វៀតណាម៖ យោងតាមការចេញផ្សាយពីគេហទំព័រ VN Express បានប្រាប់ឲ្យដឹងថា ក្រុមបាល់ទះបុរសជម្រើសជាតិវៀតណាម បានឡើងដល់កំពូលទី ៥៦ ក្នុងចំណាត់ថ្នាក់របស់សហព័ន្ធបាល់ទះអន្តរជាតិ (FIVB) និងឈរនៅកំពូលអាស៊ីអាគ្នេយ៍។
ក្រុមនេះបានអវត្តមានក្នុងចំណាត់ថ្នាក់ FIVB បន្ទាប់ពីមិនបានចូលរួមប្រកួតជាលក្ខណៈអន្តរជាតិអស់រយៈពេលជាយូរ។ នៅពេលក្រុមលេងក្នុងការប្រកួត AVC (Asian Volleyball Championships) Challenge Cup 2023 នៅតៃវ៉ាន់នាខែនេះ ពួកគេត្រូវបានបន្ថែម ៥០ ពិន្ទុ។
ការប្រកួតនេះ វៀតណាមបានចាញ់អូស្ត្រាលី ១-៣ ក្នុងវគ្គចែកពូល និងចាញ់ ១.០៧ ពិន្ទុ។ ប៉ុន្តែក្រុមនេះបានឈ្នះ ៣-១ ដ៏គួរឲ្យភ្ញាក់ផ្អើលជាមួយម្ចាស់ផ្ទះតៃវ៉ាន់មានចំណាត់ថ្នាក់ទី ៤៤ ក្នុងចំណាត់ថ្នាក់ពិភពលោក ហើយនេះបានធ្វើឲ្យពួកគេទទួលបាន ២.៣៧ ពិន្ទុ។
ប្រទេសវៀតណាមមាន ៥៨.៣ ពិន្ទុ បានកើនឡើងដល់ ៥៦ ក្នុងចំណាត់ថ្នាក់ពិភពលោក និងឈរនៅកំពូលអាស៊ីអាគ្នេយ៍ តាមពីក្រោយដោយប្រទេសឥណ្ឌូនេស៊ីមាន ៤៣.៧៩ ពិន្ទុ និងប្រទេសថៃមាន ៤៣.៥៦ ទោះជាយ៉ាងណាក៏ដោយ នេះមិនឆ្លុះបញ្ចាំងពីកម្រិតពិតរបស់ថៃ និងឥណ្ឌូនេស៊ី ត្រូវបានចាត់ទុកថាខ្លាំងជាងវៀតណាមនោះទេ។
ទាំងថៃ និងឥណ្ឌូណេស៊ី បានចាញ់ពិន្ទុ និងទម្លាក់ចំណាត់ថ្នាក់ ដោយសារពួកគេបានចូលរួមការប្រកួតជាច្រើននៅឆ្នាំនេះ ខណៈ AVC Challenge Cup ជាការប្រកួតអន្តរជាតិលើកដំបូងរបស់វៀតណាម បន្ទាប់ពីអស់រយៈពេលយូរ។ សំណាងក៏បាននៅលើក្រុមវៀតណាមក្នុងការប្រកួតពានរង្វាន់ AVC Challenge Cup ជាលើកដំបូងដែរ បន្ទាប់ពីប៉ាគីស្ថានដកខ្លួនចេញពីការប្រកួតនោះ មានតែវៀតណាម អូស្ត្រាលី និងតៃវ៉ាន់ប៉ុណ្ណោះក្នុងពូល E។ ការទទួលជ័យជម្នះលើតៃវ៉ាន់បានជួយវៀតណាមឡើងទៅវគ្គពាក់កណ្តាលផ្តាច់ព្រ័ត្រ។
គូប្រកួតវៀតណាមនៅវគ្គពាក់កណ្តាលផ្តាច់ព្រ័ត្រនឹងជាគូប្រជែងខ្លាំងថៃ។
ការប្រកួត SEA Games លើកទី៣២ វៀតណាមចាញ់ថៃ ០-៣ ក្នុងវគ្គចែកពូល បន្ទាប់មកឈ្នះ ៣-០ ក្នុងវគ្គ Playoff។ វគ្គពាក់កណ្តាលផ្តាច់ព្រ័ត្រមួយទៀតគឺរវាងកូរ៉េខាងត្បូង និងបារ៉ែន។
ការប្រកួត AVC Challenge Cup 2023 នឹងប្រព្រឹត្តទៅចាប់ពីថ្ងៃទី ៨-១៥ ខែកក្កដា។
អ្នកឈ្នះនឹងមានសិទ្ធិការប្រកួត FIVB Challenger Cup ឆ្នាំ 2023 នៅប្រទេសកាតា។
ក្នុងវិញ្ញាសានារី វៀតណាមបានឈ្នះពានជាលើកដំបូង បន្ទាប់ពីយកឈ្នះឥណ្ឌូនេស៊ី ៣-២ នៅវគ្គផ្ដាច់ព្រ័ត្រ។ ក្រុមនេះនឹងចូលរួមប្រកួតក្នុងពានរង្វាន់ FIVB Challenger Cup 2023 សម្រាប់ស្ត្រីនៅប្រទេសបារាំងពីថ្ងៃទី ២៧-៣០ ខែកក្កដា៕ ដោយ៖លី ភីលីព
