ប្រធានសហព័ន្ធបាល់ទាត់ អេហ្ស៊ីប លោក Ahmed Megahed បានបញ្ជាក់ត្រង់ៗនៅក្នុងថ្ងៃនេះទៅកាន់ BBC Sport Africa ថាក្លឹប Liverpool មិនព្រមអនុញ្ញាត ឲ្យខ្សែប្រយុទ្ធ Mohamed Salah ទៅចូលរួមប្រកួតអូឡាំពិក ២០២០ នៅឯក្រុងតូក្យូ ប្រទេសជប៉ុនខាងមុខនេះទេ។
បើតាមលោក Megahed បានឲ្យដឹងថា Salah ពិតជាចង់តំណាង ឲ្យក្រុមអេហ្ស៊ីប មកប្រកួតនៅក្នុង ខាងក្រុមខាងលើជាខ្លាំង ប៉ុន្តែត្រូវខាងក្លឹបបដិសេធ ដោយសារតែការប្រកួតមួយនេះ មិនមាននៅក្នុងកាលវិភាគ ប្រកួតជាផ្លូវការរបស់ FIFA ។
ទោះជាប្រធានសហព័ន្ធបាល់ទាត់ អេហ្ស៊ីបរូបនេះ ខិតខំអង្វរជាច្រើនខែ សុំឲ្យ Salah ចូលរួមយ៉ាងណាក្ដីក៏ខាង Liverpool នៅតែមិនព្រម។
លោក Megahed ក៏បានប្រាប់ត្រង់ៗដែរថា តាមពិតទៅ Liverpool បានជូនដំណឹងចុងក្រោយ មិនឲ្យខ្សែប្រយុទ្ធខាងលើ ចូលរួមតាំងពីខែមិថុនាកន្លងទៅម្ល៉េះ អញ្ចឹងហើយខាងសហព័ន្ធ មានតែគោរពតាមការសម្រេច ចិត្តរបស់ក្លឹបប៉ុណ្ណោះ។
គួរបញ្ជាក់ផងដែរថា កម្មវិធីប្រកួតអូឡាំពិក ២០២០ នឹងធ្វើឡើង នៅថ្ងៃទី២៣ កក្កដា ដល់ថ្ងៃទី០៨ សីហា ឆ្នាំ២០២១៕ ប្រភព៖ សប្បាយ
