នៅថ្ងៃសម្ពោធរឿង “Eternals” របស់ Marvel តារាប្រុសស្រីហូលីវូដជាច្រើនបានបង្ហាញមុខរួមគ្នា ញ៉ាំកម្មវិធីកាន់តែអស្ចារ្យ។ ជាមួយគ្នានោះ ក៏មានរឿងភ្ញាក់ផ្អើល និងសប្បាយៗច្រើនដែរ។
ជាឧទាហរណ៍ជាក់ស្ដែង ដូច Angelina Jolie បានធ្វើឲ្យគ្រប់គ្នាឃើញសកម្មភាពហើយអស់សំណើច ពេលកំពុងផ្ដល់បទសម្ភាសសុខៗ ស្រាប់តែងាកទៅស្វាគមន៍មិត្តភ័ក្តិទាំងមិនដឹងខ្លួន។
Angelina Jolie និង Ma Dong Seok សុទ្ធតែជាតួក្នុងរឿង «Eternals» ហើយក៏បានជុំគ្នាដែរកាលពីថ្ងៃទី ១៨ ខែតុលា ដើម្បីសម្ពោធរឿង។ ជាក់ស្ដែង អំឡុងពេល Angelina កំពុងផ្ដល់បទសម្ភាសជាមួយនឹង Variety លោក Ma Dong Seok ដើរមកពីក្រោយ ហើយក៏និយាយ សួស្ដីទៅកាន់កាមេរ៉ា។ គ្រាន់តែឮសំឡេង Dong Seok ភ្លាម Angelina ក៏ស្រាប់តែងាកមកស្វាគមន៍រាក់ទាក់ពេញដោយក្ដីរីករាយបំផុត។
Dong Seok និយាយទៅកាន់ Angelina ថា៖ «ខ្ញុំនឹកអ្នកណាស់ អ្នកពិតជាស្អាតមែន ស្អាតដូចសព្វដងអ៊ីចឹង»។
តារាស្រីលំដាប់ហូលីវូដតបវិញ៖ «យើងមិនអាចនិយាយអ្វីពីក្នុងរឿងបានទេ។ ប៉ុន្តែខ្ញុំពិតជាពេញចិត្តខ្លាំងមែនទែន ដែលយើងបានរួមការងារជាមួយគ្នា»។
ក្រោយមក នាងក៏បានងាកទៅរាក់ទាក់មិត្តភ័ក្តិផ្សេងទៀត ទាំងភ្លេចខ្លួនថា នាងកំពុងស្ថិតក្នុងបទសម្ភាសនៅឡើយ ដោយទុកអ្នកសារព័ត៌មានចោលទាំងអាណិត។
Source: Sabay
