ភ្នំពេញ៖នៅព្រឹកថ្ងៃអាទិត្យទី៥ ខែមករា ឆ្នាំ២០២០ ស្ថានីយទូរទស្សន៍ PNN សហការសហព័ន្ធកីឡាប្រដាល់គុនខ្មែរប្រកាស ជាផ្លូវការ ការដណ្ដើមខ្សែក្រវាត់មាសរដូវកាថ្មីទម្ងន់ ៥៧គីឡូក្រាម “អធិរាជគុនខ្មែរ ISI PALM” ដោយមានវត្តមានចូលរួមពី សំណាក់លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ លោក ម៉ិល កាដូ តំណាងក្រសួងអប់រំយុវជន និងកីឡា លោក តុប សុខា ប្រធានផ្នែកលក់ក្រុមហ៊ុន និងលោក ស្រ៊ឺ ស្រេង ប្រធានផ្នែកកីឡាPNN។
អធិរាជគុនខ្មែរ ISI PALM- ISI PIPE ជាកម្មវិធីដ៏គួរឲ្យចាប់អារម្មណ៍ បំផុតនិងប្រកបដោយការលើកទឹកចិត្តក្រៃលែងដល់កីឡាករគុនខ្មែរ និងជួយលើកស្ទួយមុខមាត់គុនខ្មែរ យ៉ាងពិសេស តាមរយៈប្រាក់រង្វាន់៤០លានរៀល (១០,០០០ដុល្លារអាមេរិក)សម្រាប់ផ្ដល់ជូនម្ចាស់ខ្សែក្រវាត់មាស និង៤លានរៀលសម្រាប់ម្ចាស់ខ្សែក្រវាត់ ប្រាក់ទាំង៤ក្នុងវគ្គជម្រុះ។
ជាក់ស្ដែង ក្នុងរដូវកាលទី១កន្លងទៅ ក្នុងប្រភេទទម្ងន់៦០ គីឡូក្រាម កំពូលជើងខ្លាំង ឡៅ ចិត្រា បានគ្រងខ្សែក្រវាត់មាសដ៏ស្រស់ចែងចាំងនិងមានតម្លៃយ៉ាងខ្លាំង ក្នុងកម្មវិធី«អធិរាជគុនខ្មែរ ISI PALM – ISI PIPE» ជាមួយប្រាក់រង្វាន់៤០លានរៀល ក្នុងការប្រកួតត្រឹម៤ប្រកួតតែប៉ុណ្ណោះ។ លើសពីនេះ ឡៅ ចិត្រា ក៏បានប្រាក់រង្វាន់៤លានរៀល ផ្សេងទៀតកាលឈ្នះខ្សែក្រវាត់ប្រាក់ ព្រមជាមួយ លន បញ្ញា, ឡុង ជិន និង សុខ សាវិន ផងដែរ។
គ្រុឌកំណាចដែលជាអ្នកស្នងគុនខ្មែរលំដាប់កំពូលក្នុងប្រភេទ ទម្ងន់៥៧គីឡូក្រាម៨រូបដូចជា ម៉ន សាម៉េត, អេលីត ចំរើន, ប៊ុន សុធា, ឃួន ឡាំងកូស៊ីន, អេ ណារ័ត្ន, វ៉ាន់ វឿន, ពេជ្រ ម្ទេសខ្មាំង, លាភ រដ្ឋា នឹងតតាំងជាមួយ នាគរាជឆ្លងដែនមកពីថៃ៨នាក់ ឃុមផ្យាក់, ឃុមភីឈិត, ណាខនហ្លួង, កាំឡៃយុគ, ផៃងិន, ភិតឈុមភុន, ផ្យាក់អ៊ិនស៊ី និង ចៅផាហ៊ិន ក្នុងរូបមន្តចាញ់ធ្លាក់ ឈ្នះឡើង ដោយគ្មានសន្សំពិន្ទុអ្វីឡើយ។
រៀងរាល់ខែ កីឡាករកម្ពុជា២រូបនឹងតតាំង ជាមួយកីឡាករថៃ២រូប ហើយអ្នកឈ្នះនឹងឡើងប្រកួតដណ្ដើមខ្សែក្រវាត់ប្រាក់ប្រចាំខែទល់ នឹងអ្នកឈ្នះដូចគ្នា។ ក្រោយប្រកួត បែបនេះជាបន្តបន្ទាប់ រហូតរកឃើញជើងខ្លាំង បំផុតទាំង៤ ជាម្ចាស់ខ្សែក្រវាត់ប្រាក់ ពួកគេ នឹងតតាំងគ្នាក្នុងវគ្គពាក់កណ្ដាលផ្ដាច់ព្រ័ត្រដើម្បី ឆ្ពោះទៅដណ្ដើម ខ្សែក្រវាត់មាស យកប្រាក់ រង្វាន់ ៤០លានរៀល៕ ដោយ៖លី ភីលីព
