្ថែមជាបន្ទាន់ តាមតម្រូវការរបស់ប្រទេសទន្លេមេគង្គ ។ ជាពិសេស តាំងពីឆ្នាំទៅរៀងមក ប្រទេសចិនចាប់ផ្តើមចែករំលែកគ្នា អំពីព័ត៌មានជលសាស្ត្រពេញមួយឆ្នាំនៃទន្លេឡានឆាង ហើយបានបង្កើតវេបសាយជាវេទិកា ចែករំលែកអំពីព័ត៌មានសហប្រតិបត្តិការធនធានទឹក ទន្លេឡានឆាង-មេគង្គ ព្រមទាំងខិតខំយ៉ាងសកម្មដើម្បីជួយប្រទេសនៅ ផ្នែកខាងក្រោមទន្លេឡានឆាង-មេគង្គទប់ទល់នឹងគ្រោះទឹកជំនន់ និងគ្រោះរាំងស្ងួត។
នៅខែកុម្ភៈឆ្នាំទៅ នៅពេលជំងឺកូវីដ-១៩ ផ្ទុះឡើង ខ្ញុំ និងរដ្ឋមន្ត្រីការបរទេសនៃប្រ ទេសទន្លេមេគង្គទាំង៥ បានចូលរួមកិច្ចប្រជុំរដ្ឋមន្ត្រីការបរទេសលើកទី៥ ដែលរៀបចំនៅក្រុងវៀងចន្ទន៍ប្រទេសឡាវ តាមផែនការដែលបានកំណត់ ។ រដ្ឋមន្ត្រីការបរទេសនៃប្រទេ សផ្សេងៗរួមគ្នា សម្តែងនូវការគាំទ្រ ចំពោះប្រទេសចិនក្នុងការប្រឆាំងនឹងជំងឺឆ្លង និងបានផ្តល់ការគាំទ្រដ៏ថ្លៃថ្លា ដល់ភាគីចិននៅខណៈពេលដ៏សំខាន់នេះ។
ប្រទេសទាំង៦បានចាត់វិធានការ ដ៏មានប្រសិទ្ធភាព ដើម្បីគ្រប់គ្រងការរាតត្បាតនៃជំងឺឆ្លង។ ករណីកើតជំងឺកូវីដ-១៩ និងអត្រាកើតជំងឺនៅតំបន់ទន្លេឡានឆាង- មេគង្គមានកម្រិតទាបជាងតំបន់ដទៃទៀតលើពិភពលោក។ ប្រទេសទាំង ៦ ក៏បានរួមសហការគ្នា ក្នុងការប្រឆាំងនឹងបទល្មើសឆ្លងដែនដូចជា ភេរវកម្ម ល្បែងស៊ីសងតាមបណ្តាញអ៊ីនធើណេត ការបោកបញ្ឆោតតាមទូរស័ព្ទ ការជួញដូរមនុស្ស និងអន្តោប្រវេសន៍ខុសច្បាប់ជាដើម ព្រមទាំងធ្វើកិច្ចសហប្រតិបត្តិការ យ៉ាងសកម្មសម្រាប់ការពារ និងគ្រប់គ្រងគ្រោះមហន្តរាយ ផ្តល់កិច្ចធានាដល់អាយុជីវិត និងទ្រព្យសម្បត្តិរបស់ប្រជាជននៃបណ្តាប្រទេសនានា និងផ្តល់“ប្រាជ្ញាឡានឆាង-មេគង្គ”សម្រាប់កែលម្អប្រព័ន្ធអភិបាលកិច្ចក្នុងតំបន់ ។
ទី២ ការសម្រេចសមិទ្ធផលត្រូវឆ្លងការលំបាកដ៏ច្រើន ចំណែកបទពិសោធន៍កាន់ តែមានតម្លៃខ្ពស់
បើរំលឹកឡើងវិញនូវដំណើរសហប្រតិបត្តិការ ក្នុងរយៈពេល៥ឆ្នាំកន្លងទៅ យើងតែងតែចងចាំឱ្យបានច្បាស់នូវបំណងដើម និងភារកិច្ចនៃកិច្ចសហប្រតិបត្តិការឡានឆាង-មេគង្គ ភ្ជួរដីស្រែដែលមានវប្បធម៌ស្រដៀងគ្នា និងមានទំនាក់ទំនងរាប់អានគ្នា ដាំដុះផ្កាដែលរួមគ្នាធ្វើការអភិវឌ្ឍន៍ និងសហប្រតិបត្តិការឈ្នះ-ឈ្នះ ប្រមូលផលសន្តិភាព វិបុលភាព និងសុភមង្គលប្រជាជន ដោយមិនគ្រាន់តែបានផ្តល់ផលប្រយោជន៍ជាក់ស្តែងដល់ប្រជាជន នៃបណ្តាប្រទេសនានាតាមបណ្តោយ ទន្លេឡានឆាង-មេគង្គប៉ុណ្ណោះទេ ថែមទាំងបានបន្សល់នូវបទពិសោធន៍ ដ៏មានតម្លៃសម្រាប់ការពង្រឹង កិច្ចសហប្រតិបត្តិការនាពេលអនាគតទៀតផង។
អនុវត្តយ៉ាងម៉ឺងម៉ាត់ ជាបន្តតាមគោលនយោបាយ ដែលរាប់អានជាមួយអ្នកជិតខាង និងរាប់អានគ្នាដូចគ្រួសារតែមួយ ។ កិច្ចសហប្រតិបត្តិការឡានឆាង-មេគង្គបានចាក់ប្ញសយ៉ាងស៊ីជម្រៅក្នុងចំណងមិត្តភាពប្រពៃណី។ ជារៀងរហូតមក យើងបានប្រកាន់ខ្ជាប់នូវគោលការណ៍ ដែលប្រទេសមិនថាតូចធំ ខ្លាំងខ្សោយឬមានក្រ សុទ្ធតែមានភាពស្មើគ្នា ។
យើងត្រូវគិតពិចារណាអំពីគំនិតរបស់គេ ប្រកាន់ខ្ជាប់នូវការគាំទ្រឱ្យប្រទេសនានាធ្វើដំណើរតាមមាគ៌ាអភិវឌ្ឍន៍ ដែលសក្តិសមនឹងស្ថានភាពជាក់ស្តែងរបស់ខ្លួន ហើយប្រកាន់ខ្ជាប់នូវគោលការណ៍ “រឿងដែលខ្លួនឯងមិងចង់ទទួល កុំទៅបង្ខំឱ្យគេទទួល” ។ យើងរាប់អានគ្នាដោយសមភាព ជួយគ្នាទៅវិញទៅមកដោយមានចិត្តស្មោះ។ បើជួបនឹងរឿងពិបាក ត្រូវពិគ្រោះពិភាក្សាឱ្យបានច្រើន មានរឿងកើតឡើងយើងអាចពិភាក្សាគ្នាបាន ។
យើងត្រូវធ្វើតាមគោលការណ៍ តែក៏ត្រូវគិតពីមិត្តភាពរវាងគ្នាដែរ ហើយខិតខំប្រឹងប្រែងដើម្បីរួមសាមគ្គីគ្នា និងធ្វើកិច្ចសហប្រតិបត្តិការមេត្រីភាព ដើម្បីសម្រេចបាននូវសន្តិភាព ការរាប់អានគ្នា និងសុខដុមរមនា ។ “ខ្លួនឯងចង់ឈរឡើង ក៏ត្រូវជួយឱ្យគេឈរឡើង ឯខ្លួនឯងចង់លូតលាស់ ក៏ត្រូវជួយឱ្យគេលូតលាស់ដែរ” យើងត្រូវធ្វើជាអ្នកជិតខាងល្អ មិត្តល្អ ដៃគូល្អ និងបងប្អូនល្អជានិច្ចកាល។
សម្របតាមការរំពឹងទុក ដែលផ្តល់អាទិភាពដល់ការអភិវឌ្ឍន៍រួមគ្នា និងស្វែងរកវិបុលភាពរួម។ ក្នុងអនុតំបន់ទន្លេមេគង្គមានប្រជាជនក្រីក្រច្រើន មានហេដ្ឋារនាសម្ព័ន្ធមិនគ្រប់គ្រាន់ ហើយខ្វះថវិកាសម្រាប់ការអភិវឌ្ឍន៍។ ដូច្នេះយើងកំពុងប្រឈមនឹងបញ្ហាច្រើនក្នុងការអភិវឌ្ឍន៍ និងការស្វែងរកវិបុលភាពក្នុងតំបន់នេះ។ កិច្ចសហប្រតិបត្តិការឡានឆាង-មេគង្គបានចាត់ទុកការធ្វើកិច្ចសហប្រតិបត្តិការ និងការជំរុញការអភិវឌ្ឍន៍ជាភារកិច្ចចម្បង ហើយខិតខំធ្វើជា “ម៉ាស៊ីនឈូសដី” ដែលធ្វើការងារជាក់ស្តែង និងជួយបញ្ចេញសក្តានុពលអភិវឌ្ឍន៍នៃបណ្តាប្រទេសនានា។
យើងនឹងប្រើល័ក្ខខ័ណ្ឌអំណោយផល ដែលមានទីតាំងភូមិសាស្ត្រនៅជាប់គ្នា និងអាចបំពេញបន្ថែមគ្នាលើវិស័យឧស្សាហកម្ម ជំរុញការតភ្ជាប់ហេដ្ឋារចនាសម្ព័ន្ធគ្រប់ជ្រុងជ្រោយ ពង្រីកយ៉ាងសកម្មនូវការធ្វើវិនិយោគ និងពាណិជ្ជកម្មទៅវិញទៅមក កែសម្រួលបណ្តាញខ្សែសង្វាក់ផ្គត់ផ្គង់ឧស្សាហកម្មក្នុងតំបន់ ជំរុញឱ្យប្រទេសទាំង៦ បង្កើតជានិម្មាបនកម្មអភិវឌ្ឍន៍ ដែលមានលក្ខណៈគ្រប់ជ្រុងជ្រោយ មានគុណភាពខ្ពស់ និងមានកិច្ចសហការគ្នាយ៉ាងស្អិតល្មួត ព្រមទាំងជំរុញការអភិវឌ្ឍន៍រួមគ្នា ឱ្យបានកាន់តែស៊ីជម្រៅថែមទៀត បង្កើនកម្លាំងចលករ ផ្ទៃក្នុងនៃកិច្ចសហប្រតិបត្តិការ រួមគ្នាបំពេញភារកិច្ចផ្សេងៗ និងចែករំលែកផលប្រយោជន៍ជាមួយគ្នា ។
បញ្ចេញឧត្តមភាពទីតាំងភូមិសាស្ត្រ ដែលមានការរាប់អានគ្នា និងស្រដៀងគ្នាលើវិស័យវប្បធម៌ ។ ប្រទេសទន្លេឡានឆាង -មេគង្គ មានការភ្ជាប់នឹងគ្នាក្នុងប្រវត្តិសាស្ត្រដ៏យូរអង្វែង ហើយមានទំនាក់ទំនងជិតស្និទ្ធក្នុងវិស័យវប្បធម៌។ ប្រជាជននៃប្រទេសទាំង ៦ បានរាប់អានគ្នា និងទៅមករកគ្នាដូចញាតិសន្តានអ៊ីចឹង។ នេះគឺជាឧត្តមភាពពិសេសសម្រាប់ការធ្វើកិច្ចសហប្រតិបត្តិការរវាងយើងទាំងអស់គ្នា។
កិច្ចសហប្រតិបត្តិការឡានឆាង -មេគង្គ បានប្រកាន់ខ្ជាប់នូវគោលការណ៍ ដែលចាត់ទុកប្រជាជនជាគោល ផ្តល់ផលប្រយោជន៍ និងការអនុគ្រោះដល់ប្រជាជន និងធ្វើឱ្យប្រជាជនទទួលបាននូវផលប្រយោជន៍កាន់តែច្រើន និងកាន់តែរាប់អានជាមួយគ្នា។ តាមតម្រូវការជាក់ស្តែងរបស់ប្រជាជន នៃប្រទេសទន្លេឡានឆាង-មេគង្គ និងឈរលើស្មារតីអនុវត្តការងារជាក់ស្តែងដែល “ជាន់លើថ្មឱ្យមានស្នាម កាន់ដែកឱ្យមានស្នាម” បន្តបង្កើនការវិនិយោគលើវិស័យអប់រំ សុខាភិបាល កិច្ចការស្ត្រី និងកិច្ចកាត់បន្ថយភាពក្រីក្រជាដើម ខិតខំជំរុញការតភ្ជាប់ក្រអៅបេះដូង និងការតភ្ជាប់មនោសញ្ចេតនា ដើម្បីជំរុញឱ្យមានអ្នកចូលរួម អ្នកទទួលផលប្រយោជន៍ និងអ្នកគាំទ្រកាន់តែច្រើន សម្រាប់ការអភិវឌ្ឍបុព្វហេតុមិត្តភាព និងសហប្រតិបត្តិការឡានឆាង-មេគង្គ ព្រមទាំងផ្តល់កិច្ចធានាដ៏រឹងមាំសម្រាប់ជំរុញឱ្យកិច្ចសហប្រតិបត្តិការឡានឆាង-មេគង្គឈានដំណើរទៅមុខឥតឈប់ឈរ
សម្របទៅតាមនិន្នាការអភិវឌ្ឍន៍ប្រវត្តិសាស្ត្រ ដែលតភ្ជាប់គ្នាដោយបើកចំហ និងអភិវឌ្ឍន៍ដោយសម្របសម្រួលគ្នា។ ប្រឈមនឹងជំនោរនៃការប្រឆាំងសាកលភាវូបនីយកម្ម និងជំនោរឯកតោភាគីនិយម ប្រទេសទន្លេឡានឆាង-មេគង្គទាំង ៦ បានប្រកាន់ខ្ជាប់នូវគោលការណ៍ពហុភាគីនិយម និងសមាហរណកម្មសេដ្ឋកិច្ចក្នុងតំបន់ ដែលជាគោលដៅដ៏ត្រឹមត្រូវ ខិតខំបង្កើតគំរូដ៏ជោគជ័យនៃការកសាង “ខ្សែក្រវាត់មួយ និងផ្លូវមួយ”ដោយមានគុណភាពខ្ពស់។
យើងនឹងជំរុញឱ្យកិច្ចសហប្រតិបត្តិការឡានឆាង-មេគង្គបំពេញបន្ថែមគ្នា និងជំរុញគ្នាទៅវិញទៅមក ជាមួយយន្តការពាក់ព័ន្ធផ្សេងៗដូចជា យន្តការតំបន់ទន្លេ៣ កិច្ចសហប្រតិបត្តិការសេដ្ឋកិច្ច មហាអនុតំបន់ទន្លេមេគង្គ និងគណៈកម្មាធិការទន្លេមេគង្គជាដើម រួមគ្នាជំរុញការកសាងសហគមន៍អាស៊ាន និងបង្កើនទំនាក់ទំនងភាពជាដៃគូយុទ្ធសាស្ត្រចិន-អាស៊ាន ។
ទី៣ យុគសម័យថ្មីអំពាវនាវឱ្យមានសមិទ្ធផលថ្មី
កិច្ចសហប្រតិបត្តិការឡានឆាង-មេគង្គ ជាគំរូមួយនៃគោលនយោបាយការទូតរបស់ប្រទេសចិន ដែលអនុវត្តតាមស្មារតីទំនាក់ទំនងការទូតរបស់ឯកឧត្តមស៊ី ជីនភីង ធ្វើការច្នៃប្រឌិត និងបោះជំហានទៅមុខយ៉ាងក្លៀវក្លា។
ប្រឈមនឹងជំងឺឆ្លងដែលផ្ទុះឡើងនៅសតវត្សរ៍ថ្មី និងការផ្លាស់ប្តូរនៃស្ថានការណ៍ពិភពលោក កិច្ចសហប្រតិបត្តិការឡានឆាង- មេគង្គ ត្រូវតែដើរតួនាទីនាំមុខគេ បង្ហាញពីស្មារតីទំនួលខុសត្រូវ នាំផ្លូវអភិវឌ្ឍន៍ ធ្វើកិច្ចសហប្រតិបត្តិការលើគ្រប់វិស័យឱ្យកាន់តែស៊ីជម្រៅ និងកសាងអនាគតកាន់តែភ្លឺស្វាង ជូនចំពោះប្រជាជនដែលរស់នៅក្នុងអនុតំបន់។
បន្តដឹកនាំការប្រយុទ្ធប្រឆាំងនឹងជំងឺឆ្លង។ សព្វថ្ងៃការរាតត្បាតនៃជំងឺកូវីដ-១៩ នៅមិនទាន់បញ្ចប់ទេ ដូច្នេះការប្រឆាំងនឹងជំងឺឆ្លង និងសង្គ្រោះជីវិតនៅតែជាភារកិច្ចសំខាន់ជាងគេ ដែលមានតួនាទីសំខាន់ជាងអ្វីៗទាំងអស់។ កិច្ចសហប្រតិបត្តិការឡានឆាង-មេគង្គត្រូវបង្កើតជាគំរូថ្មី សម្រាប់ពង្រឹងកិច្ចសហប្រតិបត្តិការ លើការប្រយុទ្ធប្រឆាំងនឹងជំងឺឆ្លងលើពិភពលោក ដើម្បីរួមចំណែកក្នុងការកសាងសហគមន៍សុខាភិបាល និងសុខភាពមនុស្សជាតិ។
យើងត្រូវប្រកាន់ខ្ជាប់នូវគោលការណ៍ ដែលមិនអាចបន្ធូរការបង្ការ និងគ្រប់គ្រងជំងឺឆ្លង ត្រូវបង្កើនកិច្ចសហប្រតិបត្តិការអំពីវ៉ាក់សាំងកូវីដ-១៩ ដើម្បីជំរុញឱ្យយុទ្ធនាការប្រឆាំងនឹងជំងឺឆ្លងទទួលបានជោគជ័យ។ យើងត្រូវផ្តោតការយកចិត្តទុកដាក់ លើការប្រកួតប្រជែងនាពេលខាងមុខ ហើយចាត់ទុកកិច្ចសហប្រតិបត្តិការ សុខាភិបាលសាធារណៈជាទិសដៅសំខាន់មួយ នៃកិច្ចសហប្រតិបត្តិការឡានឆាង-មេគង្គ ប្រើប្រាស់ឱ្យបានល្អប្រសើរនូវមូលនិធិ ពិសេសអំពីសុខាភិបាលសាធារណៈឡានឆាង-មេគង្គ គាំទ្រឱ្យអនុវត្តគម្រោងអំពីបច្ចេកទេស តាមដានការរាតត្បាតនៃជំងឺឆ្លង គម្រោងបង្ការនិងគ្រប់គ្រងជំងឺឆ្លងឆ្លងដែន និងគម្រោងពេទ្យប្រពៃណីជាដើម ព្រមទាំងជំរុញការពង្រឹងសមត្ថភាពសុខាភិបាលសាធារណៈនៃប្រទេសទាំង៦ ។
ខិតខំផ្សព្វផ្សាយពីស្មារតីភាពជាដៃគូ
អនុតំបន់គឺជាស្រុកកំណើតរួមរបស់យើងទាំងអស់គ្នា។ ខណៈពេលស្ថានការណ៍អន្តរជាតិ កាន់តែមានភាពស្មុគស្មាញ ប្រទេសទាំង៦ កាន់តែត្រូវពន្លឿនការកសាងសហគមន៍ វាសនារួមប្រទេសទន្លេឡានឆាង-មេគង្គ ដើម្បីដើរឆ្ពោះទៅកាន់សន្តិភាព និងវិបុលភាព។
យើងត្រូវរក្សាទំនាក់ទំនងថ្នាក់ដឹកនាំជាន់ខ្ពស់ បង្កើនការផ្លាស់ប្តូរបទពិសោធន៍ អភិបាលកិច្ច ពង្រឹងកិច្ចសហប្រតិបត្តិការគ្រប់ជ្រុងជ្រោយពហុវិស័យ បង្កើតកិច្ចសហប្រតិបត្តិការសន្តិសុខមិនមែនប្រពៃណី និងចំណុចកំណើនថ្មីផ្សេងៗទៀត។ ធនធានទឹកនៃទន្លេឡានឆាង-មេគង្គជាចំណងដ៏សំខាន់ សម្រាប់តភ្ជាប់ប្រទេសនៅផ្នែកខាងលើ និងផ្នែកខាងក្រោមទន្លេ។
យើងត្រូវគោរពសិទ្ធិស្របច្បាប់ របស់ប្រទេសផ្សេងៗក្នុងការអភិវឌ្ឍ និងប្រើប្រាស់ធនធានទឹក ជឿទុកចិត្តលើគ្នា យោគយល់គ្នា គាំទ្រគ្នាទៅវិញទៅមក គិតពិចារណាអំពីបញ្ហាដែលយកចិត្តទុកដាក់ដោយគូភាគី រួមគ្នាពង្រឹងសមត្ថភាពគ្រប់គ្រងជាទូទៅ និងសមត្ថភាពគ្រប់គ្រងធនធានទឹក ដើម្បីជំរុញបន្ថែមទៀតនូវសាមគ្គីភាព និងកិច្ចសហប្រតិបត្តិការរវាងប្រទេសផ្នែកខាងលើ និងផ្នែកខាងក្រោមទន្លេ ។
បន្តជំរុញការអភិវឌ្ឍន៍រួមគ្នា
ការជំរុញការធ្វើសមាហរណកម្មសេដ្ឋកិច្ចក្នុងតំបន់ ការតភ្ជាប់ហេដ្ឋារចនាសម្ព័ន្ធ និងការធ្វើពាណិជ្ជកម្មយ៉ាងរលូន មានសារៈសំខាន់ណាស់ សម្រាប់ការអភិវឌ្ឍឧស្សាហកម្ម និងសម្រេចនូវកំណើនសេដ្ឋកិច្ចក្នុងអនុតំបន់។ យើងត្រូវជំរុញឱ្យ“កិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ ”ឱ្យចាប់មានសុពលភាព ក្នុងពេលយ៉ាងឆាប់ បង្កើនការធ្វើពាណិជ្ជកម្ម វិនិយោគ និងការតភ្ជាប់គ្នា ពន្លឿនការអនុវត្តគម្រោងខ្សែរថភ្លើងចិន-ឡាវ និងចិន-ថៃជាដើម។
កំណត់មធ្យោបាយជាក់ស្តែង សម្រាប់ការតភ្ជាប់កិច្ចសហប្រតិបត្តិការជាមួយ “ច្រកពាណិជ្ជកម្មដីគោក និងសមុទ្រអន្តរជាតិថ្មី” បង្កើនកិច្ចសហប្រតិបត្តិការពាណិជ្ជកម្មតាមតំបន់ព្រំដែន ពាណិជ្ជកម្មអេឡិចត្រូនិចឆ្លងដែន និងតំបន់ឧស្សាហកម្ម រួមគ្នាកសាងខ្សែក្រវាត់សេដ្ឋកិច្ច តាមតំបន់ទន្លេឡានឆាង-មេគង្គ។ យើងត្រូវឆ្លើយតបនឹងការប្រែប្រួលដោយមានភាពម្ចាស់ការ ធ្វើកំណែទម្រង់រចនាសម្ព័ន្ធឱ្យបានកាន់តែស៊ីជម្រៅ បំផុសកម្លាំងចលករ សម្រាប់ការអភិវឌ្ឍន៍តាមរយៈការច្នៃប្រឌិតបច្ចេកវិទ្យា និងបដិវត្តន៍ឌីជីថលូបនីយកម្ម ។
ខិតខំយ៉ាងពេញទំហឹងដើម្បីការពារសុភមង្គលរបស់ប្រជាជន
យើងត្រូវពង្រីកឱ្យកាន់តែស៊ីជម្រៅ នូវកិច្ចសហប្រតិបត្តិការអំពីជីវភាពរស់នៅប្រជាជន អនុវត្តគម្រោងពាក់ព័ន្ធដែលទាក់ទិន ទៅនឹងការរស់នៅរបស់ប្រជាជន ដូចជា គម្រោងកសិកម្ម និងគម្រោងកាត់បន្ថយភាពក្រីក្រជាដើម ពន្លឿនការអនុវត្ត“យុទ្ធសាស្ត្រអំពីកិច្ចសហប្រតិបត្តិការបរិស្ថានឡានឆាង-មេគង្គ” ធ្វើកិច្ចសហប្រតិបត្តិការលើការកែលម្អបរិស្ថានខ្យល់អាកាស និងថែរក្សាជីវចម្រុះជាដើម។
យើងត្រូវពង្រីកកិច្ចសហប្រតិបត្តិការ លើវិស័យអប់រំ ទេសចរណ៍ និងយុវជនជាដើម ខិតខំយ៉ាងពេញទំហឹង ដើម្បីផ្តល់ការគាំទ្រដល់ការធ្វើកិច្ចសហប្រតិបត្តិការមូលដ្ឋាន លើកទឹកចិត្តឱ្យសមាគម សហគ្រាស និងធនធានសង្គមស៊ីវិលមានភាពសកម្ម ជំរុញការកសាងសហព័ន្ធអាជីវកម្ម និងបង្កើនកម្លាំងចលករផ្ទៃ ក្នុងសម្រាប់ពង្រឹងកិច្ចសហប្រតិបត្តិការ។
ទឹកដីនៅជាប់នឹងគ្នា រួមគ្នាពុះពារឧបសគ្គ
ឆ្នាំនេះជាខួបលើកទី១០០ ឆ្នាំនៃការបង្កើតគណបក្សកុម្មុយនិស្តចិន ។ នៅដើមខែនេះ “ផែនការអភិវឌ្ឍន៍សេដ្ឋកិច្ច និងសង្គមជាតិរយៈពេល៥ ឆ្នាំទី១៤ និងគោលលំនាំទស្សនទានប្រចាំឆ្នាំ២០៣៥ នៃសាធារណរដ្ឋប្រជាមានិតចិន” ត្រូវបានអនុម័តក្នុងកិច្ចប្រជុំលើកទី៤ នៃសភាតំណាងប្រជាជនទូទាំងប្រទេសចិននីតិកាលទី១៣ ។ ប្រទេសចិនបានចាប់ដំណើរការថ្មី អំពីការកសាងប្រទេសសង្គមនិយម ទំនើបភាវូបនីយកម្មគ្រប់ជ្រុងជ្រោយ ពន្លឿនការកសាងនិម្មាបនកម្មអភិវឌ្ឍន៍ថ្មី ដែលចាត់ទុកការវិលជុំក្នុងស្រុកជាចំណុចស្នូល ការវិលជុំក្នុងនិងក្រៅប្រទេសជំរុញគ្នា។
នេះជាដំណាក់កាលថ្មី នៃការអភិវឌ្ឍន៍របស់ប្រទេសចិន ហើយក៏ជាកាលានុវត្តន៍ភាពថ្មី សម្រាប់ពង្រឹងកិច្ចសហប្រតិបត្តិការឡានឆាង-មេគង្គដែរ ។ យើងនឹងរួមសហការគ្នាជាមួយប្រទេសទន្លេមេគង្គផ្សេងៗ បើកក្តោងថ្មីសម្រាប់កិច្ចសហប្រតិបត្តិការឡានឆាង-មេគង្គ ខិតខំប្រឹងប្រែងដើម្បីកសាងតំបន់ទន្លេឡានឆាង -មេគង្គ ដែលកាន់តែមានសុខសន្តិភាព ស្ថិរភាព វិបុលភាព និងសុភមង្គល ព្រមទាំងរួមវិភាគទានថ្មីក្នុងការកសាងសហគមន៍វាសនារួមមនុស្សជាតិ៕ដោយរដ្ឋមន្ត្រីការបរទេសចិន លោកវ៉ាង យី
