បរទេស ៖ សត្វតោចំនួន ៥ ក្បាល បានបង្កឱ្យមានភាព អាសន្នមួយរយៈពេលខ្លី នៅសួនសត្វអូស្ត្រាលីមួយ បន្ទាប់ពីពួកវាបានរត់ចេញ ពីកន្លែងព័ទ្ធជុំវិញ។
យោងតាមសារព័ត៌មាន BBC ចេញផ្សាយកាលពីថ្ងៃទី២ ខែវិច្ឆិកា ឆ្នាំ២០២២ បានឱ្យដឹងថា សត្វតោដែលពេញវ័យមួយក្បាល និងកូនតូច៤ក្បាល ត្រូវបានគេប្រទះឃើញ នៅខាងក្រៅកន្លែងតាំងបង្ហាញ របស់ពួកគេនៅសួនសត្វ Taronga ទីក្រុងស៊ីដនី ប្រហែលម៉ោង ៦ និង៣០នាទី ម៉ោងក្នុងស្រុកនៅថ្ងៃពុធ ។
អ្នកនាំពាក្យម្នាក់បាននិយាយថា សួនសត្វត្រូវបានបិទទ្វារ ហើយកូនតោមួយក្បាល ត្រូវបានគេប្រទះឃើញនៅស្ងៀម ប៉ុន្តែសត្វតោទាំងអស់ ត្រូវបានធានាសុវត្ថិភាព ក្នុងរយៈពេលប៉ុន្មាននាទីក្រោយមក និងគ្មាននរណាម្នាក់ រងរបួសទេ។
ការពន្យល់សម្រាប់ការ រត់គេចខ្លួនរបស់សត្វតោទាំង៥ក្បាលនេះ មិនត្រូវបានផ្តល់ឱ្យទេ ប៉ុន្តែនាយកប្រតិបត្តិសួនសត្វលោក Simon Duffy បានហៅវាថាជា “ឧប្បត្តិហេតុធំ” ដែលនឹងត្រូវស៊ើបអង្កេត។
លោកបានប្រាប់ប្រព័ន្ធផ្សព្វផ្សាយ ក្នុងស្រុកថា សត្វតោបានចូលទៅក្នុងតំបន់តូចមួយ “នៅជាប់” ជាមួយនឹងការតាំងបង្ហាញរបស់ពួកគេ – ប្រហែល ១០០ ម៉ែត្រពីកន្លែងដែលភ្ញៀវស្នាក់នៅ ក្នុងសួនសត្វមួយយប់។ សួនសត្វធំនេះត្រូវបានបិទនៅពេលនោះ។
លោកបាននិយាយថា «នៅពេលនោះសត្វតោមិនបានចេញពីតំបន់នោះ ឬចេញពីសួនសត្វ Taronga នោះទេ»៕
ប្រែសម្រួលៈ ណៃ តុលា
