ភ្នំពេញ៖ នាថ្ងៃទី៧ ខែមីនា ឆ្នាំ២០២៥ នាយកដ្ឋានអប់រំកាយ និងកីឡាសិស្សនិស្សិតបានរៀបចំពិធីសំណេះសំណាលអបអរសាទរខួបលើកទី១១៤ ទិវាអន្តរជាតិនារី ៨មីនា ឆ្នាំ២០២៥ ក្រោមប្រធានបទ “សិទ្ធិ សមភាព និងភាពអង់អាច ចំពោះស្ត្រី និងក្មេងស្រីគ្រប់រូប” នៅសាលប្រជុំនាយកដ្ឋានអប់រំកាយនិងកីឡាសិស្ស និស្សិត ក្រោមអធិបតីភាពលោកបឹង គឹមតោ ប្រធាននាយកដ្ឋាន និងលោកអនុប្រធាននាយកដ្ឋាន ប្រធាន-អនុប្រធានការិយាល័យ ក្រោមបរិយាកាសរីករាយនិងស្និទ្ធស្នាលជាទីបំផុត។
លោកបឹង គឹមតោ បានសម្តែងនូវការកោតសរសើរចំពោះជាមន្រ្តីជាស្រ្តី បានចូលរួមអបអរសាទរនូវសមិទ្ធផលសំខាន់នានា ដែលស្ត្រីសម្រេចបានតាមរយៈការប្តេជ្ញាចិត្ត និងកិច្ចខិតខំប្រឹងប្រែងរួមគ្នា ក្នុងការលើកកម្ពស់សមភាពយេនឌ័រ និងការពង្រឹងការផ្តល់ភាពអង់អាចដល់ស្ត្រី និងក្មេងស្រីគ្រប់រូបនៅកម្ពុជា ក៏ដូចជាសម្រេចបាននូវកាតព្វកិច្ចរបស់កម្ពុជា នៅថ្នាក់តំបន់ និងសកល។
លោកប្រធានបានបន្តថា ស្រី្តបានចូលរួមចំណែកក្នុងការដឹកនាំ និងសម្របសម្រួល ជាពិសេស ការលើកកម្ពស់ការងារបញ្ជ្រាបយេនឌ័រតាមវិស័យ ការទប់ស្កាត់អំពើហិង្សាទាក់ទងនឹងយេនឌ័រ និងការចូលរួមលើកកម្ពស់ស្ថានភាព ឋានៈ តួនាទីស្រ្តី និងក្មេងស្រីក្នុងវិស័យសេដ្ឋកិច្ច សង្គមកិច្ច នយោបាយ អភិបាលកិច្ច និងកីឡាជាពិសេសការអនុវត្តប្រកបដោយប្រសិទ្ធភាព ក្នុងស្មារតីបុរេសកម្មនូវអនុសាសន៍គន្លឹះមុតស្រួចទាំង៨ របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ឆ្លៀតក្នុងឱកាសនេះ លោកប្រធានបានរំលេចអំពីប្រសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាលដែលបានលើកឡើងថា “ស្ត្រីជាឆ្អឹងខ្នងសេដ្ឋកិច្ចជាតិ”, “ជួយស្ត្រីគឺជួយខ្លួនឯង” និង “ពិភពលោកនឹងកាន់តែមានសុវត្ថិភាព ស្រស់បំព្រង និងកក់ក្តៅជាងមុន ប្រសិនបើមានស្ត្រីក្លាយជាអ្នកដឹកនាំកាន់តែច្រើន”៕
ដោយ៖ លី ភីលីព
