កាហ្សាក់ស្ថាន ៖ តុលាការនៅប្រទេស កាហ្សាក់ស្ថាន កាលពីថ្ងៃចន្ទបានកាត់ទោស អតីតរដ្ឋមន្ត្រីគណៈរដ្ឋមន្ត្រីលោក Kuandyk Bishimbayev អាយុ ៤៤ ឆ្នាំឲ្យជាប់ពន្ធនាគាររយៈពេល ២៤ ឆ្នាំពីបទវាយដំប្រពន្ធ របស់លោកយ៉ាងព្រៃផ្សៃ រហូតដល់ស្លាប់ បន្ទាប់ពីរកឃើញ មានពិរុទ្ធពីបទធ្វើទារុណកម្ម និងឃាតកម្មលើលោក គឺលោកស្រី Saltanat Nukenova អាយុ ៣១ ឆ្នាំ ។
ឃាតកម្មដ៏គួរឲ្យតក់ស្លុតនេះ បានកើតឡើងកាលពីដើមខែវិច្ឆិកា ឆ្នាំមុន នៅភោជនីយដ្ឋាន មួយក្នុងរដ្ឋធានី Astana របស់ប្រទេសនេះ ជាក់ស្តែងអ្នកទាំង២នាក់ បានជួបគ្នា ដើម្បីដោះស្រាយបញ្ហា របស់ពួកគេ មុនពេល ដែលលោក Bishimbayev ស្រវឹងបានសម្លាប់ស្ត្រីនោះ ។
ភស្តុតាងបង្ហាញដល់តុលាការបានបង្ហាញថា លោកស្រី Nukenova បានព្យាយាមចាកចេញពីប្តីរបស់លោកស្រីជាច្រើនដងដោយអះអាងថា លោកបានវាយលោកស្រីជាច្រើនដង ។
ខ្សែអាត់វីដេអូ CCTV ដែលចាក់កំឡុងពេលកាត់ក្តី ត្រូវបានគេរាយការណ៍ថា បានបង្ហាញលោក Bishimbayev ដាល់ និង ទាត់ប្រពន្ធ របស់លោកម្តងហើយម្តងទៀត ហើយអូសនាងចូលទៅក្នុងបន្ទប់ ដោយកាន់សក់របស់នាង ខណៈនាងស្ទើរតែស្រាតកាយ ។ វីដេអូ CCTV ដែលអតីតរដ្ឋមន្ត្រីព្យាយាមបំផ្លាញនោះ ត្រូវបានគេរាយការណ៍ថា មានក្រាហ្វិកខ្លាំង ដែលសមាជិកនៃគណៈវិនិច្ឆ័យត្រូវស្រក់ទឹកភ្នែក ពេលកំពុងមើលវា។
វីដេអូក៏ត្រូវបានរកឃើញនៅលើទូរសព្ទដៃរបស់លោក Bishimbayev បង្ហាញ ពីលោកអាម៉ាស់មុខ និងជេរប្រមាថប្រពន្ធ របស់លោកដែលឃើញស្នាមជាំ នាម៉ោងចុងក្រោយមុន ពេលលោកស្រីស្លាប់ ។
ក្នុងអំឡុងពេលសវនាការ Bishimbayev បានសារភាពថា បានវាយប្រពន្ធរបស់លោក ប៉ុន្តែបានបដិសេធ ការធ្វើទារុណកម្ម ឬរៀបចំផែនការ សម្លាប់លោកស្រី។ លោកក៏បានអះអាងដែរថា របួសខ្លះរបស់នាងគឺធ្វើឲ្យខ្លួនឯងរងរបួស ។
ឃាតកម្មនេះបានបង្ក ឲ្យមានការថ្កោលទោសជាសាធារណៈ និងបានជួយបង្កើតការគាំទ្រ ដល់ច្បាប់ដែលទើបអនុម័តថ្មីៗនេះ ពីបទឧក្រិដ្ឋកម្មអំពើហិង្សា ក្នុងគ្រួសារ ។ លោក Bishimbayev ត្រូវបានកាត់ទោសនៅទីបំផុតពីបទឃាតកម្ម ដោយភាពឃោរឃៅបំផុរ និងការធ្វើទារុណកម្ម ប៉ុន្តែការជាប់ ពន្ធនាគារ ដែលលោកបានទទួល គឺតិចជាងការកាត់ទោសមួយជីវិត ដែលគ្រួសាររបស់ប្រពន្ធរបស់លោកបានទាមទារ ។
បងប្អូនជីដូនមួយ របស់អ្នកនយោបាយឈ្មោះ Bakytzhan Baizhanov ត្រូវបានជាប់ពន្ធនាគាររយៈពេល ៤ ឆ្នាំពីបទជួយលោកបិទបាំងឧក្រិដ្ឋកម្ម។ លោក Bishimbayev បានបម្រើការជារដ្ឋមន្ត្រីសេដ្ឋកិច្ចរបស់ប្រទេសកាហ្សាក់ស្ថានចាប់ពីខែឧសភាដល់ខែធ្នូឆ្នាំ ២០១៦ ក្រោមការដឹកនាំរបស់ប្រធានាធិបតី Nursultan Nazarbayev ដែលពេលនោះគាត់ត្រូវបានគេរាយការណ៍ថា មានទំនាក់ទំនងជិតស្និទ្ធ៕
ដោយ៖លី ភីលីព
