លោក Hansi Flick អ្នកចាត់ការ របស់ក្រុមអ្នកមានបុណ្យ Barcelona បានធ្វើការសរសើរ ទៅកាន់ខ្សែបម្រើស្លាប Raphina ថាល្អមិនដាច់ពីមាត់នោះទេ ក្នុងការប្រកួតទល់ក្រុម Bayern Munich ដោយសារតែក្រុមខ្លួនបានយកឈ្នះ ៤-១ ហើយក្នុងចំណោម៤គ្រាប់នោះ Raphina ធ្វើបាន Hat-Trick (ស៊ុត៣គ្រាប់ម្នាក់ឯង) ក្នុងការប្រកួតសន្សំពិន្ទុសប្ដាហ៍ទី៣ UEFA Champions League កាលពីយប់ថ្ងៃទី២៣ ឈានចូលថ្ងៃទី២៤ ខែតុលា ឆ្នាំ២០២៤ ។
ក្រោយប្រកួតចប់លោក Hansi Flick បានលើកឡើងពីការប្រកួតថា លទ្ធផល៣ពិន្ទុនេះគឺពិតជាសំខាន់ និងអស្ចារ្យខ្លាំងបំផុតសម្រាប់ក្រុមរបស់លោក។ ក្នុងការប្រកួតលោកមើលឃើញថា ក្រោយពេលក្រុមលោកបាននាំមុខមួយគ្រាប់មុន ក្រុមភ្ញៀវបានបង្កើតឱកាស និងប្រើរបៀបលេងដែលបង្កការលំបាក សម្រាប់ក្រុមរបស់លោកក្នុងរយៈពេល១០ទៅ១៥នាទី។ យ៉ាងណាក៏មើលឃើញក្រុមហាក់ល្អ និងមានលំនឹងមកវិញ ក្រោយពេលបន្ទាប់មកទៀត ។ ក្រុមរបស់លោកសម្បូរទៅដោយក្មេងៗច្រើន ប៉ុន្តែគឺពិតជាល្អមែនទែន ដែលអាចទទួលបានលទ្ធផល ល្អបែបនេះ។
បន្ទាប់ពីបញ្ចប់ត្រង់ចំណុចនេះលោកក៏បាននិយាយជុំវិញទម្រង់លេងរបស់ Raphina បែបនេះថា «គាត់គឺជាកីឡាករដែលបង្ហាញបានល្អមែនទែនសម្រាប់ប្រកួតនេះ។ ខ្ញុំចង់និយាយថា គ្រប់គ្នាឃើញគាត់ល្អនៅពេលនេះ ហើយគ្រប់គ្នាពិតជាបានដឹងហើយថា គាត់មកពីកន្លែងណា។ យើងអាចប្រៀបធៀបគ្នាបានថា ពីមុននឹងឥឡូវវាមានភាពខុសគ្នាកម្រិតណា។ គាត់ពេលនេះបានវិវឌ្ឍន៍ខ្លួនច្រើនណាស់ ទាំងការការពារ និងការគ្រប់គ្រងបាល់នៅហ្នឹងជើងគាត់ជាដើម។ គឺពិតជាអស្ចារ្យខ្លាំងមែនទែន។ ខ្ញុំពិតជារីករាយណាស់ដែលបានឃើញទម្រង់លេងដ៏បែបនេះរបស់កីឡាករ Barcelaona នាពេលនេះ»។
Raphina បានផ្ទេរពីក្រុម Leeds United របស់ប្រទេសអង់គ្លេសមកកាន់ Barcelona កាលឆ្នាំ២០២២ កាលមកដំបូងៗដូចជាមិនមានភាពលេចធ្លោអីខ្លាំងដូចពេលនេះទេ ប៉ុន្តែមកដល់ពេលនេះគឺពិតជាល្អខ្លាំងមែនទែន ពិសេសនោះលេងសហការគ្នាបានយ៉ាងល្អជាមួយមិត្តរួមក្រុម Lamine Yamal ជាដើម។ សូមបញ្ជាក់ថា Raphina រកបាន៣គ្រាប់ក្នុងការប្រកួតខាងលើនេះនៅនាទីទី១ នាទីទី៤៥ និងនាទីទី៥៦ ៕
