គៀវ៖ ទីភ្នាក់ងារសារព័ត៌មាន Ukrinform ដែលគ្រប់គ្រងដោយរដ្ឋាភិបាលអ៊ុយក្រែន បានរាយការណ៍ ដោយដកស្រង់សម្តីមន្ត្រីយោធាប៉ូឡូញថា ទាហានអ៊ុយក្រែនសរុបចំនួន ១០៥ នាក់ បានទទួលការបណ្តុះបណ្តាល នៅក្នុងប្រទេសប៉ូឡូញ ដើម្បីរៀនពីរបៀបប្រើប្រាស់ រថក្រោះ Leopard 2 ។
លោក Krzysztof Sieradzki ប្រធានក្រុមហ្វឹកហ្វឺនកងពលតូចពាសដែក ទី១០ បានឲ្យដឹងថា ក្រុមនាវិករថក្រោះចំនួន ២១នាក់ រួមជាមួយបុគ្គលិកបច្ចេកទេស និងក្រុមថែទាំរថក្រោះ បានចាប់ផ្តើមការហ្វឹកហាត់របស់ពួកគេ នៅក្នុងប្រទេសប៉ូឡូញ កាលពីមួយសប្តាហ៍មុន ។
លោក Sieradzki បានបម្ដថា កងកម្លាំងអ៊ុយក្រែន ហ្វឹកហាត់ចន្លោះពី ១០ម៉ោងទៅ ១២ ម៉ោងក្នុងមួយថ្ងៃដោយប្រើរថក្រោះប៉ូឡូញ Leopard 2 និងម៉ូដែលដូចគ្នាដែលផ្គត់ផ្គង់ ដោយប្រទេសកាណាដា។
បើតាមលោក ការហ្វឹកហាត់នេះ នឹងមានរយៈពេលប្រហែលមួយខែ។ លោក Sieradzki មិនបានច្រានចោលថា ក្រុមទាហានអ៊ុយក្រែនថ្មី ក្រោយមកនឹងមកដល់ប្រទេសប៉ូឡូញ ដើម្បីហ្វឹកហាត់នោះទេ។
គួរបញ្ជាក់ថា កាលពីខែមុន រដ្ឋាភិបាលអាល្លឺម៉ង់ បានសម្រេចចិត្តផ្គត់ផ្គង់រថក្រោះប្រយុទ្ធ Leopard 2 របស់ខ្លួនទៅឱ្យអ៊ុយក្រែន និងសំណើសុំភ្លើងខៀវ ពីប្រទេសផ្សេងទៀត ដើម្បីធ្វើដូច្នេះដែរ៕ ប្រែសម្រួល ឈូក បូរ៉ា
