បើទោះជាចាញ់ក្រុម Liverpool ដល់ទៅ ០-៥ មែន ប៉ុន្តែលោក Ole Gunnar Solskjaer បញ្ជាក់ថាលោកមិនបោះបង់ ឬចាកចេញពីតំណែងអ្នកចាត់ការ ក្រុមបិសាចក្រហម Manchester United ឡើយ។
នៅយប់មិញនេះ ជំនួបពណ៌ក្រហម នៅអង់គ្លេសក្នុងកីឡដ្ឋាន Old Trafford បានបញ្ចប់ទៅដោយលទ្ធផល Man Utd ចាញ់ក្រុម Liverpool ក្នុងលទ្ធផល ០-៥ ឯណោះ។ បរាជ័យធ្ងន់ក ក្នុងដីខ្លួនឯងនេះ បានធ្វើឱ្យអ្នកគាំទ្របិសាច មិនសប្បាយចិត្តនោះទេ ដោយខ្លះបានដើរចេញ ពីកីឡដ្ឋានមុនចប់ការប្រកួតទៅហើយ។ ស្របពេលអ្នកវិភាគដទៃទៀត ក៏និយាយថា Ole នៅមានកម្រិត មិនសមបន្ដដឹកនាំក្រុម Man Utd ទៀតនោះទេ។
តែសម្រាប់សាមីខ្លួនវិញ មិនបានគិតដូច្នេះឡើយ។ Ole ថាវាលឿនពេកសម្រាប់លោក ដើម្បីបោះបង់ ឬមិនប្រឹងប្រែងស្ដាមុខមាត់ឡើងវិញនោះ។ អតីតកីឡាករឆ្នើមបិសាចក្រហមខាងលើ បានបញ្ជាក់ថានៅថ្ងៃបន្ទាប់ លោកនឹងក្រោកឡើងដើម្បីវិភាគចំណុចខ្វះខាតក្នុងក្រុម ដើម្បីកែលម្អឡើងវិញ។ លោក នឹងធ្វើឱ្យអស់ពីសមត្ថភាព ដើម្បីឆ្លងកាត់ការលំបាកមួយនេះ៕ Source: Sabay
