ឥណ្ឌូណេស៊ី ៖ ប្រធានសមាគមកីឡាបាល់ទាត់ ឥណ្ឌូណេស៊ី (PSSI) លោក Erick Thohir បាននិយាយថា លោកនឹងមិនដាក់ពិន័យ សមាជិកណាម្នាក់ របស់ប្រទេសឥណ្ឌូណេស៊ី ពាក់ព័ន្ធនឹងការវាយតប់គ្នា ក្នុងការប្រកួតកីឡាបាល់ទាត់ SEA Games 32 ចុងក្រោយកាលពីសប្តាហ៍មុន នេះយោងតាមការចេញ ផ្សាយពីគេហទំព័រវៀតណាម ។
បន្ទាប់ពីការប៉ះទង្គិចគ្នា នៅវគ្គផ្តាច់ព្រ័ត្រកាលពីថ្ងៃទី ១៦ ខែឧសភា សមាគមបាល់ទាត់ថៃ (FAT) បានហាមឃាត់គ្រូបង្វឹក ២ នាក់ និងមន្ត្រីមកពីក្រុមថៃ រយៈពេលមួយឆ្នាំ និងព្យួរកីឡាករ ២ នាក់ សម្រាប់រយៈពេល ៦ ខែ ។ ទោះជាយ៉ាងណា PSSI បាននិយាយថា ពួកគេនឹងមិនធ្វើដូច្នេះទេ ព្រោះពួកគេជឿថា ប្រទេសថៃ បានផ្តួចផ្តើមការប៉ះទង្គិចគ្នានេះ ។
ហេតុអ្វីយើងត្រូវដាក់ទណ្ឌកម្ម កីឡាករ? លោក Thohir បាននិយាយក្នុងអំឡុង ពេលសន្និសីទកាសែត ក្នុងទីក្រុងហ្សាកាតា កាលពីរសៀលថ្ងៃពុធថា ពិតណាស់ យើងនឹងធ្វើការកែតម្រូវខ្លះៗ ប៉ុន្តែខ្ញុំគិតថា វាគ្រាន់តែជាទង្វើដោយឯកឯង នៅពេលកីឡាករមានការខឹងសម្បារ ហើយវាអាចអត់ឱនបាន។ លោក Thohir បានបញ្ជាក់ថា ទំនាក់ទំនងបាល់ទាត់ រវាងឥណ្ឌូណេស៊ី និងថៃ វៀតណាម និងប្រទេសដទៃទៀតគឺល្អណាស់ ។ លោកគោរពការសម្រេចចិត្ត របស់ FAT ប៉ុន្តែសង្កត់ធ្ងន់ថា PSSI មានគំនិតផ្ទាល់ខ្លួន ។
បន្ទាប់ពីការសម្រេចចិត្ត របស់ FAT កាលពីថ្ងៃច័ន្ទ អ្នកគាំទ្រជាច្រើនបានលើកឡើងថា យ៉ាងហោចណាស់កីឡាករឥណ្ឌូនេស៊ី ៣នាក់ និងជំនួយការគ្រូបង្វឹក សមនឹងទទួលបានការពិន័យ រួមទាំងខ្សែប្រយុទ្ធ Titan Agung និង Ramadhan Sananta ក៏ដូចជាខ្សែបម្រើ Komang Agung ផងដែរ។ ការប្រកួតចុងក្រោយ បានចាប់ផ្តើមនៅចុងបញ្ចប់ នៃតង់ទី២ នៅពេលអាជ្ញាកណ្តាលផ្លុំកញ្ចែឲ្យថៃ ទាត់បាល់ហ្វ្រីឃីក ប៉ុន្តែបានធ្វើឲ្យឥណ្ឌូនេស៊ី គិតថាដល់ពេលហើយ ៕
