សេអ៊ូល៖ តុលាការកំពូលរបស់ប្រទេសកូរ៉េខាងត្បូង បានសម្រេចថា ព្រះពុទ្ធបដិមាមួយអង្គ ដែលត្រូវបានលួចពីប្រាសាទជប៉ុនកាលពីឆ្នាំ២០១២ ជាកម្មសិទ្ធិរបស់ប្រាសាទនេះ ដោយបានច្រានចោលការអះអាងរបស់ប្រាសាទកូរ៉េខាងត្បូងចំពោះកម្មសិទ្ធិរបស់ខ្លួន។
ការសម្រេចចិត្តលើរូបសំណាកសតវត្សរ៍ទី១៤ បានធ្វើតាមការសម្រេចស្រដៀងគ្នាដោយតុលាការជាន់ខ្ពស់ Daejeon កាលពីខែកុម្ភៈ។ រូបសំណាកនេះត្រូវចោរជាជនជាតិកូរ៉េខាងត្បូងលួច ហើយត្រូវបានយកមកវិញដោយអាជ្ញាធរកូរ៉េខាងត្បូង ក្នុងឆ្នាំ២០១៣។
សេចក្តីសម្រេចរបស់តុលាការកំពូល ធ្វើឡើងចំពេលដែលទំនាក់ទំនងជប៉ុន-កូរ៉េខាងត្បូង មានភាពប្រសើរឡើង បន្ទាប់ពីទីក្រុងសេអ៊ូល បានសន្យាថា នឹងដោះស្រាយវិវាទការងារក្នុងសម័យសង្គ្រាមដ៏រ៉ាំរ៉ៃជាមួយទីក្រុងតូក្យូ។
ក្នុងឆ្នាំ២០១៧ តុលាការស្រុក Daejeon បានបញ្ជាឱ្យយករូបសំណាក ដែលលួចពីប្រាសាទ Kannonji ដែលជាប្រាសាទនៅលើកោះ Tsushima របស់ប្រទេសជប៉ុន ក្នុងខេត្តណាហ្គាសាគី ឱ្យប្រគល់ទៅឱ្យប្រាសាទ Buseok ក្នុងទីក្រុង Seosan ភាគនិរតីនៃទីក្រុងសេអ៊ូល ដែលនាំឱ្យទំនាក់ទំនងទ្វេភាគីកាន់តែអាក្រក់ទៅៗ។
ប្រាសាទកូរ៉េខាងត្បូង បានអះអាងថា រូបសំណាកនេះត្រូវបានចោរសមុទ្រជប៉ុន លួចពីរាប់រយឆ្នាំមុន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ៕ ប្រែសម្រួល ឈូក បូរ៉ា
