បរទេស៖ប្រធានាធិបតីចិន លោក ស៊ី ជីនពីង តាមសេចក្តីរាយការណ៍ បានស្នើឲ្យមានដំណោះស្រាយសមស្របមួយ ចំពោះវត្តមានប្រព័ន្ធការពារមីស៊ីល សហរដ្ឋអាមេរិកនៅលើឧបទ្វីបកូរ៉េ នៅក្នុងអំឡុងជំនួបកំពូលដ៏កម្រមួយ ជាមួយប្រធានាធិបតីកូរ៉េខាងត្បូង លោក មូន ជេអ៊ីន។
យោងតាមសេចក្តីរាយការណ៍មួយ ដែលចេញផ្សាយដោយទីភ្នាក់ងារ សារព័ត៌មានកូរ៉េខាងត្បូង Newsis នៅថ្ងៃចន្ទម្សិលមិញនេះ បានឲ្យដឹងថា នៅក្នុងអំឡុងជំនួប កំពូលក្នុងទីក្រុងប៉េកាំង លោក ស៊ី ជីនពីង បានលើកឡើងអំពីប្រព័ន្ធការពារ THAAD និងប្រព័ន្ធបាញ់របស់វា ដែលដាក់ប្រចាំការនៅកណ្ដាលប្រទេសកូរ៉េខាងត្បូង។
គួរបញ្ជាក់ថា ប្រទេសចិនតែងអះអាងថា ប្រព័ន្ធការពារមីស៊ីល សហរដ្ឋអាមេរិក THAAD នេះ គឺអាចត្រូវបានគេដាក់ប្រើប្រាស់ នៅក្នុងប្រទេសកូរ៉េខាងត្បូង ដើម្បីទុកសម្រាប់ធ្វើការឃ្លាំមើលសកម្មភាពយោធារបស់ប្រទេសចិន នៅក្នុងព្រំដែនរបស់ខ្លួន៕ ប្រែសម្រួល៖ប៉ាង កុង
