វ៉ាស៊ីនតោន ៖ ប្រធានាធិបតីអាមេរិក លោក ចូ បៃដិន បានឲ្យដឹងថា សហរដ្ឋអាមេរិក និងសម្ព័ន្ធមិត្តរបស់ខ្លួន មិនជាប់ពាក់ព័ន្ធនឹងការបះបោរប្រដាប់អាវុធប្រឆាំងនឹងបញ្ជាការ យោធារបស់រុស្ស៊ី ដោយទាហានស៊ីឈ្នួលនោះទេ ខណៈដែលប្រទេសជាច្រើន កំពុងតាមដានយ៉ាងជិតស្និទ្ធ អំពីផលប៉ះពាល់ ដែលអាចកើតមាននៃព្រឹត្តិការណ៍ នៅចុងសប្តាហ៍។
នៅក្នុងការអត្ថាធិប្បាយ ជាសាធារណៈលើកដំបូងរបស់លោក ចាប់តាំងពីការបះបោររបស់ក្រុម Wagner លោក បៃដិន បានឲ្យដឹងថា លោកនិងសម្ព័ន្ធមិត្តសំខាន់ៗ បានព្រមព្រៀងគ្នាថា នឹងមិនផ្តល់ឱ្យប្រធានាធិបតីរុស្ស៊ីលោក វ្លាឌីមៀ ពូទីន នូវលេសណាមួយ ដើម្បីបន្ទោសការអភិវឌ្ឍន៍ លើលោកខាងលិច ឬអង្គការសន្ធិសញ្ញាអាត្លង់ទិក ខាងជើងនោះទេ ។
លោក បៃដិន បានឲ្យដឹងនៅឯសេតវិមានថា “យើងបានបញ្ជាក់យ៉ាងច្បាស់ថា យើងមិនជាប់ពាក់ព័ន្ធនោះទេ យើងមិនមានអ្វីពាក់ព័ន្ធជាមួយវានោះទេ “នេះគឺជាផ្នែកមួយ នៃការតស៊ូ នៅក្នុងប្រព័ន្ធរុស្ស៊ី” ។
ប្រធានាធិបតីបានប្រុងប្រយ័ត្ន ក្នុងការជ្រើសរើសពាក្យ របស់លោក អំពីការបះបោរដែលស្មើនឹងការគំរាមកំហែងធ្ងន់ធ្ងរបំផុត ចំពោះលោក ពូទីន ក្នុងរយៈពេលជាច្រើនឆ្នាំដោយសង្កត់ធ្ងន់ថា ផលប៉ះពាល់ដែលវាអាចមានលើរុស្ស៊ី នៅតែត្រូវបានគេមើលឃើញ។
លោកបានបន្តថា “យើងនឹងបន្តវាយតម្លៃការធ្លាក់ចុះ នៃព្រឹត្តិការណ៍ចុងសប្តាហ៍នេះ និងផលប៉ះពាល់ ចំពោះរុស្ស៊ី និងអ៊ុយក្រែន ប៉ុន្តែវានៅតែលឿនពេកក្នុងការឈានដល់ការ សន្និដ្ឋានច្បាស់លាស់អំពីកន្លែងដែលវានឹងទៅ”។
បន្ទាប់ពីបានដឹកនាំការបះបោរក្នុងរយៈពេលខ្លី ស្ថាបនិកក្រុមប៉ារ៉ាយោធា លោក Yevgeny Prigozhin ស្រាប់តែបានប្រកាសកាលពីល្ងាចថ្ងៃសៅរ៍ថា លោកកំពុងអំពាវនាវកុំឱ្យមានការរុលទៅមុខនៃយុទ្ធជនរបស់ខ្លួនទៅកាន់ទីក្រុងមូស្គូ ដើម្បីបញ្ចៀសការបង្ហូរឈាម៕
ប្រែសម្រួល ឈូក បូរ៉ា
