ចិន ៖ សារព័ត៌មាន Beijing Business Today បានរាយការណ៍ថា ក្រុមហ៊ុន Apple Inc បានឃើញការកក់ទុកច្រើនជាង ១លានសម្រាប់iPhone 14 ស្មាតហ្វូនស៊េរីចុងក្រោយបំផុត របស់ខ្លួន នៅលើ JD.com ជាវេទិកាពាណិជ្ជកម្មអេឡិចត្រូនិក ដ៏សំខាន់ក្នុងប្រទេសចិន គិតត្រឹមថ្ងៃទី ១០ ខែកញ្ញា ត្រឹមតែ២ថ្ងៃ បន្ទាប់ពីព្រឹត្តិការណ៍ សម្ពោធនៅថ្ងៃទី ៨ ខែកញ្ញា យោងតាមការចេញផ្សាយ ពីគេហទំព័រឆៃណាឌៀលី ។
JD.com បានបង្ហាញថា iPhone 14 អស់ស្តុកត្រឹមថ្ងៃទី ១០ ខែកញ្ញា ហើយពេលវេលា ចែកចាយសម្រាប់ iPhone 14 Pro ត្រូវបានពន្យារ ពេលដល់ ពាក់កណ្តាល ឬចុងខែតុលាជារយៈពេល ចន្លោះពី ៥ ទៅ៦ សប្តាហ៍ ។ វេទិកា e-commerce ជាច្រើន រួមទាំង Taobao.com និង JD.com បាននិយាយថា ទោះបីជា ប្រព័ន្ធរបស់ពួកគេបង្ហាញថា iPhone ចុងក្រោយបំផុត នឹងត្រូវបានចែកចាយបន្ទាប់ពី ៦០ ថ្ងៃ នៃការទិញ តាមអ៊ីនធើណេតក៏ដោយ ពួកគេមិន អាចធានា កាលបរិច្ឆេទ នៃការចែកចាយបានទេ ព្រោះវាអាស្រ័យលើស្ថានភាព ជាក់ស្តែង ។
ហាង Apple រួមទាំងនៅ Wangfujing ទីក្រុងប៉េកាំង និង Sanlitun បាននិយាយថា វាពិតជាលំបាកណាស់ក្នុងការទទួលបាន iPhone ចុងក្រោយបង្អស់ នៅក្នុងហាង នៅដើមដំបូង នៃការចាប់ផ្តើម ។ គេហទំព័ររបស់ Apple ក៏បានបង្ហាញពីការពន្យារពេល ជាច្រើនសប្តាហ៍ សម្រាប់ការចែកចាយ ផលិតផលស៊េរី iPhone 14 មួយចំនួនដូចជា iPhone 14 Pro 256GB និង iPhone 14 Plus 256GB ។
កាលពីមុន CITIC Securities បាននិយាយនៅក្នុង របាយការណ៍ស្រាវជ្រាវរបស់ខ្លួនថា ការនាំចេញជាសកលរបស់ Apple នៅឆ្នាំ ២០២២ នឹងឈានដល់ ២៣០លានគ្រឿង ហើយនឹងកើនឡើងដល់កំពូល នៃការលក់ប្រចាំឆ្នាំរបស់ខ្លួននៅក្នុងត្រីមាសទី ៤ ជំរុញដោយការចេញលក់ទូរស័ព្ទថ្មី ។ ការនាំចេញទូរស័ព្ទ iPhone 14 ស៊េរីនៅឆ្នាំនេះ ត្រូវបានគេរំពឹងថា នឹងឈានដល់ប្រហែល ៨៣.៥០ លានជាមួយនឹង iPhone 14 Max និង iPhone 14 Pro សង្ឃឹមថានឹងក្លាយជាម៉ូដែលក្តៅ ៕
