មូស្គូ: ទីភ្នាក់ងារសារព័ត៌មានTASS នៃប្រទេសរុស្ស៊ី បានធ្វើការរាយការណ៍ កាលពីថ្ងៃព្រហស្បតិ៍ម្សិលមិញថា កងកម្លាំងនៃប្រទេសរុស្ស៊ី បានចូលទៅ កាន់កាប់មូលដ្ឋានមួយ នៅជិតទីក្រុងរ៉ាកា របស់ប្រទេសស៊ីរី ដែលកន្លងមក ធ្លាប់ត្រូវបាន គ្រប់គ្រងដោយកងកម្លាំង សហរដ្ឋអាមេរិក។
កងកម្លាំងរុស្ស៊ី បានចូលទៅក្នុងទីក្រុង Raqqa ដែលជាអតីតរាជធានី នៃរដ្ឋអ៊ីស្លាម កាលពីដើមខែនេះ នៅពេលដែលទីក្រុងមូស្គូ បានចាប់ផ្តើមប្រញាប់ប្រញាល់ ក្នុងការចល័តទ័ពរបស់ខ្លួន ចូលទៅកន្លែងទំនេរ ដែលបានកើតឡើង ក្រោយការសម្រេចចិត្ត របស់ប្រធានាធិបតីអាមេរិក ដូណាល់ ត្រាំ ក្នុងការដកទ័ពអាមេរិក ចេញពីភាគខាងជើង ប្រទេសស៊ីរី នាពេលកន្លងមក។
ទីភ្នាក់ងារសារព័ត៌មានរដ្ឋដដែលនេះ បាននិយាយទៀតថា មូលដ្ឋាននោះ គឺជាអតីតសាលាយោធាមួយ ដែលមានទីតាំងស្ថិត នៅក្នុងភូមិ Tal Samin ស្ថិតនៅក្នុងតំបន់យុទ្ធសាស្ត្រ នៃផ្លូវបំបែកដែលភ្ជាប់ពីទីក្រុងរ៉ាកា ជាមួយប្រទេសស៊ីរី ភាគកណ្តាល និងតំបន់ភាគខាងជើង នៃប្រទេសផង៕ ប្រែសម្រួល:ស៊ុនលី
