អូស្រ្តាលី នឹងទិញយន្តហោះ C-130J Hercules ថ្មី ២០គ្រឿងពីសហរដ្ឋអាមេរិក ក្នុងតម្លៃ ៩,៨ ពាន់លានដុល្លារ

បរទេស៖ ក្រសួងការពារជាតិអូស្ត្រាលី បានឱ្យដឹងកាលពីថ្ងៃចន្ទថា ប្រទេសអូស្ត្រាលីនឹងទិញយន្តហោះ C-130J Hercules ថ្មីចំនួន ២០គ្រឿងពីសហរដ្ឋអាមេរិកក្នុងតម្លៃ ៩,៨ ពាន់លានដុល្លារ ហើយការចែកចាយលើកដំបូងដែលត្រូវបានរំពឹងទុកថា នឹងធ្វើឡើងនៅចុងឆ្នាំ ២០២៧ ។

យោងតាមសារព័ត៌មាន Sputnik ចេញផ្សាយកាលពីថ្ងៃទី២៥ ខែកក្កដា ឆ្នាំ២០២៣ បានឱ្យដឹងថា យន្តហោះដំបូងគេត្រូវបានគេរំពឹងថា នឹងដឹកជញ្ជូននៅចុងឆ្នាំ ២០២៧ នេះបើយោងតាមសេចក្តីថ្លែងការណ៍។

ក្រសួងការពារជាតិអូស្រ្តាលី បាននិយាយនៅក្នុងសេចក្តីថ្លែងការណ៍មួយថា “រដ្ឋាភិបាលរបស់លោក Anthony Albanese នឹងទិញយន្តហោះ C-130J Hercules ថ្មីចំនួន ២០ គ្រឿងសម្រាប់កងកម្លាំងអាកាសអូស្រ្តាលី ក្នុងតម្លៃ ៩,៨ ពាន់លានដុល្លារ។

ទាំងនេះនឹងផ្តល់ឱ្យកងទ័ពអាកាសនូវយន្តហោះ C-130 Hercules ទំនើប ដើម្បីបំពេញតម្រូវការដឹកជញ្ជូនតាមផ្លូវអាកាសនាពេលអនាគត” ។
ក្រសួងបានបន្ថែមថា ការទិញយកថ្មីនឹងជំនួស និងពង្រីកយន្តហោះ Hercules ចំនួន ១២ គ្រឿងដែលកំពុងដំណើរការនាពេលបច្ចុប្បន្ន។

សេចក្តីថ្លែងការណ៍បាននិយាយថា យន្តហោះនេះត្រូវបានប្រើប្រាស់ដោយយោធាអូស្ត្រាលី ដើម្បីដឹកជញ្ជូនបុគ្គលិក ឧបករណ៍ និងការផ្គត់ផ្គង់មនុស្សធម៌ ក៏ដូចជាសម្រាប់ប្រតិបត្តិការស្វែងរក និងជួយសង្គ្រោះ ការផ្តល់ជំនួយសង្គ្រោះគ្រោះមហន្តរាយ និងបេសកកម្មជម្លៀសផ្នែកវេជ្ជសាស្រ្ត។

C-130J Hercules ត្រូវបានរចនាឡើងដោយក្រុមហ៊ុនអាកាសចរណ៍យក្សអាមេរិក Lockheed Martin ៕ ប្រែសម្រួលៈ ណៃ តុលា