ម្ចាស់មេដាយមាសពិភពលោក វ៉ូវីណាម ឆ្នាំ២០១៩ កីឡាការិនី ពៅ សុខា រំពឹងយកបានមេដាយណាមួយនៅព្រឹត្តិការណ៍កីឡាស៊ីហ្គេមនៅវៀតណាម ជួនកម្ពុជា ។
កីឡាការិនីខាងលើបាននិយាយថា «សម្រាប់មេដាយខ្ញុំសង្ឃឹមបង គ្រាន់តែកម្រិតមេដាយណាខ្ញុំមិនហ៊ាននិយាយដែរបង។ សំរាប់ចំនុចខ្វះខាត ខ្ញុំគិតថាយេីងមិនសូវជាមានបញ្ហា ឬប៉ះពាល់ខ្លាំងនោះទេ ព្រោះក្រុមកម្ពុជាយេីងមានលោកគ្រូបរទេសនៅបង្ហាត់ផ្ទាល់ គឺអាចនិយាយថា នាងខ្ញុំមានការបារម្ភខ្លាំងទៅលេីផ្នែកស្មារតីនៅពេលឡេីងទីលានប្រកួតឯនោះវិញ ព្រោះដោយសារតែយេីងខកខានចូលរួមក្នុងការប្រកួត ២ឆ្នាំជាងហេីយ។ ការខកខានចូលរួមនេះ ដោយសារតែបញ្ហាជំងឺកូវីដ-១៩ ពេលដែលចាប់ផ្តេីមប្រកួតវិញនៅក្នុងព្រឹត្តិការណ៍មួយដែលធំប្រចាំតំបន់ ដូចនេះនាងខ្ញុំគិតថាអ្វីដែលលំបាកគឺនៅសល់តែចំនុចផ្នែកស្មារតីពេលប្រកួតនេះទេ»។
សុខា ជាកីឡាការិនីម្ចាស់មេដាយមាសព្រឹត្តិការណ៍ពិភពលោកលើកទី ៦ ដែលធ្វើឡើងនៅកម្ពុជាកាលឆ្នាំ២០១៩ ព្រមទាំងជាម្ចាស់មេដាយសំរឹទ្ធចំនួនក្នុងព្រឹត្តិការណ៍ឆ្នាំនោះផងដែរ។ កីឡាការិនីស្រស់សោភា រូបនេះនឹងចូលរួមប្រកួតព្រឹត្តិការណ៍កីឡាស៊ីហ្គេមនៅវៀតណាម លើវិញ្ញាសាចំនួន ៣ គឺ មេគុណដាវនារី, សម្ដែងដាវនារី ២នាក់ និងសម្ដែងនារី២នាក់គ្មានអាវុធ៕ ប្រភព៖Sabay
