កាលពីយប់មិញនេះ ក្រុមបិសាចក្រហម Manchester United បានយល់ព្រមទិញ Ronaldo មកកាន់អង់គ្លេសវិញក្នុងតម្លៃ ២៩,៤៨ លានដុល្លារពីក្រុមសេះបង្កង Juventus។ Ronaldo ជាខ្សែប្រយុទ្ធធ្លាប់ជោគជ័យខ្លាំងជាមួយលេខ៧ ប៉ុន្តែពេលនេះលេខ៧នេះត្រូវបាន Edinson Cavani កំពុងពាក់ ហើយ Cavani ក៏មិនបានស្ថិតក្នុងគម្រោង នៃការលក់របស់ United ផងដែរ។
Ronaldo ពិតជាមិនសប្បាយចិត្តឡើយក្នុងការមិនអាចប្រើលេខ៧ ជាលេខដែលគេស្រលាញ់ និងជាលេខដែលអតីតវីរបុរសរបស់ Manchester Uinter លោក David Beckham, George Best, Denis Law, Eric Cantona និង Bryan Robson ធ្លាប់បានប្រើ។ ដោយឡែកលេខ៩ដែលគេធ្លាប់ប្រើកាលនៅ Real Madrid ឆ្នាំ២០០៩ ក៏កំពុង Anthony Martial ប្រើផងដែរ។
ដូច្នេះបើតាមការបកស្រាយរបស់ Goal ឲ្យដឹងថា សម្រាប់លេខដែល Ronaldo អាចប្រើនៅ Manchester United លើកនេះអាចមាន ១២ ,១៥ ,២៤ ,៣០, ៣១ , ៣៣ និង ៣៥ ។ ក្រៅពីលេខទាំងនេះ Ronaldo ក៏អាចប្រើលេខ២៨ ដែលជាលេខគេធ្លាប់បានពាក់កាលលេងនៅ Sporting Lisbon មុនពេល Six Alex Ferguson នាំមកកាន់ Old Trafford ឆ្នាំ២០០៤។
រំលឹកថា លេខ៧ដែល Ronaldo បានពាក់កាលនៅ Manchester United គឺទទួលបានការទុកចិត្តពីលោក Ferguson ហើយគេក៏បានសាង កេរ្តិ៍ឈ្មោះក្នុងប្រវត្តិសាស្ត្ររបស់ក្លឹប។ Ronaldo បានផ្ទេរទៅកាន់ Real Madrid នៅឆ្នាំ២០០៩ ដោយពេលនោះគេប្រើលេខ៩ ពីព្រោះតែលេខ៧ កំពុងពាក់ដោយវីរបុរសរបស់ Real គឺកីឡាករ Raul ប៉ុន្តែ Ronaldo ក៏ទទួលបានលេខ៧វិញ ក្រោយពេល Raul ចាកចេញពី Real Madrid ទៅកាន់ Schalke នៅឆ្នាំ២០១០ ៕
