បរទេស៖ ក្រសួងការបរទេសរុស្ស៊ី បាននិយាយកាលពីថ្ងៃពុធថា ទីក្រុងមូស្គូគឺ “តឹងរ៉ឹង និងជាប់លាប់” ដឹកនាំដោយគោលការណ៍ដែលថា សង្រ្គាមនុយក្លេអ៊ែរមិនអាចឈ្នះបាន ហើយមិនគួរត្រូវបានប្រយុទ្ធឡើយ និងថែមទាំងបានអំពាវនាវ ឱ្យមហាអំណាចបរមាណូផ្សេងទៀត “បង្ហាញក្នុងការអនុវត្ត” ការប្តេជ្ញាចិត្តផ្ទាល់ខ្លួនរបស់ពួកគេចំពោះរឿងនេះ។
យោងតាមសារព័ត៌មាន RT ចេញផ្សាយនៅថ្ងៃទី២ ខែវិច្ឆិកា ឆ្នាំ២០២២ បានឱ្យដឹងដោយផ្អែកតាម ក្រសួងការបរទេសរុស្ស៊ីថា “យើងជឿជាក់យ៉ាងមុតមាំថា ក្នុងស្ថានភាពលំបាក និងចលាចលនាពេលបច្ចុប្បន្ន ដែលជាលទ្ធផល នៃសកម្មភាពគ្មានការទទួលខុសត្រូវ និងអៀនខ្មាស់ក្នុងគោលបំណង ធ្វើឱ្យខូចសន្តិសុខជាតិរបស់យើង អាទិភាពទីមួយ គឺការពារការប៉ះទង្គិចយោធាណាមួយ នៃមហាអំណាចនុយក្លេអ៊ែរ”។
ប្រទេសរុស្ស៊ីឈរនៅជាមួយហត្ថលេខារបស់ខ្លួន នៅលើសេចក្តីថ្លែងការណ៍រួមថ្ងៃទី ៣ ខែមករាជាមួយមេដឹកនាំ របស់ប្រទេសដែលមាននុយក្លេអ៊ែរចំនួន៥ ឬ “Nuclear Five” ដែលរួមមានសហរដ្ឋអាមេរិក ចក្រភពអង់គ្លេស បារាំង និងចិន – ស្តីពីការទប់ស្កាត់សង្គ្រាមនុយក្លេអ៊ែរ និងការមិនអាចទទួលយកបាន នៃការប្រណាំងអាវុធនុយក្លេអ៊ែរឡើយ។
ក្រសួងការបរទេសរុស្ស៊ី ក៏បានអំពាវនាវដល់សមាជិកផ្សេងទៀតរបស់ “Nuclear Five” ដើម្បីបង្ហាញនៅក្នុងការអនុវត្តពួកគេ ហើយក៏ដើម្បីចែករំលែក ការប្តេជ្ញាចិត្តនេះផងដែរ និងដើម្បី “បោះបង់ចោលការប៉ុនប៉ងដ៏គ្រោះថ្នាក់ ដើម្បីរំលោភលើផលប្រយោជន៍សំខាន់ៗរបស់គ្នាទៅវិញទៅមក តុល្យភាពនៅលើគែម នៃជម្លោះប្រដាប់អាវុធដោយផ្ទាល់ និងការលើកទឹកចិត្តដល់ការបង្កហេតុជាមួយដោយអាវុធមហាប្រល័យ (WMD) ដែលអាចនាំឱ្យមានផលវិបាកមហន្តរាយ៕ ប្រែសម្រួលៈ ណៃ តុលា
