ភ្នំពេញ៖ ក្លិបកីឡាវ៉ូវីណាមតារាជអង្គរ (ខេត្តសៀមរាប)គ្រងតំណែងជើងឯកនៃព្រឹត្តិការណ៍ ប្រកួតកីឡាវ៉ូវីណាមជ្រើសរើសជើងឯកថ្នាក់ជាតិ សម្រាប់ឆ្នាំ២០១៩ បន្ទាប់ពីដណ្តើមបានមេដាយជាងគេ បន្ទាប់មកគឺក្លិបកីឡាវ៉ូវីណាមក្រសួងការពារជាតិ និងក្រសួងមហាផ្ទៃទទួលបានជើងឯករងដូចគ្នាក្នុងពហុកីឡដ្ឋានជាតិ រាជធានីភ្នំពេញដោយមាន ២0 វិញ្ញាសាមាន ៨ ក្លិបចូលរួមតែប៉ុណ្ណោះ។
ក្នុងឳកាសពិធីបិទ និងប្រគល់ជយលាភីនាល្ងាចថ្ងៃទី២៣ ខែមករា ឆ្នាំ២០២០ ដោយមានការអញ្ជើញពីសំណាក់លោក អ៊ុក សិទ្ធិជាតិ អគ្គនាយកនៃអគ្គនាយកដ្ឋានកីឡា និងលោក ស៊ូម សារឿន ក្លាយជាប្រធានសហព័ន្ធកីឡាវ៉ូវីណាមកម្ពុជាថ្មីនៅមជ្ឈមណ្ឌលជាតិហ្វឹហ្វឺនកីឡា។
សម្រាប់ក្លិបកីឡាវ៉ូវីណាមតារាជអង្គរ (ខេត្តសៀមរាប)ដណ្តើមបានមេដាយចំនួន១៣គ្រឿង មានមេដាយមាស៤ គ្រឿង ប្រាក់៥គ្រឿង និងសំរិទ្ធ៤គ្រឿង ក្លិបកីឡាវ៉ូវីណាមក្រសួងមហាផ្ទៃ និងក្លិបកីឡាវ៉ូវីណាមក្រសួងការពារជាតិដណ្តើមបានមេដាយចំនួន៨គ្រឿងក្នុងនោះមេដាយមាស៤ គ្រឿង ប្រាក់៣គ្រឿង និងសំរិទ្ធ១គ្រឿង។
ចំណែកក្លិបកីឡាវ៉ូវីណាមវិទ្យាល័យច្បារអំពៅដណ្តើមបានមេដាយចំនួន១០ រួមមានមេដាយមាស៣គ្រឿង ប្រាក់២គ្រឿង និងសំរិទ្ធ៥គ្រឿង និងក្លិបកីឡាវ៉ូវីណាមអង្គការសង្គ្រោះកុមារដណ្តើមបានមេដាយចំនួន១៣គ្រឿង មេដាយមាស៣គ្រឿង ប្រាក់១គ្រឿង សំរិទ្ធ៩គ្រឿង ។
ដោយឡែកក្លិបកីឡាវ៉ូវីណាមតាឡី កុមារដណ្តើមបានមេដាយចំនួន៦គ្រឿង មេដាយមាស១គ្រឿង ប្រាក់១គ្រឿង សំរិទ្ធ៤គ្រឿង ក្លិបកីឡាវ៉ូវីណាមខេត្តប៉ៃលិនដណ្តើមបានមេដាយចំនួន៥ មេដាយមាស១គ្រឿង និងសំរិទ្ធ៤គ្រឿង និងក្លិបកីឡាវ៉ូវីណាមវិទ្យាល័យវត្តកោះដណ្តើមបានមេដាយចំនួន៧ មេដាយប្រាក់៥គ្រឿង និងសំរិទ្ធ២គ្រឿង៕
