ចិន៖ វេទិកាវីដេអូខ្លី TikTok គ្រប់គ្រងដោយបច្ចេកវិទ្យាទម្ងន់ធ្ងន់របស់ចិន ByteDance បានប្រកាសកាលពីថ្ងៃសុក្រថា ខ្លួនគ្រោងនឹងវិនិយោគច្រើនជាង ១២ ពាន់លានអឺរ៉ូ (១៣.១ ពាន់លានដុល្លារ) នៅអឺរ៉ុប ក្នុងរយៈពេល ១០ ឆ្នាំខាងមុខ ដើម្បីរក្សាទុកទិន្នន័យអ្នកប្រើប្រាស់អឺរ៉ុប នៅលើម៉ាស៊ីនមេក្នុងស្រុក ព្រមទំាងអនុលោមតាមបទប្បញ្ញត្តិក្នុងស្រុកបានប្រសើរជាងមុន និងដោះស្រាយកង្វល់ជុំវិញសុវត្ថិភាពទិន្នន័យ។
ពួកគេបានបន្ថែមថា ក្រុមហ៊ុនអ៊ីនធើណេត និងបច្ចេកវិទ្យារបស់ចិនធ្វើការចូលទៅក្នុងទីផ្សារក្រៅប្រទេស គួរតែភ្ជាប់សារសំខាន់យ៉ាងខ្លាំងក្នុងការធានាសុវត្ថិភាពនៃភាពឯកជនរបស់អ្នកប្រើប្រាស់ និងខិតខំកាត់បន្ថយហានិភ័យអាចកើតមានទាក់ទងនឹងការបញ្ជូនទិន្នន័យឆ្លងព្រំដែន។
TikTok បាននិយាយក្នុងសេចក្តីថ្លែងការណ៍មួយនៅលើគេហទំព័រផ្លូវការរបស់ខ្លួនថា កម្មវិធីដែលមានឈ្មោះថា Project Clover នឹងចំណាយលើការកសាងមជ្ឈមណ្ឌលទិន្នន័យចំនួន៣ ការអនុវត្តបច្ចេកវិទ្យាបង្កើនភាពឯកជន និងការងាររបស់ក្រុមហ៊ុនសន្តិសុខភាគីទី៣ ឯករាជ្យ និងNCC Group ដើម្បីត្រួតពិនិត្យ និងផ្ទៀងផ្ទាត់ការគ្រប់គ្រង និងការការពារទិន្នន័យ ក៏ដូចជាតាមដានលំហូរទិន្នន័យ។
TikTok ក៏បានបង្ហាញពីផែនការសម្រាប់មជ្ឈមណ្ឌលទិន្នន័យទី២របស់ខ្លួនក្នុងប្រទេសអៀរឡង់ និងទី៣នៅតំបន់ Hamar នៃប្រទេសន័រវេស។ កាលពីឆ្នាំមុន ក្រុមហ៊ុនបានបង្កើតមជ្ឈមណ្ឌលទិន្នន័យអឺរ៉ុប ដំបូងរបស់ខ្លួននៅទីក្រុង Dublin ប្រទេសអៀរឡង់ ជាកន្លែងដែលការធ្វើចំណាកស្រុក នៃទិន្នន័យអ្នកប្រើប្រាស់អឺរ៉ុបបានចាប់ផ្តើមនៅក្នុងខែកញ្ញា។ TikTok រំពឹងថាដំណើរការនេះនឹងបញ្ចប់នៅចុងឆ្នាំ ២០២៤ ៕ ដោយ៖លី ភីលីព
