បរទេស៖ ឆ្មាំឆ្នេរសមុទ្រអាមេរិកនិយាយថា ខ្លួនទំនងជាបានយកសាកសព មនុស្សចេញពីបំណែកនៃនាវាមុជទឹក Titan ហើយកំពុងនាំយកភស្តុតាង ត្រឡប់ទៅសហរដ្ឋអាមេរិកវិញ។
យោងតាមសារព័ត៌មាន VOA ចេញផ្សាយកាលពីថ្ងៃទី២៨ ខែមិថុនា ឆ្នាំ២០២៣ បានឱ្យដឹងថា នាវាមុជទឹកបានផ្ទុះកាលពីសប្តាហ៍មុន ដោយបានសម្លាប់មនុស្សទាំងអស់៥នាក់ នៅលើនោះ។ កប៉ាល់ Titan បានធ្វើដំណើរទៅមើលបំណែក នៃកប៉ាល់ទីតានិច។
កំទេចកំទីរបស់កប៉ាល់ Titan ដែលយកត្រលប់មកកំពង់ផែនៅ St. John’s, Newfoundland និង Labrador កាលពីថ្ងៃពុធគឺជាបំណែកសំខាន់ នៃការស៊ើបអង្កេតទៅលើមូលហេតុ ដែលនាវាមុជទឹកនេះបានផ្ទុះ។ កំណាត់តូចៗនៃនាវាមុជទឹកប្រវែង ២២ ហ្វីត ត្រូវបានគេដកចេញនៅកំពង់ផែឆ្មាំសមុទ្រកាណាដា។
ឆ្មាំឆ្នេរសមុទ្រអាមេរិក បាននិយាយកាលពីល្ងាចថ្ងៃពុធថា ខ្លួនបានរកឃើញកំទេចកំទី និងភ័ស្តុតាងពីបាតសមុទ្រ ហើយនោះរួមបញ្ចូលនូវអ្វី ដែលខ្លួនបានពិពណ៌នាថា ជាសាកសពមនុស្ស។
លោក Jason Neubauer ប្រធានឆ្មាំសមុទ្រអាមេរិក បាននិយាយនៅក្នុងសេចក្តីថ្លែងការណ៍មួយ«ខ្ញុំមានអំណរគុណ ចំពោះការសម្របសម្រួលអន្តរជាតិ និងអន្តរការីគាំទ្រដើម្បីស្ដារ និងរក្សាភស្តុតាងដ៏សំខាន់នេះ នៅចម្ងាយ និងជម្រៅជ្រៅបំផុតនៅឈូងសមុទ្រ»។ “ភស្តុតាងនឹងផ្តល់ឱ្យអ្នកស៊ើបអង្កេត ពីយុត្តាធិការអន្តរជាតិមួយចំនួននូវការយល់ដឹងសំខាន់ៗ អំពីមូលហេតុនៃសោកនាដកម្មនេះ។ នៅមានការងារជាច្រើន ដែលត្រូវធ្វើដើម្បីស្វែងយល់ពីកត្តា ដែលនាំឱ្យបាត់បង់មហន្តរាយនៃកប៉ាល់ Titan និងជួយធានាចំពោះសោកនាដកម្មស្រដៀងគ្នា មិនកើតឡើងទៀតទេ»។
កប៉ាល់ Horizon Arctic របស់ប្រទេសកាណាដា បានដឹកយានបញ្ជាពីចម្ងាយ ឬ ROV ដើម្បីស្វែងរកនៅបាតសមុទ្រនៅជិតបំណែក នៃបំណែកនៃនាវាមុជទឹក។ Pelagic Research Services ដែលជាក្រុមហ៊ុនដែលមានការិយាល័យនៅរដ្ឋ Massachusetts និង New York ដែលជាម្ចាស់ ROV បាននិយាយកាលពីថ្ងៃពុធថា ខ្លួនបានបញ្ចប់ប្រតិបត្តិការ នៅឯនាយសមុទ្រហើយ៕ ប្រែសម្រួលៈ ណៃ តុលា
