អង្គការ NASA គឺជាអង្គភាពស្រាវជ្រាវអវកាសដ៏ល្បី របស់សហរដ្ឋអាមេរិក ដែលប្រមូលផ្ដុំអ្នកជំនាញខាងបច្ចេកវិទ្យា និងអវកាសជាច្រើន។ អ្វីដែលគួរចាប់អារម្មណ៍បំផុត ដែលទើបនឹងលេចឡើងថ្មីៗនេះ គឺមានជនជាតិខ្មែរ២នាក់ ក្នុងស្ថិតក្នុងចំណោមក្រុមការងាររបស់ NASA ដែរ។
ជនជាតិខ្មែរទាំងពីររូបនោះ សុទ្ធជានារី ដែលអ្នកទី១ គឺអ្នកស្រី Ny Sou Okon។ ស្ត្រីដើមកំណើតខ្មែរ ដែលបានមកដល់សហរដ្ឋអាមេរិក នៅពាក់កណ្ដាលទសវត្សរ៍ឆ្នាំ ១៩៨០ ក្នុងនាមជាជនភៀសខ្លួន ជាមួយឪពុកម្ដាយ និងបងៗ ២ នាក់ទៀត បន្ទាប់ពីក្រុមគ្រួសារ បានរត់គេចពីរបបខ្មែរក្រហម។
អ្នកស្រីគឺជាបុគ្គលិកម្នាក់នៃអង្គការណាសា ដែលបានរួមចំណែកក្នុងដំណើរការ យានអវកាស Perseverance ឆ្ពោះទៅភពអង្គារ កាលពីចុងខែកក្កដា ឆ្នាំ ២០២២។ អ្នកស្រីបានបញ្ចប់បរិញ្ញាបត្រ ផ្នែកវិស្វកម្មមេកានិច ពីសាកលវិទ្យាល័យកាលីហ្វ័រនីញ៉ាឡូសអែនជឺឡេស (UCLA) និងបានបញ្ចប់បរិញ្ញាប័ត្រជាន់ខ្ពស់ ផ្នែកវិស្វកម្មយានអវកាសពីសាកលវិទ្យាល័យ University of Southern California។
អ្នកស្រី បានធ្វើការជាអ្នកហាត់ការនៅក្រុមហ៊ុន Boeing នៅកំឡុងពេលជានិស្សិតបរិញ្ញាបត្រ។ Ny Sou Okon មានប្រវត្តិការងារក្នុងឧស្សាហកម្មឯកជន នៅក្នុងជំនាញផ្នែកលម្ហអាកាស។ បន្ទាប់ពីបានធ្វើការងារអស់រយៈពេល ១៥ ឆ្នាំក្នុងវិស័យឯកជន អ្នកស្រីចង់ធ្វើការងារ នៅក្នុងបេសកកម្មរុករក ក្នុងលម្ហអាកាសដ៏អស្ចារ្យ នៅមន្ទីរពិសោធន៍ NASA Jet Pro-pulsion Laboratory (JPL) ក្នុងនាមជាវិស្វករផ្នែកប្រព័ន្ធ (Systems Engineer) ក្នុងដំណើរស្រាវជ្រាវភពអង្គារ។
ឪពុកម្ដាយអ្នកស្រីតែងតែនិយាយប្រាប់អ្នកស្រីថា កម្ពុជាគឺជាប្រទេសដ៏ស្រស់ស្អាត ហើយប្រជាពលរដ្ឋមានចិត្តល្អណាស់។ អ្នកស្រីសង្ឃឹមថា រឿងរ៉ាវរបស់អ្នកស្រី និងជួយជំរុញទឹកចិត្ត ឱ្យយុវជនកម្ពុជាស្វះស្វែងរកការងារ ក្នុងផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា(STEM) ហើយតាំងចិត្តឱ្យល្អ និងមានក្ដីស្រមៃឱ្យធំ។
ស្រី្តខ្មែរទី២ មកពីបាត់ដំបង គឺ Khanara Tauch Ellers អាយុជាង ៥០ឆ្នាំ វិស្វករ Engineer NASA’s Jet Propulsion Laboratory ពីកុមារភាព អ្នកស្រីបានឃើញរូបភាព អវកាសយានិកអាប៉ូឡូ ព្រះច័ន្ទដើរលើទូរទស្សន៍សខ្មៅ ដែលឪពុកម្តាយ និងពូអ្នកស្រីចូលលុយគ្នាទិញ។ អ្នកស្រីក៏នឹកចង់ភ្លាមៗថា ធំឡើងនឹងធ្វើការក្នុងកម្មវិធីអវកាស។
ឪពុកអ្នកស្រី ជាសាស្ត្រាចារ្យគណិតវិទ្យា ហើយម្តាយជាគ្រូបង្រៀននៅវិទ្យាល័យ។ ពួកគាត់ចង់ឱ្យអ្នកស្រីក្លាយជាផ្នែកមួយនៃព្រឹត្តិការណ៍ប្រវត្តិសាស្ត្រនេះ។ រត់ភៀសខ្លួនពីរបបខ្មែរក្រហម ទៅនៅសហរដ្ឋអាមេរិក ហើយភាសាអង់គ្លេស គឺជាបញ្ហាប្រឈមដ៏ធំបំផុតសម្រាប់អ្នកស្រី ក្នុងការជម្នះដើម្បីសម្រេចក្តីសុបិន។ ដំបូងអ្នកស្រី បានចូលរៀនថ្នាក់អប់រំ មនុស្សពេញវ័យនៅពេលល្ងាច បន្ទាប់ពីធ្វើការក្នុងរោងចក្រកាត់ដេរ។
អ្នកស្រីបានចាប់ផ្តើម រៀនបរិញ្ញាបត្រវិទ្យាសាស្ត្រ ផ្នែកវិស្វកម្មមេកានិក (Bachelor of Science in Mechanical Engineering) នៅសាកលវិទ្យាល័យរដ្ឋពហុជំនាញ California State Polytechnic, Pomona, California ហើយបានទទួលបរិញ្ញាបត្រនេះក្នុងឆ្នាំ 1988។ ជាម្ដាយគេផង ជាវិស្វករពេញម៉ោ អ្នកស្រីបានជម្នះធ្វើការងារគម្រោងអវកាសជាច្រើន រួមតាំងគម្រោង រ៉ាដា-C (SIR-C) ដែលការហោះហើរលើកទីពីរ បានរកឃើញប្រាសាទ ដែលបាក់បែកនៅអង្គរក្នុងប្រទេសកម្ពុជា ដែលជាប្រទេសកំណើតរបស់អ្នកស្រី។
រូបភាពទីអវកាសដែលអ្នកស្រីចូលចិត្តបំផុត គឺជារូបភាពបំបែកដែលបង្ហាញទាំងអវកាសយានិក Apollo 11 Buzz Aldrin នៅលើឋានព្រះច័ន្ទ និង Mars 2020 Perseverance rover ព្រោះវាតំណាងឱ្យផ្លូវអាជីពរបស់អ្នកស្រីយ៉ាងល្អឥតខ្ចោះ។ អវកាសគឺធំទូលាយ ហើយអ្នកស្រីមានមោទកភាពដែលខ្លួន ជាផ្នែកមួយតូចនៃលម្ហចក្កវាឡនេះ។
អ្នកស្រីបានលើកទឹកចិត្តអ្នកទាំងអស់គ្នាថា “ចូរផ្តោតអារម្មណ៍ និងប្រឹងប្រែងឆ្ពោះទៅរកក្តីសុបិនរបស់អ្នក! កុំអនុញ្ញាតឱ្យឧបសគ្គតាមផ្លូវធ្វើឱ្យការផ្ចង់អារម្មណ៍របស់អ្នកស្រពេចស្រពិល”៕ Source: Sabay
