គឺជាការប្រកួតដែលត្រូវបានគេចាត់ទុកថា ជាការប្រកួតចុងក្រោយ នៃស្តេចបាល់ទាត់សម័យនេះ កីឡាករ CR7 និងម្ចាស់ជើងឯកពិភពលោក Messi ខណៈដែលវ័យរបស់ពួកគេកាន់តែជ្រេទៅហើយ ចំណែកឯក្លឹបរបស់ពួកគេដែលលេង ក៏ស្ថិតនៅក្នុងលីគ២ផ្សេងគ្នាដាច់ស្រឡះផងនោះ។
ការប្រកួតដែលត្រូវបានគេជឿជាក់ថា មានអ្នកចូលរួមទស្សនា ដល់ទៅរាប់លាននាក់មកពីជុំវិញពិភពលោក តាមកញ្ចក់ទូរទស្សន៍ បានបញ្ចប់ទៅដោយលទ្ធផលគួរឲ្យជក់ចិត្តបំផុត ទោះបីជា PSG យកឈ្នះ Al Nassr ក្នុងលទ្ធផល ៥ទល់នឹង៤ក្តី។
ការប្រកួតមិនទាន់បានប៉ុន្មាននាទីផង ចាប់ផ្តើមភ្លាម Messi រកបានមួយគ្រាប់នាំមុខមុន ប៉ុន្តែ CR7 ដែលធ្លាប់ជាកំពូលកីឡាករនៅទ្វីបអឺរ៉ុប តំណែងប្រហាក់ប្រហែលគ្នានឹង Messi នោះមិនទុកឲ្យលទ្ធផលនេះ អូសបន្លាយយូរឡើយ ដោយអាចស៊ុតបញ្ចូលទីបាន១គ្រាប់ តាមសងមកវិញភ្លាមផងដែរ។
ការប្រកួតបង្ហាញខ្លួនដំបូងរបស់ CR7 សម្រាប់ Al Nassr បញ្ចូលគ្នាជាមួយនឹងក្លឹប Al Hilal បានទទួលលទ្ធផលយ៉ាងល្អប្រសើរ ដោយសរុបគ្រាប់បាល់គាត់ធ្វើបាន២គ្រាប់ ចំណែកឯ Messi ត្រូវធ្វើដំណើរទៅបារាំងវិញ ដើម្បីបន្តបេសកកម្មរបស់ខ្លួន នៅក្នុងពេលវេលាដែលនៅសេសសល់។
ការប្រកួតដែលជឿជាក់ថា អាចជាការប្រកួតគួរឲ្យចង់ចាំបំផុត សម្រាប់កំពូលស្តេចបាល់ទាត់ទាំងពីរ ជួបគ្នាជាលើកចុងក្រោយ មុនពេលដែលពួកគេបញ្ចប់អាជីពជាផ្លូវការ ក្នុងរយៈពេលដ៏ខ្លីខាងមុខនេះ៕ ប្រែសម្រួល៖ស៊ុនលី
