ប៉ារីស៖ ប៉ូលិសបារាំងបាននិយាយកាលពីថ្ងៃចន្ទថា មនុស្ស ៤នាក់ បានស្លាប់ក្នុងគ្រោះថ្នាក់ចរាចរណ៍នៅប្រទេសបារាំង បន្ទាប់ពីរថយន្ត Tesla របស់ពួកគេត្រូវបានគេរាយការណ៍ថា បានបុកផ្លាកសញ្ញាផ្លូវមួយ ហើយបានឆាបឆេះ យោងតាមការចេញផ្សាយពីគេហទំព័រ Japan Today ។
អ្នកនាំពាក្យប៉ូលីសក្នុងតំបន់ លោក Lt. Eric Hoarau បាននិយាយថា កាលៈទេសៈពិតប្រាកដនៃការធ្លាក់រថយន្ត កាលពីយប់ថ្ងៃសៅរ៍នៅជិតទីក្រុង Niort នៅតែត្រូវបានកំណត់ ហើយការស៊ើបអង្កេតកំពុងដំណើរការ។
លោក Hoarau បានបន្តថា អ្វីគ្រប់យ៉ាងដែលបង្ហាញថា រថយន្ត Tesla របស់ក្រុមហ៊ុនផលិតរថយន្តយក្សអាមេរិកបានចេញពីផ្លូវ ហើយគ្មានសាក្សីទេ ដែលធ្វើឲ្យការស៊ើបអង្កេតមានភាពស្មុគស្មាញ។ ចំណែកអ្នកបើកបរ និងអ្នករួមដំណើរ ៣នាក់ ត្រូវបានឆេះស្លាប់តែម្តង។
រីឯក្រុមហ៊ុនផលិតរថយន្តយក្សអាមេរិក Tesla របស់លោក Elon Musk មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ៕
